വിജയത്തെ ആഘോഷിക്കാറില്ല; തോല്‍വിയില്‍ കരയാറുമില്ല, ശശികുമാറുമായുള്ള അഭിമുഖം
Dool Talk
വിജയത്തെ ആഘോഷിക്കാറില്ല; തോല്‍വിയില്‍ കരയാറുമില്ല, ശശികുമാറുമായുള്ള അഭിമുഖം
ന്യൂസ് ഡെസ്‌ക്
Friday, 14th June 2013, 3:56 pm

സംവിധാനം എന്ന് പറയുന്നത് എന്റെ സ്വപ്‌നമാണ്. ആ മേഖലയില്‍ ഞാന്‍ എല്ലായ്‌പ്പോഴും ഉണ്ടാകും. എന്നാല്‍ ഇപ്പോള്‍ അഭിനയത്തേയും ഞാന്‍ സ്‌നേഹിച്ചുകൊണ്ടിരിക്കുകയാണ്. അഭിനേതാവ് എന്ന നിലയില്‍ ആളുകള്‍ എന്നെ അംഗീകരിക്കുന്നുണ്ടെന്ന് അറിയാം. എന്നാല്‍ അവരുടെ സ്‌നേഹം അതില്‍ മാത്രം ഒതുങ്ങരുതെന്ന നിര്‍ബന്ധമുണ്ട്.ശശികുമാര്‍ സംസാരിക്കുന്നു.


lineഫേസ്ടുഫേസ്  / ശശികുമാര്‍

മൊഴിമാറ്റം / ആര്യരാജന്‍

line

[]സംവിധായകന്‍, നിര്‍മാതാവ്, നടന്‍ എന്നിങ്ങനെ സിനിമയിലെ ഓരോ മേഖലയിലും കൈവെച്ച താരമാണ് ശശികുമാര്‍. സംവിധായകന്‍ എന്ന നിലയിലും നിര്‍മാതാവ് എന്ന നിലയിലും നടന്‍ എന്ന നിലയിലും തൊട്ടതെല്ലാം പൊന്നാക്കിയ വ്യക്തി.

സംവിധായക കുപ്പായം ആദ്യമായണിഞ്ഞ സുബ്രഹ്മണ്യപുരം ഒരു ക്ലാസിക് ഹിറ്റായിരുന്നു. നിര്‍മാതാവായ പസങ്ക നാഷനല്‍ അവാര്‍ഡ് കരസ്ഥമാക്കി. സുന്ദരപാണ്ഡ്യന്‍ എന്ന ചിത്രം നൂറ് ദിവസം പിന്നിടുന്നു. കുട്ടി പുലിയും ബോക്‌സ് ഓഫീസ് ഹിറ്റിലേക്ക് കുതിക്കുന്നു…ശശികുമാറിന്റെ സിനിമാ വിശേഷങ്ങള്‍ ഇങ്ങനെ പോകുന്നു… []

കൂടുതല്‍ അഭിനയവും കുറച്ച് സംവിധാനവും എന്നതാണോ പുതിയ പോളിസി ?

അങ്ങനെയില്ല, നിങ്ങള്‍ക്ക് കുറേ ചിത്രത്തില്‍ ഒരേ സമയം അഭിനയിക്കാം. എന്നാല്‍ സംവിധാനം അങ്ങനെയല്ല. ഒരു സമയം ഒരു ചിത്രമേ സംവിധാനം ചെയ്യാന്‍ സാധിക്കുള്ളൂ. സിനിമ സംവിധാനം ചെയ്യുന്നതിന് മുന്‍പ് വലിയൊരു പ്ലാനിങ്ങും പദ്ധതിയും ഉണ്ടായിരിക്കണം. എന്നാല്‍ അഭിനയിക്കാന്‍ അങ്ങനെ വേണമെന്ന് തോന്നുന്നില്ല. അതുകൊണ്ടായിരിക്കാം സംവിധായകനേക്കാള്‍ കൂടുതല്‍ നടനായി എന്നെ നിങ്ങള്‍ കാണുന്നത്.

സിനിമയില്‍ അഭിനയിക്കുന്നത് ആ പ്രതിഫലം ഉപയോഗിച്ച് കൂടുതല്‍ പുതിയ സിനിമ നിര്‍മിക്കാനാണോ ?

ഒരിക്കലുമല്ല. അഭിനയത്തെ ഇഷ്ടപ്പെടുന്നത് കൊണ്ട് തന്നെയാണ് ഓരോ സിനിമയിലും വേഷമിടുന്നത്. അത് ഞാന്‍ ആസ്വദിച്ച് തന്നെയാണ് ചെയ്യുന്നതും. പണത്തിന് വേണ്ടി ഞാന്‍ ഒരിക്കലും അഭിനയിച്ചിട്ടില്ല. എന്നെ സംബന്ധിച്ച് ഞാന്‍ ചെയ്യുന്ന ഒരു തൊഴിലിനും പണം ഒരു വലിയ ഘടകമായി എടുത്തിട്ടില്ല. എനിയ്ക്ക് എന്താണോ ഇഷ്ടമുള്ളത് അതാണ് ഞാന്‍ ഇതുവരെ ചെയ്തിട്ടുള്ളത്.

എന്റെ അഭിനയം ആളുകള്‍ക്ക് ഇഷ്ടമായി. അതിന് ശേഷം കൂടുതല്‍ സിനിമകള്‍ ചെയ്യാനുള്ള ധൈര്യം ലഭിച്ചു

സംവിധാനം എന്ന് പറയുന്നത് എന്റെ സ്വപ്‌നമാണ്. ആ മേഖലയില്‍ ഞാന്‍ എല്ലായ്‌പ്പോഴും ഉണ്ടാകും. എന്നാല്‍ ഇപ്പോള്‍ അഭിനയത്തേയും ഞാന്‍ സ്‌നേഹിച്ചുകൊണ്ടിരിക്കുകയാണ്. അഭിനേതാവ് എന്ന നിലയില്‍ ആളുകള്‍ എന്നെ അംഗീകരിക്കുന്നുണ്ടെന്ന് അറിയാം. എന്നാല്‍ അവരുടെ സ്‌നേഹം അതില്‍ മാത്രം ഒതുങ്ങരുതെന്ന നിര്‍ബന്ധമുണ്ട്.

സുബ്രഹ്മണ്യപുരം സംവിധാനം ചെയ്യുന്ന സമയത്ത് താങ്കള്‍ പറഞ്ഞിരുന്നു മറ്റൊരു നടനും ആ കഥാപാത്രത്തെ ഏറ്റെടുക്കാത്തതുകൊണ്ടാണ് താങ്കള്‍ തന്നെ അഭിനയിക്കാന്‍ തീരുമാനിച്ചതെന്ന്? ആ സമയത്ത് താങ്കള്‍ അഭിനയം എന്ന കലയെ ഇഷ്ടപ്പെട്ടിരുന്നോ ?

തീര്‍ച്ചയായും. ആ സമയത്ത് അത് തന്നെയായിരുന്നു സാഹചര്യം. എന്റെ സുഹൃത്തായ സമുദ്രക്കനി നാടോടികള്‍ എന്ന സിനിമയില്‍ അഭിനയിക്കാനായി എന്നെ വിളിച്ചു. ആളുകള്‍ എന്നെ സ്വീകരിക്കുമെന്ന് ഉറപ്പാണെങ്കില്‍ ആ വേഷം ചെയ്യാമെന്ന് പറഞ്ഞു. ആളുകള്‍ എന്നെ അംഗീകരിച്ചാല്‍ മാത്രമേ തുടര്‍ന്നും അഭിനയിക്കുള്ളൂ എന്ന് തീരുമാനിച്ചിരുന്നു.

എന്റെ അഭിനയം ആളുകള്‍ക്ക് ഇഷ്ടമായി. അതിന് ശേഷം കൂടുതല്‍ സിനിമകള്‍ ചെയ്യാനുള്ള ധൈര്യം ലഭിച്ചു. ഇപ്പോള്‍ എന്റെ ആത്മാവിലും ഒരു നടനുണ്ട്. അഭിനയം എനിയ്ക്ക് വലിയൊരളവില്‍ സന്തോഷം നല്‍കുന്നുണ്ട്.

doolnews-andoid
അടുത്ത പേജില്‍ തുടരുന്നു
lineചിത്രത്തില്‍ എന്നെ അസോസിയേറ്റ് ചെയ്ത ഓരോരുത്തരുടേയും വീട്ടില്‍  ഞാന്‍ പോയി, അതില്‍ അഭിനേതാക്കളും ടെക്‌നീഷ്യനും സ്‌പോര്‍ട് ബോയിയും പെടും. എന്റെ ചെറിയ സമ്മാനങ്ങള്‍ ഓരോരുത്തര്‍ക്കും നല്‍കി. എല്ലാവരോടുമുള്ള നന്ദി വ്യക്തിപരമായി അറിയിക്കണമെന്നതായിരുന്നു ആഗ്രഹം.

line

sasikumar-kutti-puliതാങ്കളുടെ എല്ലാവിജയത്തിനും കാരണം എന്താണ് , കഠിനാധ്വാനം, ഭാഗ്യം, അല്ലെങ്കില്‍ ഇത് രണ്ടും ?

