Categories

സ്‌പെക്ട്രം അഴിമതി; കരട് റിപ്പോര്‍ട്ട് പി.എ.സി തള്ളി

ന്യൂദല്‍ഹി: സ്‌പെക്ട്രം അഴിമതിയുമായി ബന്ധപ്പെട്ട് പബ്ലിക് അക്കൗണ്ട്‌സ് കമ്മറ്റിയുടെ കരട് റിപ്പോര്‍ട്ട് തള്ളി. പത്തിനെതിരേ പതിനൊന്ന് വോട്ടുകള്‍ക്കാണ് റിപ്പോര്‍ട്ട് തള്ളിയിരിക്കുന്നത്. കരട് റിപ്പോര്‍ട്ടിന്‍മേലുള്ള ചര്‍ച്ചയില്‍ ഭൂരിഭാഗം അംഗങ്ങളും എതിര്‍പ്പ് പ്രകടിപ്പിക്കുകയായിരുന്നു.

യു.പി.എ അംഗങ്ങളുടെ കടുത്ത എതിര്‍പ്പുമൂലം പി.എ.സി അധ്യക്ഷന്‍ മുരളി മനോഹര്‍ ജോഷി യോഗത്തില്‍ നിന്നും ഇറങ്ങിപ്പോയിരുന്നു. പി.എ.സി റിപ്പോര്‍ട്ട് ചര്‍ച്ചചെയ്യാനെത്തിയ 21 അംഗ കമ്മിറ്റിയിലെ 9യു.പി.എ അംഗങ്ങളും ഓരോ എസ്.പി, ബി.എസ്.പി അംഗങ്ങളുമാണ് റിപ്പോര്‍ട്ട് എതിര്‍ത്തത്.

യു.പി.എ അംഗങ്ങളില്‍ 7 കോണ്‍ഗ്രസ് എം.പിമാരും രണ്ട് ഡി.എം.കെ എം.പിമാരും ഉള്‍പ്പെടുന്നു.

മുന്‍ ടെലികോം മന്ത്രി എ.രാജയെയും പ്രധാനമന്ത്രിയുടെ ഓഫീസിനെയും രൂക്ഷമായി വിമര്‍ശിക്കുന്ന കരടാണ് ഇന്നത്തെ യോഗത്തില്‍ ചര്‍ച്ചചെയ്തത്. അംഗങ്ങള്‍ കരട് റിപ്പോര്‍ട്ട് തള്ളണമെന്ന് പി.എ.സി ചെയര്‍മാന്‍ മുരളി മനോഹര്‍ ജോഷിയോട് ആവശ്യപ്പെട്ടു.

മണിക്കൂറുകളോളമുള്ള ചര്‍ച്ചയ്ക്കുശേഷം കമ്മറ്റിയുടെ പരിപാടികള്‍ വൈകുന്നേരം നാല് മണിവരെ മാറ്റിവച്ചു. നാല് മണിക്കുചേരുന്ന യോഗത്തില്‍ വോട്ടിംങ് ഉള്‍പ്പെടെയുള്ള കാര്യങ്ങള്‍ക്ക് തീരുമാനമുണ്ടാവുമെന്നാണ് സൂചന.

LEAVE YOUR COMMENTS

Press ctrl+g to toggle between English and Malayalam.