Categories

നദീജല സംയോജനം കേരളത്തെ തകര്‍ക്കും; റിവ്യൂ ഹരജി നല്‍കണമെന്ന് വി.എസ്

തിരുവനന്തപുരം: നദീസംയോജനം നടപ്പിലായാല്‍ കേരളത്തിലെ ജനങ്ങളുടെ അന്നവും വെള്ളവും മുട്ടുമെന്നും കേരളം പിന്നെ ഇതുപോലെ ഉണ്ടാകില്ലെന്നും പ്രതിപകഷ നേതാവ് വി.എസ് അച്യുതാനന്ദന്‍. തിരുവനന്തപ്പുരത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. പദ്ധതിക്കായുള്ള സുപ്രീംകോടതി വിധിക്കെതിരെ കേരളാ സര്‍ക്കാര്‍ റിവ്യൂ ഹര്‍ജി നല്‍കണമെന്നും പദ്ധതി നടപ്പാക്കുന്നതിനെതിരെ കേരളത്തിലെ ജനങ്ങള്‍ ഒന്നടങ്കം രംഗത്തുവരണമെന്നും വി.എസ് ആവശ്യപ്പെട്ടു.

വേമ്പനാട് കായലും കുട്ടനാടും കാര്‍ഷിക മേഖലയെയും തകര്‍ക്കുന്ന പദ്ധതിയാണിത്. പമ്പയും അച്ചന്‍ കോവിലാറും നദീ സംയോജനത്തില്‍ ഗതി മാറി ഒഴുകുന്നതോടെ മധ്യതിരുവിതാംകൂറിന്റെ ഗതിതന്നെ മാറും. പമ്പയടക്കം പടിഞ്ഞോറോട്ട് ഒഴുകുന്ന നദികള്‍ കിഴക്കോട്ട് ഒഴുക്കണമെന്നത് തമിഴ്‌നാടിന്റെ ആവശ്യമാണ്. ഇത്തരത്തില്‍ ലഭിക്കുന്ന വെള്ളം സംഭരിക്കാന്‍ തമിഴ്‌നാട് 100 കോടി രൂപ മുടക്കി പുതിയ ഡാം തന്നെ നിര്‍മ്മിച്ചിട്ടുണ്ട്. ഇതിന് അനുകൂലമായ വിധത്തിലാണ് സുപ്രീം കോടതി വിധി വന്നിരിക്കുന്നത്. നദീ സംയോജനം നടപ്പായാല്‍ കേരളം ഇന്നത്തെ നിലയില്‍ കാണില്ലെന്നും വി.എസ് ഓര്‍മ്മിപ്പിച്ചു.

നദീജല തര്‍ക്ക കേസുകളില്‍ എല്‍.ഡി.എഫ് സര്‍ക്കാരിന്റെ കാലത്ത് പ്രഗത്ഭരായ അഭിഭാഷകരെ ഉപയോഗിച്ചാണ് സുപ്രീം കോടതിയില്‍ കേസ് വാദിച്ചിരുന്നത്. എന്നാല്‍ ഈ സര്‍ക്കാര്‍ പരിചയ സമ്പന്നരല്ലാത്ത അഭിഭാഷകരെ ഉപയോഗിച്ച് കേസ് തോറ്റുകൊടുക്കുകയാണ്. മുല്ലപ്പെരിയാര്‍ പൊട്ടിയാല്‍ ജലം ശാന്തമായി ഒഴുകി ഇടുക്കി ഡാമില്‍ വന്നു നില്‍ക്കുമെന്നും അഞ്ഞൂറു കുടുംബങ്ങളെ മാത്രം മാറ്റിപ്പാര്‍ച്ചാല്‍ മതിയെന്നും ഇതിനാവശ്യമായ എട്ട് സ്‌കൂളുകളും ബഞ്ചുകളും തയ്യാറാണെന്നും കോടതിയില്‍ അറിയിച്ച പഹയന്മാരാണ് നാടു ഭരിക്കുന്നതെന്ന് വി.എസ് പറഞ്ഞു.

നദീ സംയോജനം കേരളത്തിന് ബാധകമാകില്ലെന്ന കെ.എം മാണിയുടെ വാദം ശരിയല്ല. തീരുമാനം എല്ലാ സംസ്ഥാനങ്ങളും അംഗീകരിക്കണമെന്ന് സുപ്രീംകോടതി വിധിയില്‍ പറയുന്നുണ്ട്. പ്രശ്‌നത്തില്‍ പ്രധാനമന്ത്രി അടിയന്തരമായി ഇടപെടണമെന്ന് ആവശ്യപ്പെട്ട വി.എസ്, കേരളത്തിന്റെ പരിസ്ഥിതിയെതന്നെ തകര്‍ക്കുന്ന നീക്കമാണിതെന്നും ഇതിനെ ഒരു നിലക്കും അംഗീകരിക്കാനാവില്ലെന്നും മുന്നറിയിപ്പു നല്‍കി.

അതേസമയം, നദീജല സംയോജനപദ്ധതിക്കു വേണ്ടിയുള്ള സുപ്രീംകോടതി വിധിക്കെതിരെ കോണ്‍ഗ്രസ് നേതാവ് എം.വി സുധീരന്‍ രംഗത്തെത്തി. സംസ്ഥാനത്തിന്റെ അധികാര പരിധിയില്‍ വരുന്ന നദി, വെള്ളം തുടങ്ങിയ വിഷയങ്ങളില്‍ സംസ്ഥാനത്തിന്റെ അഭിപ്രായങ്ങള്‍ക്കെതിരെ  ഒരു നിലപാട് ഒരു ഭാഗത്തു നിന്നും ഉണ്ടാകാന്‍ പാടില്ലെന്ന് കോണ്‍ഗ്രസ് നേതാവ് വി.എം സുധീരന്‍ പറഞ്ഞു. അധികാര പരിധിക്ക് നേരെ ഏത് ഭാഗത്ത് നിന്ന് അഭിപ്രായമുണ്ടായാലും അത് ഫെഡറല്‍ തത്വത്തിന് എതിരാണെന്നും സുധാകരന്‍ ആലപ്പഴയില്‍ മാധ്യമങ്ങളോട് പറഞ്ഞു.

വിവിധ സംസ്ഥാനങ്ങളുടെയും പരിസ്ഥിതി സംഘടനകളുടെയും എതിര്‍പ്പ് നിലനില്‍ക്കെ, നദീസംയോജനം നടപ്പാക്കാന്‍ കഴിഞ്ഞ ദിവസം സുപ്രീം കോടതി ഉന്നതാധികാര സമിതിയെ നിയോഗിച്ചിരുന്നു. പദ്ധതിയോടുള്ള എതിര്‍പ്പ് സംസ്ഥാനങ്ങള്‍ ഉപേക്ഷിക്കണമെന്നും കോടതി ആവശ്യപ്പെട്ടിരുന്നു.

Malayalam news

Kerala news in English

3 Responses to “നദീജല സംയോജനം കേരളത്തെ തകര്‍ക്കും; റിവ്യൂ ഹരജി നല്‍കണമെന്ന് വി.എസ്”

  1. Moncy George

    കേരളത്തിലെ ജനങ്ങള്‍ക്ക്‌ ഒരു പ്രശ്നം വന്നാല്‍ ആദ്യം മുന്നോട്ടിറങ്ങുന്ന 2 നേതാക്കളാണ് വീ എസും പിന്നെ വി .എo സുധീരനും ….ഇക്കാര്യത്തില്‍ ഇവര്‍ രാഷ്ട്രീയ ഭിന്നത മാറ്റി വെച്ച് ഒരുമിച്ചു പോരാടിയാല്‍ നമ്മുടെ സംസ്ഥാനത്തിന് ഗുണം ചെയ്യാന്‍ അത് ഉപകരിക്കും …. യൂ ഡി എഫ് സര്‍ക്കാര്‍ ഈ കേസിലും നമ്മുടെ എ. ജി ദണ്ടപാണിയെ കൊണ്ട് കോടതിയില്‍ നമ്മുക്കെതിരായി അഭിപ്രായം പറയിച്ചാല്‍ ഇതിന്റെ കാര്യവും “ഖുദ ഗവാ ” … അതിവേഗം സമദൂരം എന്നു പേരും പറഞ്ഞു നാട്ടു കാരെ പറ്റിക്കാന്‍അലഞ്ഞു തിരിഞ്ഞു കുറെ ഫോര്മും വാങ്ങി ജനസമ്പര്‍ക്ക ഷോ നിര്‍ത്തി സംസ്ഥാനത്തിന്റെ ശരിക്കും ഉള്ള ആവശ്യങ്ങള്‍ക്കായി നടന്നാല്‍ മതിയായിരുന്നു …

  2. Ansar Kottakkal

    ആരെങ്കിലും അഴിമതിക്കെതിരെ പോരാടിയാല്‍ പിന്നെ അയാളുടെ കാര്യം പോക്കാണ് ….പിന്നീടു എല്ലാ അഴിമതിക്കാരും ചേര്‍ന്ന് അങ്ങേരെ അഴിമാതികാരനായി ചിത്രീകരിച്ചു കരിവാരി തേയ്ക്കാന്‍ വേണ്ടി എന്ത് നാറിയ കളിയും കളിക്കുമെന്ന് വി എസിനെതിരെ തുടര്‍ച്ചയായി വരുന്ന കേസുകളില്‍ നിന്ന് വ്യക്താമാണ് …ഇനി അടുത്തത് വീ എം സുധീരന്റെ ഊഴമാണ് …..നമ്മുടെ നാട് നന്നാവില്ല ….!!

  3. ശുംഭന്‍

    കണ്ണുപൊട്ടന്‍ ആനയെ കണ്ടതുപോലെ നദീജല സംയോജനത്തെപ്പറ്റി വിദഗ്ദാഭിപ്രായങ്ങള്‍ എഴുന്നള്ളിക്കാന്‍ കുറെ നേതാക്കളും, മുദ്രാവാക്യം പോലെ ഏറ്റുപറയാന്‍ കുറെ ശിങ്കിടികളും! നദീജല സംയോജനം കേരളത്തെ തകര്‍ക്കും എന്ന് പറഞ്ഞു വെറുതെ എതിര്‍ത്തു കൊണ്ടിരിക്കുന്നതിനു പകരം, ഈ അവസരം എങ്ങനെ നമുക്ക് അനുകൂലമാക്കാം എന്ന് നോക്കുകയല്ലേ ബുദ്ധി?
    നദീജല സംയോജന പദ്ധതി ഒരു ബഹു മുഖ ആനുകൂല്യ പദ്ധതി ആയിട്ട് സങ്കല്പിച്ചു നോക്കൂ. മഴക്കാലത്ത് അത്യധികം ജലം നമ്മുടെ നദികളിലൂടെ കടലിലേക്ക്‌ ഒഴുകി പാഴായി പോകുന്നുണ്ട്. അതിനെ കിഴക്കോട്ടു തിരിച്ചു വിട്ട് ആ കാലഘട്ടത്തില്‍ മഴ ലഭിക്കാത്ത പ്രദേശങ്ങള്‍ക്കായി പ്രയോജനപ്പെടുത്തട്ടെ. അതിനു പകരം നമുക്ക് ജലം കുറയുന്ന ഘട്ടത്തില്‍ അവിടെ സംഭരിച്ചിരിക്കുന്ന ജലം ഇങ്ങോട്ട് ഒഴുക്കാനുള്ള സംവിധാനം ഉണ്ടാക്കട്ടെ. അങ്ങനെ ഒരു പരസ്പര സഹായ സഹകരണ പദ്ധതി ആയി ഈ പരിപാടിയെ മാറ്റാനായി നമുക്ക് പ്രവര്‍ത്തിച്ചു കൂടെ?

LEAVE YOUR COMMENTS

Press ctrl+g to toggle between English and Malayalam.