Categories

Headlines

‘ഇടതുപക്ഷ മുസ്‌ലിംങ്ങള്‍ ഹിന്ദുസ്ത്രീയെ കൊല്ലുന്നു’ ; മലപ്പുറത്തെ ഡി.വൈ.എഫ്.ഐയുടെ തെരുവ് നാടകം വളച്ചൊടിച്ച് സി ന്യൂസ്


മലപ്പുറം കാളികാവില്‍ ഡി.വൈ.എഫ്.ഐ അവതരിപ്പിച്ച തെരുവ് നാടകത്തെ വര്‍ഗീയ സംഘര്‍ഷമാക്കി ചിത്രകീകരിച്ച് ദേശീയ മാധ്യമമായ സീന്യൂസ്. ഗൗരി ലങ്കേഷിന്റെ കൊലപാതകത്തില്‍ പ്രതിഷേധിച്ച് നടത്തിയ തെരുവ് നാടകത്തിന്റെ ദൃശ്യങ്ങള്‍ ‘നടുറോഡില്‍ കേരളത്തിലെ ഇടതുപക്ഷ മുസ്ലിംങ്ങള്‍ ആര്‍.എസ്.എസ് അനുഭാവിയായ ഹിന്ദുസ്ത്രീയെ കൊല്ലുന്നു’ എന്ന തലക്കെട്ടോടെയാണ് ചാനല്‍ പ്രചരിപ്പിച്ചത്.

കാറില്‍നിന്ന് ഒരു സ്ത്രീയെ വലിച്ചിറക്കി വെടിവെച്ചുകൊല്ലുന്ന തെരുവുനാടക രംഗമായിരുന്നു അവതരിപ്പിച്ചിരുന്നത്. ഇതിനെയാണ് സീന്യൂസ് വളച്ചൊടിച്ച് വാര്‍ത്തയാക്കിയത്.

നാടകത്തില്‍ അഭിനയിച്ച ഡി.വൈ.എഫ്.ഐ കാളികാവ് മേഖലാ സെക്രട്ടറി സി.ടി. സകരിയ്യയുടേത് ഉള്‍പ്പടെയുള്ള ദൃശ്യങ്ങളാണ് വര്‍ഗീയ സംഘര്‍ഷമായി ചാനല്‍ കാണിച്ചത്. വാര്‍ത്ത വളച്ചൊടിച്ച ടി.വി.ക്കെതിരെ ദേശീയ, സംസ്ഥാന നേതാക്കളുമായി കൂടിയാലോചിച്ച് നിയമനടപടി സ്വീകരിക്കുമെന്ന് സി.ടി. സകരിയ്യ പറഞ്ഞു.

അതേ സമയം വിവാദമായതോടെ വാര്‍ത്തയും വീഡിയോയുംസൈറ്റില്‍ നിന്നും അപ്രത്യക്ഷമായിട്ടുണ്ട്.

രണ്ടുലക്ഷത്തോളം ആളുകളാണ് ഈ വിഡിയോ കണ്ടിട്ടുള്ളത്. സീന്യൂസിന്റെ വാര്‍ത്ത വളച്ചൊടിക്കലിനെതിരെ എം.ബി രാജേഷ് എം.പി ഉള്‍പ്പടെയുള്ളവര്‍ രംഗത്തെത്തിയിട്ടുണ്ട്. ജന്മാഷ്ടമി ദിനത്തിലും കേരളത്തിനെതിരെ സീന്യൂസ് കൊടും നുണയുടെ വിഷം ചീറ്റുകയാണെന്നും ഇതാണോ സീന്യൂസ് നടത്തുന്ന മാധ്യമപ്രവര്‍ത്തനമെന്നും രാജേഷ് പറഞ്ഞു.

Tagged with: