Categories

‘മെട്രോയുടെ തൂണില്‍ ഏണി ചാരിവച്ച് സിമന്റ് പൂശിക്കൊണ്ടിരുന്ന ആളുടെ മുഖത്ത് കെട്ടിയ ടവല്‍ അഴിഞ്ഞുവീണതും ഞാന്‍ ഞെട്ടി.. !! സാക്ഷാല്‍ മോദിജി.. !!


കോഴിക്കോട്: കൊച്ചി മെട്രോ യാഥാര്‍ത്ഥ്യമാക്കിയതിനു പിന്നിലാരെന്നു ചോദിച്ചാല്‍ എല്‍.ഡി.എഫാണോ അതോ യു.ഡി.എഫാണോ എന്നാകും എല്ലാവരും ആലോചിക്കുക. എന്നാല്‍ നിങ്ങള്‍ക്ക് തെറ്റി യഥാര്‍ത്ഥത്തില്‍ മെട്രോയ്ക്ക് പിന്നില്‍ പ്രവര്‍ത്തിച്ചത് സാക്ഷാല്‍ പ്രധാനമന്ത്രി നരേന്ദ്രമോദിയും ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരന്‍ അടക്കമുള്ള ബി.ജെ.പി നേതാക്കളുമാണ്.

സംഗതി ചുമ്മാ പറയുന്നതല്ല. മെട്രോയ്ക്ക് വേണ്ടി മോദിയും സംഘവും കഠിനാധ്വാനം നടത്തുന്നത് നേരില്‍ കണ്ട ദൃക്‌സാക്ഷിയുടെ വാക്കുകള്‍ തന്നെ അതിന് തെളിവാണ്. ആ യാഥാര്‍ത്ഥ്യം പക്ഷെ നമ്മുടെ നാട്ടിലെ ബി.ജെ.പിക്കാര്‍ക്ക് മാത്രമേ അറിയുകയുള്ളൂ… അതുകൊണ്ടാണ് അവര്‍ മെട്രോ യാഥാര്‍ത്ഥ്യമാക്കിയ പ്രധാനമന്ത്രിയ്ക്ക് അഭിവാദ്യമറിയിച്ച് ഫ്‌ളെക്‌സുകളും പോസ്റ്ററുകളും മെട്രോയുടെ തൂണുകളിലും കൊച്ചിയുടെ വീഥികളില്‍ സ്ഥാപിച്ചത്.


Also Read: ‘ഞങ്ങള്‍ക്ക് സൊമാലിയയിലും പാകിസ്താനിലും മാത്രമല്ലടാ അങ് ലണ്ടനിലുമുണ്ടെടാ പിടി..’; പോ മോനേ മോദി ട്രെന്റ് ഇനിയും അവസാനിച്ചിട്ടില്ല; ഇന്ത്യ-ബംഗ്ലാദേശ് സെമിഫൈനല്‍ സ്‌റ്റേഡിയത്തില്‍ നിന്നുമുള്ള ചിത്രം വൈറലാകുന്നു 


ചരിത്രമറിയാത്തത് കൊണ്ടാണ് ഈ നാട്ടിലെ കമ്മ്യുണിസ്റ്റുകാര്‍ക്കും മറ്റും മെട്രായ്ക്ക് പിന്നില്‍ മോദിയാണെന്ന് അറിയാത്തതെന്നാണ് സോഷ്യല്‍ മീഡിയ പറയുന്നത്. കഴിഞ്ഞ നൂറ്റാണ്ടില്‍ ഛത്രപതി പടയോട്ടം നടത്തി ഉണ്ടായ വഴി മെട്രോയ്ക്ക് തിരഞ്ഞെടുത്തത് മുതല്‍ ബി.ജെ.പി സര്‍ക്കാരാണ് മെട്രോയ്ക്ക് ചുക്കാന്‍ പിടിക്കുന്നതെന്നും അവസാനം മാറി മാറി വന്ന കേരളത്തിലെ സര്‍ക്കാര്‍ കേന്ദ്രഫണ്ട് പുട്ടുടിച്ചപ്പോള്‍ കുമ്മനം നേരിട്ട് കേന്ദ്രത്തില്‍ പോയി ഇരുചെവി അറിയാതെ ഫണ്ട് വാങ്ങി വന്ന് നിര്‍മാണം പൂര്‍ത്തിയാക്കിയെന്നുമാണ് സോഷ്യല്‍മീഡിയയിലെ കരക്കമ്പി.

ഇതുകൊണ്ടൊന്നും തീര്‍ന്നില്ല. മെട്രോയ്ക്ക് വേണ്ടി മോദിയും കുമ്മനവും ശശികലും കെ.സുരേന്ദ്രനുമൊക്കെ നന്നായി ശാരീരികാധ്വാനവും നടത്തിയിട്ടുണെന്നാണ് ഇപ്പോള്‍ കിട്ടുന്ന വിവരം. സോഷ്യല്‍ മീഡിയയില്‍ അത് നേരില്‍ കണ്ട ദൃസാക്ഷിയുടെ പോസ്റ്റ് വൈറലായി മാറിയിരിക്കുകയാണ്.

സോഷ്യല്‍ മീഡിയയില്‍ വൈറലായി കൊണ്ടിരിക്കുന്ന മായാ സന്തോഷിന്റെ പോസ്റ്റ് വായിക്കാം…

കൊച്ചി മെട്രോയുടെ നിര്‍മ്മാണത്തില്‍ ശ്രീ മോദിജിയുടെ പങ്ക് ചോദ്യം ചെയ്യപ്പെടുന്ന ഈ വേളയില്‍ ഞാന്‍ സാക്ഷിയായ ഒരു സംഭവം ഇവിടെ വിവരിക്കാന്‍ ആഗ്രഹിക്കുകയാണ്. ഒരു മാസം മുന്‍പ് ഞാന്‍ ജോലി കഴിഞ്ഞ് അല്‍പം താമസിച്ച് കടവന്ത്ര കലൂര്‍ വഴി ഇടപ്പള്ളിയിലേക്ക് വരികയായിരുന്നു.. ഏതാണ്ട് സ്റ്റേഡിയം മെട്രോ സ്റ്റേഷനടുത്തായി ഏതാനും തൊഴിലാളികള്‍ നൈറ്റ് ഷിഫ്റ്റില്‍ മെട്രോ നിര്‍മ്മാണത്തില്‍ ഏര്‍പ്പെട്ടതായി കണ്ടു. വണ്ടി അവരെ പാസ്സ് ചെയ്യുന്നതിന് തൊട്ടുമുന്‍പ് മെട്രോയുടെ തൂണില്‍ ഏണി ചാരിവച്ച് സിമന്റ് പൂശിക്കൊണ്ടിരുന്ന ആളുടെ മുഖത്ത്‌കെട്ടിയ ടവല്‍ അഴിഞ്ഞുവീണതും ഞാന്‍ ഞെട്ടി.. !! സാക്ഷാല്‍ മോഡിജി.. !! അപ്പോഴാണ് ഞാന്‍ ബാക്കി ഉള്ളവരെ ശ്രദ്ധിക്കുന്നത്. കുനിഞ്ഞുനിന്ന് മട്ടി കുഴച്ച് ചട്ടിയിലാക്കുന്നത് മാന്യശ്രീ കുമ്മനം ജി.. ചട്ടി തലയിലെടുത്ത് കോണിയിലേക്ക് എത്തിച്ച് കൊടുക്കുന്നത് ശശികല ജി, തൊട്ടപ്രത്തെ തോട്ടില്‍ നിന്ന് കുടത്തില്‍ വെള്ളം നിറച്ചോണ്ട് വന്ന് ബാരലില്‍ ഒഴിക്കുന്നത് ഉള്ളി ജി… ഞാന്‍ അപ്പത്തന്നെ ബൈക്ക് സ്റ്റാന്റിലിട്ടിട്ട് ചാടി ഇറങ്ങി നാല് ജയ് ഹിന്ദ് വിളിച്ചതും കുമ്മന്‍ജി ഓടി വന്ന് വാപൊത്തി. ഒച്ച വച്ച് ആളെക്കൂട്ടല്ലേ.. പ്രശസ്തി ഓര്‍ക്ക് ഇഷ്ട്ടല്ല പോലും.. !! ഇനിയും ഞാനിത് പറയാതിരുന്നാല്‍ കേരളത്തിന് മെട്രോ യാഥാര്‍ഥ്യമാക്കിയതിന് പിറകില്‍ പ്രവര്‍ത്തിച്ച യഥാര്‍ത്ഥ ഭാരതപുത്രന്മാര്‍ അവഗണിക്കപ്പെടും. എല്ലാവരും ഇത് ഷെയര്‍ ചെയ്ത് എല്ലാവരിലും എത്തിക്കുക ഇത് ഷെയര്‍ ചെയ്ത അമ്പാടിമുക്കിലെ സംഘപ്രവര്‍ത്തകര്‍ക്ക് ഒരു കൊല്ലത്തേക്ക് മെട്രോ ഫ്രീ പാസ്സ് കിട്ടി. ഷെയര്‍ ചെയ്യാതെ അവഗണിച്ച ശ്രീധരനും ചാണ്ടിക്കും വേദിയില്‍ ഇരിപ്പിടം പോലും കിട്ടിയില്ല. .

 

Tagged with: |