Categories

Headlines

റെയ്‌സീന കലാപം അഥവാ ദല്‍ഹി പ്രക്ഷോഭം


രാഷ്ട്രീയ പാര്‍ട്ടികള്‍ക്ക് കലാപത്തെ ഹൈജാക്ക് ചെയ്യാന്‍ കഴിഞ്ഞില്ല എന്നത് ഇതിന്റെ ജൈവിക ഗുണം കൊണ്ടാണ്. അത്രമാത്രം ജൈവികമായ ഒരു പ്രക്ഷോഭം പുറമേ നിന്നുള്ള ആഹ്വാനം കൂടാതെ യുവാക്കളില്‍ നിന്ന് ഉണ്ടായിട്ട് വരണമെങ്കില്‍ അതിന് തക്കതായ കാരണം ഇവിടെ ഉണ്ടായിരിക്കണമെന്നത് നമ്മള്‍ മനസ്സിലാക്കണം. ഡോ. പി ഗീത എഴുതുന്നു..



എസ്സേയ്‌സ് / ഡോ. പി ഗീത

ദല്‍ഹിയിലെ സംഭവത്തെ ഞാന്‍ റെയ്‌സീന കലാപം എന്ന് വിളിക്കാനാണ് ഇഷ്ടപ്പെടുന്നത്. സ്വാതന്ത്ര്യത്തിന് ശേഷം ഭരണകൂടവും സിവില്‍ സമൂഹവും തമ്മിലുള്ള പ്രകടമായ വൈരുദ്ധ്യം മൂര്‍ച്ചിച്ച് മൂര്‍ത്തമായ രൂപത്തില്‍ രൂപം കൊണ്ടതാണ് റെയ്‌സീന കുന്നില്‍ നാം കണ്ടത്. അത്‌കൊണ്ടാണ് ഇന്ത്യന്‍ ചരിത്രത്തില്‍ വളരെ കൃത്യമായി രേഖപ്പെടുത്തേണ്ട സംഭവമായി ഈ കലാപം മാറുന്നത്.

മുഖ്യധാര രാഷ്ട്രീയ പാര്‍ട്ടികളെ മുഴുവന്‍ അപ്രസക്തമാക്കിക്കൊണ്ട് ഇന്ത്യയിലെ വിദ്യാര്‍ത്ഥികളും യുവജനങ്ങളും മുഴുവന്‍ തെരുവിലിറങ്ങി എങ്ങനെ പ്രതികരിക്കണമെന്ന് മുതിര്‍ന്നവരെ പഠിപ്പിക്കുകയും മുന്നോട്ട് നയിക്കുകയും ചെയ്യുന്ന പ്രക്ഷോഭമാണ് ഇവിടെ നടന്നത്. അതിനാല്‍ വളരെ ജൈവികമായിട്ടുള്ള പ്രക്ഷോഭമായാണ് ഇതിനെ കാണുന്നത്. അരുന്ധതി റോയിയെ പോലുള്ള ഒരു സെലിബ്രിറ്റിക്കും ഈ സമരത്തെ നിര്‍വീര്യമാക്കാന്‍ കഴിഞ്ഞില്ല.

Ads By Google

ഒരു സംഘടിത രൂപമില്ല എന്നൊക്കെ പോരായ്മയായി ആരോപിക്കപ്പെടുന്നുണ്ടെങ്കിലും അത് അതിന്റെ ഗുണപരമായ കാര്യങ്ങളായാണ് വിലയിരുത്തപ്പെടേണ്ടത് എന്ന് ഞാന്‍ കരുതുന്നു.

കാരണം ഒരു നേതാവിന്റെ കീഴില്‍ പ്രത്യേകമായ ചട്ടക്കൂടിനുള്ളില്‍ നിന്ന് ചെയ്യുന്ന വ്യവസ്ഥാപിത സമരത്തിനപ്പുറത്തേക്ക് മനുഷ്യര്‍ക്ക് ഒരുപാട് പ്രശ്‌നങ്ങളുണ്ടെന്നും അത് മനസ്സിലാക്കുന്നതില്‍ നിലനില്‍ക്കുന്ന സംഘടനകള്‍ പരാജയപ്പെട്ടിരിക്കുന്നു എന്നും ലോകത്തെ അറിയിക്കുന്ന നിമിഷമായാണ് ഇതിനെ തിരിച്ചറിയേണ്ടത്.

സ്വാതന്ത്ര്യത്തേയും ജനാധിപത്യത്തേയും സമത്വത്തേയും കുറിച്ചുള്ള എല്ലാവിധ സ്വപ്‌നങ്ങളേയും തകര്‍ത്തുകൊണ്ട് കാലാകാലമായി നിലനില്‍ക്കുന്ന ഭരണകൂടത്തോട് ജനങ്ങളില്‍ മൂര്‍ച്ഛിച്ച് വന്നിട്ടുള്ള അസ്വസ്ഥതയുടെ പ്രഖ്യാപനമാണിത്.

പെണ്‍കുട്ടി പീഡിപ്പിക്കപ്പെട്ട സംഭവത്തില്‍ മുഖ്യധാരാ രാഷ്ട്രീയ പാര്‍ട്ടികള്‍ പ്രതികരിക്കുന്നതിന് മുമ്പാണ് ഈ കലാപം രൂപപ്പെടുന്നത്. ഈ കലാപം രൂപപ്പെട്ട് അതിന്റേതായ രീതിയില്‍ സ്ഥാനപ്പെട്ടതിന് ശേഷം പല രാഷ്ട്രീയ പാര്‍ട്ടികളുടെയും നേതാക്കള്‍ തങ്ങളാണ് ഇതിനെ നയിച്ചതെന്ന മട്ടില്‍ പലഭാഗത്ത് നിന്നുമെത്തിയ കുതിരകളെ പോലെ സമരത്തെ ദത്തെടുക്കാന്‍ ശ്രമിച്ചത് ദയനീയമായി പരാജയപ്പെട്ടത് നമ്മള്‍ കാണ്ടതാണ്.

രാഷ്ട്രീയ പാര്‍ട്ടികള്‍ക്ക് കലാപത്തെ ഹൈജാക്ക് ചെയ്യാന്‍ കഴിഞ്ഞില്ല എന്നത് ഇതിന്റെ ജൈവിക ഗുണം കൊണ്ടാണ്. അത്രമാത്രം ജൈവികമായ ഒരു പ്രക്ഷോഭം പുറമേ നിന്നുള്ള ആഹ്വാനം കൂടാതെ യുവാക്കളില്‍ നിന്ന് ഉണ്ടായിട്ട് വരണമെങ്കില്‍ അതിന് തക്കതായ കാരണം ഇവിടെ ഉണ്ടായിരിക്കണമെന്നത് നമ്മള്‍ മനസ്സിലാക്കണം.

അതിനെ ഒരു സംഭവം എന്ന രീതിയിലല്ല നമ്മള്‍ തിരിച്ചറിയേണ്ടത്. ഇന്നത്തെ കുട്ടികള്‍ നടത്തുന്ന കലാപം അവര്‍ ജനിക്കുന്നതിന് മുമ്പേ ഉണ്ടായിട്ടുള്ള കാരണങ്ങളുടെ ചരിത്രപരമായ തുടര്‍ച്ച സംഭവിക്കുന്ന ഒരു മുഹൂര്‍ത്തമാണ്. ഇന്ത്യക്ക് സ്വാതന്ത്ര്യം ലഭിച്ചപ്പോള്‍ സ്വാതന്ത്ര്യത്തെ കുറിച്ച് ഇവിടുത്തെ മനുഷ്യര്‍ക്കുണ്ടായിരുന്ന സങ്കല്‍പ്പത്തെ മുഴുവന്‍ തകര്‍ത്തുകൊണ്ടാണ് ഭരണം നടന്നത്.

സ്വാതന്ത്ര്യത്തേയും ജനാധിപത്യത്തേയും സമത്വത്തേയും കുറിച്ചുള്ള എല്ലാവിധ സ്വപ്‌നങ്ങളേയും തകര്‍ത്തുകൊണ്ട് കാലാകാലമായി നിലനില്‍ക്കുന്ന ഭരണകൂടത്തോട് ജനങ്ങളില്‍ മൂര്‍ച്ഛിച്ച് വന്നിട്ടുള്ള അസ്വസ്ഥതയുടെ പ്രഖ്യാപനമാണിത്. ഇനി സഹിച്ചിരിക്കാന്‍ ഞങ്ങള്‍ തയ്യാറല്ല എന്ന ജനതയുടെ മുന്നറിയിപ്പ് കൂടിയാണിത്.

പലതരത്തിലുള്ള പ്രക്ഷോഭങ്ങള്‍ ലോകത്ത് നടക്കുന്നുണ്ട്. ലോകത്താകമാനം ഗ്ലോബലൈസേഷന്റെ ഭാഗമായിക്കൊണ്ട് വാള്‍സ്ട്രീറ്റ് കലാപവും മുല്ലപ്പൂ വിപ്ലവവുമൊക്കെ നടക്കുന്നുണ്ട്. പല രാഷ്ട്രങ്ങളില്‍ പല കാരണങ്ങളാല്‍ ഇത്തരത്തിലുള്ള ജനമുന്നേറ്റങ്ങള്‍ സംഭവിച്ചുകൊണ്ടിരിക്കുന്നുണ്ട്.

ഇന്ത്യയില്‍ നടന്ന കലാപത്തിന് തക്കതായ കാരണമായി എങ്ങനെയാണ് ഒരു കൂട്ടബലാത്സംഗം മാറുന്നത് എന്നതാണ് നമ്മള്‍ ശ്രദ്ധിക്കേണ്ടത്. 90 മുതല്‍ ഇവിടെ നടപ്പിലാക്കിക്കൊണ്ടിരിക്കുന്ന ഗ്ലോബലൈസേഷന്‍ നയങ്ങളുണ്ട്. അതിന് മുമ്പുണ്ടായിരുന്ന അടിയന്തരാവസ്ഥയുണ്ട്.

ആ കാലഘട്ടങ്ങളില്‍ നിന്നും വിഭിന്നമായി രാഷ്ട്രീയമോ സാമ്പത്തികമോ ആയ കാരണങ്ങളില്‍ നിന്ന് മാറി ഒരു വ്യക്തിക്ക് നേരെയുള്ള ആക്രമണം കലാപത്തിന് നിമിത്തമാകുകയാണ്. അതില്‍ നിന്നും നമ്മള്‍ മനസ്സിലാക്കേണ്ടത് ജ്യോതി എന്ന 23 കാരി പെണ്‍കുട്ടിക്ക് നേരെ നടന്ന അക്രമത്തിനെതിരെ മാത്രമുണ്ടായ കലാപമല്ലിത്.

മണിപ്പൂരില്‍ ഇന്ത്യന്‍ ആര്‍മി റേപ്പ് അസ് എന്ന ബാനറുമായി സ്ത്രീകള്‍ നഗ്നരായി ആര്‍മി ഹെഡ്ക്വാര്‍ടേഴ്‌സിലേക്ക് മാര്‍ച്ച് ചെയ്യുമ്പോള്‍ ശ്രദ്ധിക്കേണ്ടത് ‘ഇന്ത്യന്‍ ആര്‍മി’എന്നാണ് അവര്‍ പറയുന്നത്. ഇന്ത്യക്കാരെ സംബന്ധിച്ച് ഇന്ത്യന്‍ ആര്‍മി എന്ന് പറയുമ്പോള്‍ ഇന്ത്യ എന്നത് ഒരു അപര രാജ്യമായി മാറുകയാണ്.

കാലാകാലമായി ഒറീസയിലും ബിഹാറിലും മണിപ്പൂരിലുമൊക്കെ നിരവധി ജ്യോതിമാര്‍ നടുറോഡില്‍ വെച്ച് അപമാനിക്കപ്പെട്ടതിനോടുള്ള ജനങ്ങളുടെ പ്രതികരണമാണിത്.

മണിപ്പൂരില്‍ ഇന്ത്യന്‍ ആര്‍മി റേപ്പ് അസ് എന്ന ബാനറുമായി സ്ത്രീകള്‍ നഗ്നരായി ആര്‍മി ഹെഡ്ക്വാര്‍ടേഴ്‌സിലേക്ക് മാര്‍ച്ച് ചെയ്യുമ്പോള്‍ ശ്രദ്ധിക്കേണ്ടത് ‘ഇന്ത്യന്‍ ആര്‍മി’എന്നാണ് അവര്‍ പറയുന്നത്. ഇന്ത്യക്കാരെ സംബന്ധിച്ച് ഇന്ത്യന്‍ ആര്‍മി എന്ന് പറയുമ്പോള്‍ ഇന്ത്യ എന്നത് ഒരു അപര രാജ്യമായി മാറുകയാണ്.

