Administrator
Administrator
മൂലമ്പിള്ളിയില്‍ വോട്ട് പിടിക്കാനെത്തിയ മന്ത്രിക്ക് നാട്ടുകാരുടെ ശകാരം
Administrator
Thursday 31st March 2011 12:32pm

mulambilly കൊച്ചി: വികസനത്തിനായി കുടിയൊഴിപ്പിക്കപ്പെട്ട് പെരുവഴയില്‍ കഴിയുന്നവരോട് വോട്ട് ചോദിക്കാന്‍ വന്ന മന്ത്രിക്ക് നാട്ടുകാരുടെ ചുട്ടമറുപടി. വോട്ടില്ലെന്ന് പറയുക മാത്രമല്ല, നല്ല ശകാര വര്‍ഷവും കേട്ടു മന്ത്രിക്ക്. വല്ലാര്‍പാടം പദ്ധതിക്കുവേണ്ടി കുടിയൊഴിപ്പിക്കല്‍ നടന്ന മൂലമ്പിള്ളിയില്‍ വോട്ടുചോദിച്ചെത്തിയ വൈപ്പിന്‍ മണ്ഡലത്തിലെ സ്ഥാനാര്‍ഥി മന്ത്രി എസ്.ശര്‍മക്കാണ് ഈ ദുര്‍ഗതി.

സ്ത്രീകളുടെ നേതൃത്വത്തിലാണ് നാട്ടുകാര്‍ മന്ത്രിയെ ശകാരത്തോടെ എതിരേറ്റത്. കുടിയൊഴിപ്പിക്കപ്പെട്ടവര്‍ക്കുള്ള പുനരധിവാസം പൂര്‍ണമായും നടപ്പാക്കാത്തതില്‍ പ്രതിഷേധിച്ചാണ് ശര്‍മയോടു പ്രദേശവാസികള്‍ കയര്‍ത്തത്. കുടിയൊഴിപ്പിക്കപ്പെട്ടവര്‍ പലരും ഇപ്പോള്‍ പെരുവഴിയിലാണ് അന്തിയുറങ്ങുന്നത്.

പുനരധിവാസത്തിനായി നിര്‍ദേശിച്ച സ്ഥലത്ത് വെള്ളവും വൈദ്യുതിയും എത്തിക്കുന്നതിന് സര്‍ക്കാര്‍ ഇതുവരെ നടപടിയെടുത്തിട്ടില്ല. ഇവിടെ വീട് വെച്ചതിന് ശേഷം അടിസ്ഥാന സൗകര്യം നല്‍കാമെന്നാണ് സര്‍ക്കാര്‍ അറിയിച്ചത്. എന്നാല്‍ സൗകര്യം ലഭ്യമായ ശേഷമേ വീട് വെക്കാന്‍ സാധിക്കൂവെന്നാണ് നാട്ടുകാരുടെ നിലപാട്.

പുനരധിവാസ ഭൂമിയിലേക്കു വെള്ളവും വൈദ്യുതിയും എത്തിക്കുമെന്ന് എസ്.ശര്‍മതന്നെ പലതവണ വാഗ്ദാനം ചെയ്തിരുന്നതായി നാട്ടുകാര്‍ പറയുന്നു. നടപടികള്‍ എങ്ങുമെത്താത്തതാണ് പ്രദേശവാസികളെ ചൊടിപ്പിച്ചത്. എന്നാല്‍ തന്നോടു കയര്‍ത്ത സ്ത്രീകളുടെ പരാതികള്‍ ക്ഷമയോടെ കേട്ടും പഴയ വാഗ്ദാനങ്ങള്‍ ആവര്‍ത്തിക്കുകയും ചെയ്താണ് മന്ത്രി മൂലമ്പിള്ളിയില്‍ നിന്നു മടങ്ങിയത്.

Advertisement