നിങ്ങള്‍ക്ക് ഭാഗ്യം ഉണ്ടാകാം. എന്നാല്‍ ആ ഭാഗ്യം നിങ്ങളെ തേടി വീട്ടിലേക്ക് വരുമെന്ന് കരുതി വെറുതെ ഇരിക്കാന്‍ സാധിക്കില്ല. ഭാഗ്യത്തിനൊപ്പം തന്നെ കഠിനാധ്വാനം കൂടി ചെയ്യേണ്ടി വരും. ഞാന്‍ ഒരു ഭാഗ്യമുള്ള മനുഷ്യനാണ്. എന്നാല്‍ അതിനൊപ്പം തന്നെ ഞാനൊരു കഠിനാധ്വാനി കൂടിയാണ്.[]

താങ്കളുടെ വിജയത്തില്‍ ആരോടാണ് കടപ്പാടുള്ളത്, ദൈവത്തിനോടോ അതോ നിങ്ങളെ സ്വീകരിച്ച ജനങ്ങളോടോ ?

ദൈവത്തിനോടാണ് ആദ്യമായി നന്ദി പറയുന്നത്. അതിന് ശേഷം പ്രേക്ഷകര്‍. അതിന് ശേഷം എന്നെ വെച്ച് സിനിമ ചെയ്യാന്‍ തയ്യാറായ എല്ലാ സംവിധായകരോടും. എന്റെ സിനിമയില്‍ അഭിനയിച്ച താരങ്ങള്‍ക്കും എന്നോടൊപ്പം അഭിനയിച്ചവരോടും നന്ദിയും കടപ്പാടുണ്ട്.

സുന്ധരപാണ്ഡ്യന്‍ ഒരു ഫാമിലി എന്റര്‍ടൈനറാണ്, എന്നാല്‍ താങ്കളുടെ മറ്റ് സിനിമകളില്‍ നിന്ന് വ്യത്യസ്തമായി ആക്ഷനും വയലന്‍സും ഉണ്ട്. അത്തരമൊരു സിനിമയുടെ ഭാഗമാകാനുള്ള തീരുമാനത്തെക്കുറിച്ച് ?

എന്റെ അസിസ്റ്റന്റ് ആയിരുന്ന പ്രഭാകറാണ് ഈ സിനിമ ഞാന്‍ നിര്‍മിക്കണമെന്ന് ആവശ്യപ്പെടുന്നത്. സ്ത്രീകളെ ലക്ഷ്യംവെച്ച് എടുക്കുന്ന ഈ ചിത്രത്തിലെ പ്രധാന കഥാപാത്രത്തെ ഞാന്‍ തന്നെ അവതരിപ്പിക്കണമെന്ന നിര്‍ബന്ധവും അദ്ദേഹത്തിന് തന്നെയായിരുന്നു. എന്നെ മനസില്‍ വെച്ചാണ് ആ കഥാപാത്രത്തെ എഴുതിയതെന്നാണ് അദ്ദേഹം പറഞ്ഞത്. എനിയ്ക്ക് വേണ്ടി എഴുതിയ സിനിമയാണ് അതെന്നായിരുന്ന പ്രഭാകര്‍ പറഞ്ഞത്. തീര്‍ച്ചയായും ഞാന്‍ തന്നെയായിരുന്നു അതില്‍ അഭിനയിക്കേണ്ടിയിരുന്നത്. ഇതിന് മുന്‍പ് ഞാന്‍ ചെയ്ത സിനിമകളില്‍ നിന്നെല്ലാം വ്യത്യസ്തമാര്‍ന്ന സിനിമ തന്നെയായിരുന്നു അത്.

ചിത്രം നൂറ് ദിവസം പിന്നിട്ടുകഴിഞ്ഞു, ഇത്രയും വലിയ വിജയം പ്രതീക്ഷിച്ചിരുന്നോ ?

എന്റെ സിനിമ തിയ്യേറ്ററില്‍ നന്നായി ഓടുന്നു എന്നുവെച്ചാല്‍ അതിനര്‍ത്ഥം ആളുകള്‍ക്ക് എന്റെ സിനിമകള്‍ ഇഷ്ടമാണന്നും അവര്‍ക്ക് എന്നില്‍ വിശ്വാസമുണ്ടെന്നുമാണ്

നമ്മള്‍ ഒരു സിനിമ നിര്‍മിക്കുക വലിയൊരു വിജയം മുന്നില്‍ കണ്ട് തന്നെയാണ്. ഈ സിനിമയും ഒരു വിജയമായിരിക്കുമെന്ന് എനിയ്ക്ക് ഉറപ്പുണ്ടായിരുന്നു. എന്നാല്‍ ഞങ്ങളുടെ പ്രതീക്ഷയേയും മറികടന്ന് ചിത്രം പോയെന്നത് മറ്റൊരു യാഥാര്‍ത്ഥ്യം.

ചിത്രം നൂറ് ദിവസം പിന്നിട്ടത് എങ്ങനെ ആഘോഷിച്ചു ?

വളരെ സന്തോഷത്തോടെയാണ് എല്ലാവരും ഇതിനെ കണ്ടത്. എന്നാല്‍ ആഘോഷമെന്നത് ഒരു ദിവസത്തെ മാത്രം ചടങ്ങായി മാറ്റുന്നതിനോട്  യോജിപ്പില്ലായിരുന്നു. ചിത്രത്തില്‍ എന്നെ അസോസിയേറ്റ് ചെയ്ത ഓരോരുത്തരുടേയും വീട്ടില്‍  ഞാന്‍ പോയി, അതില്‍ അഭിനേതാക്കളും ടെക്‌നീഷ്യനും സ്‌പോര്‍ട് ബോയിയും പെടും. എന്റെ ചെറിയ സമ്മാനങ്ങള്‍ ഓരോരുത്തര്‍ക്കും നല്‍കി. എല്ലാവരോടുമുള്ള നന്ദി വ്യക്തിപരമായി അറിയിക്കണമെന്നതായിരുന്നു ആഗ്രഹം.

അതിന് ഏതാണ്ട് എത്ര സമയമെടുത്തു ?

രണ്ടര മാസം. ആദ്യം ഓരോരുത്തരുടേയും വീട് എവിടെയെന്ന് മനസിലാക്കിയെടുത്തു. എല്ലാവരേയും സെറ്റില്‍ കാണുമെന്നല്ലാതെ അവരുടെയെല്ലാം വീട് എവിടെയാണെന്നൊന്നും അറിയില്ലായിരുന്നു. എല്ലാവരുടേയും ഒപ്പം നിന്ന് ഫോട്ടോയും വീഡിയോയും എടുത്തു. കാരണം ആ ഓര്‍മകളെല്ലാം എല്ലായ്‌പ്പോഴും നിലനില്‍ക്കണമെന്ന് നിര്‍ബന്ധമുണ്ടായിരുന്നു. എന്നെ സംബന്ധിച്ച് വലിയൊരു അനുഭവം കൂടിയായിരുന്നു അത്.

doolnews-andoid
അടുത്ത പേജില്‍ തുടരുന്നു

lineവിജയം ആഘോഷിക്കാന്‍ മാത്രം ഉള്ളതാണെന്ന് കരുതുന്നില്ല. അതുപോലെ തോല്‍വിയില്‍ കരഞ്ഞിരിക്കണമെന്നും തോന്നിയിട്ടില്ല. വിജയവും തോല്‍വിയുടെ ഒരേ നാണയത്തിന്റെ ഇരുവശങ്ങളാണ്.line

sasi-kumar-kutty-puli

 

കുട്ടിപ്പുലിക്ക് നല്ല പ്രതികരണമാണല്ലോ ലഭിക്കുന്നത് ?

വളരെ സന്തോഷം. പ്രേക്ഷകര്‍ നമ്മുടെ സിനിമകള്‍ സ്വീകരിക്കുന്നു എന്ന് കേള്‍ക്കുന്നതാണ് ഏറ്റവും വലിയ സന്തോഷം.

എന്റെ സിനിമ തിയ്യേറ്ററില്‍ നന്നായി ഓടുന്നു എന്നുവെച്ചാല്‍ അതിനര്‍ത്ഥം ആളുകള്‍ക്ക് എന്റെ സിനിമകള്‍ ഇഷ്ടമാണന്നും അവര്‍ക്ക് എന്നില്‍ വിശ്വാസമുണ്ടെന്നുമാണ്. അവര്‍ എന്നില്‍ നിന്ന് പ്രതീക്ഷിക്കുന്നത് തന്നെ അവര്‍ക്ക് കൊടുക്കുക എന്നതാണ് എന്റെ വലിയ ഉത്തരവാദിത്തം.[]

കുട്ടിപ്പുലിയില്‍ എല്ലാ കൊമേഴ്ഷ്യല്‍ എലമെന്റ്‌സും ഉണ്ട്, റൊമാന്‍സ്, ഹ്യൂമര്‍, മാതൃസ്‌നേഹം തുടങ്ങിയവയെല്ലാം ?

