ദല്‍ഹി: എ.എഫ്.സി അണ്ടര്‍ 16 വനിത ഫുട്ബോള്‍ യോഗ്യതാ മല്‍സരത്തില്‍ ഇന്ത്യയ്ക്ക് വമ്പന്‍ ജയം. പാക്കിസ്ഥാനെ എതിരില്ലാത്ത നാല് ഗോളിനാണ് ഇന്ത്യന്‍ പെണ്‍കുട്ടികള്‍ തകര്‍ത്തത്.
ഇരുപത്തിരണ്ടാം മിനിറ്റില്‍ അവികാ സിങാണ് സ്‌കോറിങിന് തുടക്കം കുറിച്ചത്. രണ്ടാംപകുതിക്ക് തൊട്ട് മുമ്പ് പാക്കിസ്ഥാന് ഗോള്‍കീപ്പറുടെ പിഴവില്‍ നിന്ന് ലീഡ് നില രണ്ടായി.
രണ്ടാംപകുതിയില്‍ ആക്രമണം ഇന്ത്യ പൂര്‍ണമായും ഏറ്റെടുത്തതോടെ പാക്കിസ്ഥാന് പരുങ്ങലിലായി. പാക്കിസ്ഥാന് തിരിച്ചടിക്കാന്‍ അവസരം നല്‍കാതെ 82ാം മിനിറ്റില്‍ പ്രതിരോധത്തെ നിഷ്പ്രഭമാക്കി സുനിത മുണ്ട ഗോള്‍നില മൂന്നാക്കി ഉയര്‍ത്തി. മത്സരം അവസാനിക്കാന്‍ രണ്ട് മിനിറ്റ് ശേഷിക്കേ ശില്‍ഖി ദേവി പാക്കിസ്ഥാന്റെ തകര്‍ച്ച പൂര്‍ണമാക്കി.
തുടര്‍ച്ചയായ രണ്ടാം ജയത്തോടെ ഇന്ത്യയാണ് ഗ്രൂപ്പ് ബിയില്‍ ഒന്നാമത്. ആദ്യ മല്‍സരത്തില്‍ ഹോങ്കോങിനെ ഒന്നിനെതിരെ ആറുഗോളിന് ഇന്ത്യ തോല്‍പിച്ചിരുന്നു. സെപ്റ്റംബര്‍ 21ന് മംഗോളിയയ്ക്കെതിരെയാണ് ഇന്ത്യയുടെ അടുത്ത മല്‍സരം.