മുംബൈ: പ്രമുഖ നിര്‍മ്മാതാവ് ഷക്കീല്‍ നൂറാനിക്കെതിരേ മാനനഷ്ടത്തിന് കേസ് നല്‍കാന്‍ സഞ്ജയ് ദത്ത് തയ്യാറെടുക്കുന്നു. ഒരു സിനിമാകരാറില്‍ ഒപ്പിട്ട് പാതിവഴിയില്‍വെച്ച് സഞ്ജയ്ദത്ത് പിന്‍മാറിയതുമൂലം തനിക്ക് കോടികളുടെ നഷ്ടമുണ്ടെന്ന് നൂറാനി ആരോപിച്ചിരുന്നു. നൂറാനിയുടെ പരാതിയുടെ അടിസ്ഥാനത്തില്‍ ദത്തിന്റെ ഫ് ളാറ്റും ഓഫീസും കണ്ടുകെട്ടാന്‍ ഹൈക്കോടതി നോട്ടീസയച്ചിരുന്നു.

‘ജാന്‍ കി ബാസി’ എന്ന സിനിമയുടെ കരാര്‍ ഒപ്പിട്ടശേഷം ദത്ത് പാതിവഴിയില്‍ നിന്നു പിന്‍മാറിയതിനെതിരെയാണ് ഷക്കീല്‍ നൂറാനി പരാതി നല്‍കിയത്. ദത്ത് പിന്‍മാറിയത് വഴി തനിക്ക് 2.03 കോടിരൂപയുടെ നഷ്ടമുണ്ടായെന്നും അതിനാല്‍ ദത്ത് തനിക്ക് നഷ്ടപരിഹാരം നല്‍കണമെന്നുമാവശ്യപ്പെട്ടാണ് നൂറാനി ഹൈക്കോടതിയെ സമീപിച്ചത്.

മുപ്പതു ദിവസത്തെ നോട്ടീസാണ് കോടതി ദത്തിനു നല്‍കിയിട്ടുള്ളത്. മുംബൈയിലെ ബാന്ദ്രയില്‍ പാലി ഹില്ലില്‍ ഇംപീരിയല്‍ ഹൈറ്റ്‌സിലെ ഫ് ളാറ്റിനു മുന്നില്‍ ഈ നോട്ടീസ് പതിച്ചിട്ടുണ്ട്.