അതെ. എന്നാല്‍ ഈ വികാരങ്ങളെല്ലാം അതിശയോക്തി കലര്‍ത്താതെ വളരെ സ്വാഭാവികമായിട്ട് തന്നെയാണ് അവതരിപ്പിച്ചത്. ഒരു അമ്മയും മകനും തമ്മിലുള്ള സ്‌നേഹത്തെ കുറിച്ച് പറയുന്ന ഒരു ചിത്രമെടുക്കാന്‍ ഏറെ നാളായി ആഗ്രഹിച്ചതായിരുന്നു. അമ്മയുടെ സ്‌നേഹത്തേക്കാള്‍ വലുതായി ഈ ലോകത്ത് മറ്റൊന്നും ഇല്ല. അതുകൊണ്ട് തന്നെ മാതൃസ്‌നേഹം ഒരിക്കലും ഔട്ട് ഓഫ് ഫാഷന്‍ ആകില്ല. അതാണ് സത്യം.

നിങ്ങള്‍ എത്ര പരിഷ്‌ക്കാരിയായാലും എത്ര വിജയം നേടിയ ആളായാലും അമ്മ അമ്മ തന്നെയാണ്. അമ്മയുടെ സ്‌നേഹത്തിനടുത്ത് മറ്റൊന്നിനും സ്ഥാനമില്ല.

നാഷണല്‍ അവാര്‍ഡ് ജേതാവായ ശരണ്യ ചിത്രത്തില്‍ താങ്കളുടെ അമ്മയായിട്ടാണ് വേഷമിട്ടത്, എങ്ങനെയുണ്ടായിരുന്നു അവരോടൊത്തുള്ള അനുഭവം ?

അമീര്‍ സുല്‍ത്താന്റെ റാം എന്ന സിനിമയുടെ സെറ്റില്‍ വെച്ചാണ് ഞാന്‍ ആദ്യമായി അവരെ പരിചയപ്പെടുന്നത്. അന്ന് ഞാന്‍ അസിസ്റ്റന്റ് ഡയരക്ടറായിരുന്നു. എന്നാല്‍ ഇന്ന് അവരുടെ മകനായി അഭിനയിക്കാനുള്ള ഭാഗ്യം എനിയ്ക്ക് ലഭിച്ചു. ഒരു കാര്യം എനിയ്ക്ക് പറയാനുള്ളത്, ഇപ്പോള്‍ അവര്‍ ശരണ്യ മാഡം ആയിരിക്കും, എന്നാല്‍ ഈ സിനിമയ്ക്ക് ശേഷം അവര്‍ ശരണ്യ അമ്മ എന്നായിരിക്കും അറിയപ്പെടുക, ആ അനുഭവമാണ് എനിയ്ക്ക് ഉണ്ടായത്. ഇതില്‍ കൂടുതല്‍ ഒന്നും പറയാന്‍ ഇല്ല.

താങ്കളുടെ ഇപ്പോഴത്തെ കരിയറില്‍ സന്തോഷവാനാണോ ?

തീര്‍ച്ചയായും ഞാന്‍ സന്തോഷവാനാണ്, എന്നാല്‍ എന്റെ വിജയം ആഘോഷിക്കാനൊന്നും ഞാനില്ല. വിജയം ആഘോഷിക്കാന്‍ മാത്രം ഉള്ളതാണെന്ന് കരുതുന്നില്ല. അതുപോലെ തോല്‍വിയില്‍ കരഞ്ഞിരിക്കണമെന്നും തോന്നിയിട്ടില്ല. വിജയവും തോല്‍വിയുടെ ഒരേ നാണയത്തിന്റെ ഇരുവശങ്ങളാണ്. സന്തോഷം എന്ന് പറയുന്നത് എനിയ്ക്ക് എങ്ങനെ അനുഭവപ്പെടുന്നു എന്നതിനെ ആശ്രയിച്ചാണ് അതല്ലാതെ ആഘോഷിക്കാന്‍ മാത്രം ഉള്ളതാണെന്ന് വിശ്വസിക്കുന്നില്ല.

കടപ്പാട്: റെഡ്ഡിഫ് ഡോട്ട് കോം