നെയ്യാറ്റിന്‍കരയില്‍ വിദ്യാര്‍ത്ഥിനിക്ക് ക്ലാസ് മുറിയില്‍ നിന്നും പാമ്പ് കടിയേറ്റു

തിരുവനന്തപുരം: സ്‌കൂള്‍ വിദ്യാര്‍ത്ഥിനിക്ക് ക്ലാസ് മുറിയില്‍ നിന്നും പാമ്പ് കടിയേറ്റതായി റിപ്പോര്‍ട്ട്. തിരുവനന്തപുരം നെയ്യാറ്റിന്‍കരയിലെ ചെങ്കല്‍ ഗവണ്‍മെന്റ് യു.പി സ്‌കൂള്‍ വിദ്യാര്‍ത്ഥിനിക്കാണ് പാമ്പ് കടിയേറ്റത്.

ക്ലാസ് മുറിയില്‍ ക്രിസ്തുമസ് ആഘോഷം നടക്കുന്നതിനിടെയായിരുന്നു സംഭവം. ഏഴാം ക്ലാസ് വിദ്യാര്‍ത്ഥിനിയായ നേഹയ്ക്കാണ് പാമ്പ് കടിയേറ്റത്.

നേഹയുടെ വലത് കാല്‍ പാദത്തിനാണ് കടിയേറ്റത്. കടിയേറ്റയുടനെ കുട്ടി കുതറിമാറുകയും പിന്നാലെ കുട്ടിയെ ആശുപത്രിയില്‍ പ്രവേശിപ്പിക്കുകയുമായിരുന്നു.

പാമ്പ് കടിയേറ്റ സമയത്ത് ക്ലാസ് മുറിയില്‍ മറ്റു കുട്ടികളും അധ്യാപകരും ഉണ്ടായിരുന്നു. പിന്നാലെ കുട്ടിയെ നെയ്യാറ്റിന്‍കര ജനറല്‍ ആശുപത്രിയില്‍ പ്രവേശിപ്പിക്കുകയായിരുന്നു.

മറ്റ് ആരോഗ്യ പ്രശ്‌നങ്ങളൊന്നുമില്ലെന്നും നിരീക്ഷണത്തിലാണ് പെണ്‍കുട്ടിയെന്നുമാണ് അധികൃതര്‍ അറിയിച്ചത്. രണ്ട് മണിക്കൂറിടവിട്ട് രക്തം പരിശോധിക്കുന്നതിനാല്‍ കുട്ടി ഇപ്പോഴും ആശുപത്രിയില്‍ തുടരുകയാണെന്ന് എഷ്യനെറ്റ് ന്യൂസ് റിപ്പോര്‍ട്ട് ചെയ്തു.

Content Highlight: A student was bitten by a snake in the classroom in Neyyattinkara