ഇന്ത്യയെ സ്ത്രീകള്‍ക്ക് ജീവിക്കാന്‍ പറ്റാത്ത രാജ്യമായാണ് അവര്‍ കണ്ടത്. ഇപ്പോഴുള്ളത് നമ്മുടെ പട്ടാളക്കാരോ നമ്മുടെ രാഷ്ട്രമോ അല്ല. ജീവിക്കുന്നത് മറുദേശത്താണ് എന്നുള്ളത് അവിടുത്തെ സ്ത്രീകള്‍ ഇത് തിരിച്ചറിയുകയും ഞങ്ങളെ ബലാത്സംഗം ചെയ്‌തോളു എന്ന് മനോരമയുടെ ബലാത്സംഗത്തിനും വധത്തിനും ശേഷം ഇന്ത്യന്‍ പട്ടാളത്തെ വെല്ലുവിളിക്കുകയും ചെയ്തു. അത്തരത്തിലാണ് അവിടുത്തെ കലാപങ്ങള്‍ രൂപപ്പെട്ടുവന്നതെന്ന് വ്യക്തം.

അങ്ങനെ തൂത്തെറിയപ്പെടേണ്ട ഒരു സമൂഹമായി സ്ത്രീകളെ കാലാകാലങ്ങളായി മാറ്റിയെടുത്തതിന്റെ ഉത്തരവാദിത്വം ഇവിടുത്തെ ഭരണകൂടത്തിന്റേതാണ്. പ്രതിപക്ഷവും മറ്റ് രാഷ്ട്രീയപാര്‍ട്ടികളുമുള്‍പ്പെട്ടതാണ് ഇവിടുത്തെ സ്റ്റേറ്റ്. അത്‌കൊണ്ടാണ് ഏതെങ്കിലും വിദേശ രാജ്യത്തോട് യുദ്ധം ചെയ്യുന്നത് പോലെ നമ്മുടെ യുവാക്കളോട് ഭരണകൂടം പെരുമാറിയത്.

ചെറിയ ആയുധം പോലും ഇല്ലാത്ത കുട്ടികളോടാണ് ഇന്ത്യന്‍ ഭരണകൂടം യുദ്ധത്തിന് ഇറങ്ങിയത്. എന്തിനെയാണ് ഇവര്‍ ഭയക്കുന്നത്? കാരണം പ്രതിപക്ഷ നേതൃത്വത്തിലുള്ള സമരമല്ല. അങ്ങനെയൊരു സമരമായിരുന്നെങ്കില്‍ ഏതെങ്കിലുമൊരു ഘട്ടത്തില്‍ സര്‍ക്കാറിന് സമരം ഒത്തുതീര്‍പ്പാക്കാന്‍ കഴിയുമായിരുന്നു. കാരണം ഭരണകക്ഷി മാത്രമല്ല പ്രതിപക്ഷവും സ്റ്റേറ്റാണ്.

ഈ പ്രതിപക്ഷത്തിനും പിന്നീട് സര്‍ക്കാരാകാനുള്ളതാണ്. ഇവര്‍ക്ക് നിരവധി അധികാരപദവികള്‍ പങ്കുവെക്കാനുണ്ട്. ഇതൊന്നും വകവെക്കാത്തവരാണ് ദല്‍ഹിയില്‍ സമരം നടത്തുന്നത്. അത്‌കൊണ്ട് തന്നെ സര്‍ക്കാര്‍ ഈ സമരത്തെ ഭയപ്പെടുന്നു. പ്രതിപക്ഷം ഇല്ലാത്തൊരവസ്ഥയില്‍ നമ്മുടെ രാജ്യം എത്തിയിട്ട് കാലം കുറേയായി.

സ്ത്രീ സംവരണബില്‍ കീറിക്കളഞ്ഞ ഇവരാണ് ആഗോളവല്‍ക്കരണത്തെ എതിര്‍ക്കുകയും അതിവേഗത്തില്‍ ആഗോളവല്‍ക്കരണ നയങ്ങളെ അംഗീകരിക്കുകയും ചെയ്യുന്നത്.

അവര്‍ക്ക് ലാഭകരമായ കാര്യങ്ങള്‍ മാത്രമാണ് അവര്‍ പാസാക്കുന്നത്. ഇതിന്റെ വിഹിതങ്ങള്‍ അവര്‍ പങ്കിട്ടെടുക്കുകയും ചെയ്യുന്നു. ഇങ്ങനെയാണ് ഭരണകൂടം നിലനില്‍ക്കുന്നത്. ഇതിനെയാണ് നമ്മള്‍ ജനാധിപത്യം എന്ന് വിളിക്കുന്നത്.

 

അടുത്ത പേജില്‍ തുടരുന്നു

Page 1 of 512345