Categories

സ്വര്‍ണം ഇറക്കുമതി നിയന്ത്രണത്തില്‍ ഇളവ് ചെയ്യും: ചിദംബരം

P-Chidambaram

ന്യൂദല്‍ഹി: രാജ്യത്തെ സ്വര്‍ണ ഇറക്കുമതിയിലെ നിയന്ത്രണത്തിന് ഈ സാമ്പത്തികവര്‍ഷം അവസാനത്തോടെ ഇളവുവരുത്തുമെന്ന് ധനമന്ത്രി പി ചിദംബരം. ഇന്റര്‍നാഷനല്‍ കസ്റ്റംസ് ദിനത്തോടനുബന്ധിച്ച് ന്യൂദല്‍ഹിയില്‍ കസ്റ്റംസ് ഉദ്യോഗസ്ഥരോട് സംസാരിക്കുകയായിരുന്നു അദ്ദേഹം.

എന്നാല്‍, വിദേശവ്യാപാരക്കമ്മി പൂര്‍ണമായും നിയന്ത്രണത്തിലാക്കിയ ശേഷം മാത്രമേ നിയന്ത്രണം ഒഴിവാക്കുന്നതിനെക്കുറിച്ച് ആലോചിക്കാനാകൂവെന്നും അദ്ദേഹം പറഞ്ഞു.

സ്വര്‍ണ ഇറക്കുമതിയില്‍ നിലവിലുള്ള നിയന്ത്രണങ്ങളില്‍ ഇളവുവരുത്താന്‍ നടപടിയെടുക്കണമെന്നാവശ്യപ്പെട്ട് കോണ്‍ഗ്രസ് അധ്യക്ഷ സോണിയ ഗാന്ധി കേന്ദ്ര വാണിജ്യ മന്ത്രാലയത്തിന് കഴിഞ്ഞയാഴ്ച കത്തയച്ചിരുന്നു. നടപ്പു സാമ്പത്തികവര്‍ഷം അവസാനത്തോടെ സ്വര്‍ണ ഇറക്കുമതിയിലെ നിയന്ത്രണങ്ങള്‍ ഇളവ് ചെയ്യാനാകുമെന്ന് ആത്മവിശ്വാസമുണ്ട്.

എന്നാല്‍ അതിന് വിദേശവ്യാപാരക്കമ്മി നിയന്ത്രണത്തിലാകേണ്ടതുണ്ട്. നിയന്ത്രണം സ്വര്‍ണക്കടത്ത് വര്‍ധിക്കുന്നതിന് കാരണമായെന്നും എന്നാല്‍ വിദേശവ്യാപാരക്കമ്മി വരുതിയിലാക്കാന്‍ അത് അനിവാര്യമായിരുന്നെന്നും അദ്ദേഹം പറഞ്ഞു.

ഈ സാമ്പത്തികവര്‍ഷത്തിന്റെ ആദ്യ രണ്ടു മാസങ്ങളില്‍ സ്വര്‍ണ ഇറക്കുമതി 300 ടണ്‍ കവിഞ്ഞതോടെ വിദേശവ്യാപാരക്കമ്മി നിയന്ത്രണാതീതമായിരുന്നു. ഒരു ഘട്ടത്തില്‍ 88.2 ബില്യന്‍ ഡോളര്‍ എന്ന റെക്കോഡിലേക്ക് വിദേശവ്യാപാരക്കമ്മി ഉയരുകയുണ്ടായി. തുടര്‍ന്നാണ്, സര്‍ക്കാര്‍ സ്വര്‍ണത്തിന്റെ ഇറക്കുമതി തീരുവയില്‍ 10 ശതമാനം വര്‍ധന വരുത്തിയത്.

തീരുവ വര്‍ധിപ്പിച്ചതിനത്തെുടര്‍ന്ന് സ്വര്‍ണ ഇറക്കുമതി മേയ് മാസത്തില്‍ 162 ടണ്‍ എന്നത്, നവംബറില്‍ 19.3 ടണ്‍ എന്ന നിലയിലേക്ക് കൂപ്പുകുത്തിയിരുന്നു. രാജ്യത്തെ സ്വര്‍ണക്കടത്ത് പ്രതിമാസം മൂന്ന് ടണ്ണോളമാണെന്ന് ചിദംബരം പറഞ്ഞു. ക്രൂഡ് ഓയില്‍ കഴിഞ്ഞാല്‍ ഏറ്റവും കൂടുതല്‍ ഇറക്കുമതി തീരുവ സ്വര്‍ണത്തിനെണെന്നും ചിദംബരം കൂട്ടിച്ചേര്‍ത്തു.

Tagged with: