ഉജ്ജൈന്‍: കേരള മുഖ്യമന്ത്രി പിണറായി വിജയന്റെ തലയറുക്കുന്നയാള്‍ക്ക് ഒരുകോടി രൂപ വാഗ്ദാനം ചെയ്തത് ആര്‍.എസ്.എസ് പ്രചാരക് പ്രമുഖ്. മധ്യപ്രദേശിലെ ആര്‍.എസ്.എസ് നേതാവായ കുന്തന്‍ ചന്ദ്രാവത് ആണ് ഇത്തരമൊരു പ്രഖ്യാപനം നടത്തിയത്.

‘കൊലയാളിയായ കേരള മുഖ്യമന്ത്രി പിണറായി വിജയന്റെ തല അറുക്കുന്ന സ്വയം സേവകരുടെ പേരില്‍ എന്റെ ഒരു കോടി രൂപയുടെ സമ്പാദ്യം ഞാന്‍ എഴുതി നല്‍കും. ‘ അദ്ദേഹം പ്രഖ്യാപിച്ചു.

പിണറായി വിജയന്റെ തലയറുക്കുന്നവര്‍ക്ക് പ്രതിഫലം നല്‍കാന്‍ തന്റെ സ്വത്തുകള്‍ മുഴുവന്‍ വില്‍ക്കുമെന്നും അദ്ദേഹം പറഞ്ഞു.


Must Read:തെരഞ്ഞെടുപ്പും അട്ടിമറിക്കപ്പെടുന്നു? മഹാരാഷ്ട്ര തദ്ദേശ തെരഞ്ഞെടുപ്പില്‍ വന്‍ അട്ടിമറിയെന്ന് ആരോപണം: ക്രമക്കേട് നടന്നത് വോട്ടിങ് മെഷീനുകളില്‍


ഗോധ്രയില്‍ തങ്ങള്‍ പകവീട്ടിയതുപോലെ കേരളത്തിലെ കൊലപാതകങ്ങള്‍ക്കും പകരം വീട്ടുമെന്ന് സി.പി.ഐ.എമ്മിന് ചന്ദ്രാവത് മുന്നറിയിപ്പു നല്‍കുകയും ചെയ്തു.

‘ഗോധ്ര മറന്നുപോയോ. 56 പേരെയാണ് അവര്‍ കൊന്നത്. ഇതേ ഹിന്ദു സമൂഹം രണ്ടായിരം പേരെ കബറിസ്ഥാനിലെത്തിച്ചു മണ്ണിട്ടുമൂടി. 300 പ്രചാരകന്മാരെയാണ് നിങ്ങള്‍ കൊന്നിരിക്കുന്നത്. ഇടതന്മാരേ കേട്ടോളൂ. മൂന്നുലക്ഷം തലകള്‍ ഭാരതമാതാവിനെ അണിയിക്കും.

എം.പി ചിന്താമണി മാളവ്യയും എം.എല്‍.എ മോഹന്‍ യാദവിന്റെയും സാന്നിധ്യത്തിലായിരുന്നു ആര്‍.എസ്.എസ് നേതാവ് ഇത്തരമൊരു പ്രഖ്യാപനം നടത്തിയത്.


Also Read: മോദിയുടെയും അമിത് ഷായുടെയും ഭൂതകാലം നോക്കുമ്പോള്‍ വോട്ടിങ് മെഷീനില്‍ കൃത്രിമം കാണിച്ചെന്ന സംശയം ബലപ്പെടുന്നു: മുന്‍ ഹൈക്കോടതി ജഡ്ജി 


ആര്‍.എസ്.എസിന്റെ പൊതുയോഗത്തിനുശേഷം മാധ്യമങ്ങള്‍ക്കു മുമ്പിലും ചന്ദ്രാവത് ഈ പ്രഖ്യാപനം ആവര്‍ത്തിച്ചു. ‘ഞാന്‍ എന്റെ വാക്കുകളില്‍ ഉറച്ചുനില്‍ക്കുന്നു. ഭാരത പുത്രനായതുകൊണ്ടാണ് ഞാനിതു പറഞ്ഞത്. എന്തു സംഭവിച്ചാലും ഭാരതപുത്രനെന്ന നിലയില്‍ നേരിടാന്‍ തയ്യാറാണ്.’ എന്നാണ് മാധ്യമങ്ങളോട് അദ്ദേഹം പറഞ്ഞത്.

അതിനിടെ ഈ പരാമര്‍ശം തങ്ങളുടെ ശ്രദ്ധയില്‍പ്പെട്ടില്ല എന്നാണ് ഉജ്ജൈന്‍ എസ്.പി എം.എം വര്‍മ്മ പറഞ്ഞത്. അതിനെക്കുറിച്ച് അന്വേഷിച്ച ശേഷമേ എന്തെങ്കിലും പറയാന്‍ കഴിയൂവെന്നും എസ്.പി പറഞ്ഞു.