Categories

ഡീസല്‍ വില വര്‍ധിപ്പിക്കാന്‍ നിര്‍ദേശം

ന്യൂദല്‍ഹി: ഡീസല്‍ വില വര്‍ധിപ്പിക്കണമെന്ന് പ്രധാനമന്ത്രിയുടെ സാമ്പത്തിക ഉപദേശക സമിതി. സമിതിയുടെ ഇടക്കാല അവലോകന റിപ്പോര്‍ട്ടിലാണ് ഈ ആവശ്യം ഉന്നയിച്ചിരിക്കുന്നത്. അന്താരാഷ്ട്ര വിപണിയിലെ ക്രൂഡ് ഓയില്‍ വില ഉയരുന്നതും രൂപയുടെ മൂല്യത്തിലുണ്ടായ ഇടിവുമാണ് വില വര്‍ധിപ്പിക്കാനുള്ള കാരണങ്ങളായി സമിതി ചൂണ്ടിക്കാട്ടിയിരിക്കുന്നത്. ഉപദേശക സമിതി ചെയര്‍മാന്‍ സി. രംഗരാജനാണ് ഈ ആവശ്യം മുന്നോട്ടുവെച്ചത്.

Ads By Google

സബ്‌സിഡിയോടുകൂടിയുള്ള പാചകവാതക വിതരണത്തിന് പരിധി നിശ്ചയിക്കണമെന്നും ഇടക്കാല അവലോക റിപ്പോര്‍ട്ടില്‍ പറയുന്നു. സ്വര്‍ണം ഇറക്കുമതി ചെയ്യുന്നതില്‍ നിയന്ത്രണം കൊണ്ടുവരണമെന്നും അദ്ദേഹം ആവശ്യപ്പെട്ടു.

വ്യോമയാന മേഖലയില്‍ 49 ശതമാനം നേരിട്ടുള്ള വിദേശ നിക്ഷേപം ഉടന്‍ അനുവദിക്കണം. കാര്‍ഷിക മേഖലയുടെ വളര്‍ച്ച 0.5 ശതമാനമായി കുറയും. വരള്‍ച്ചയും മഴയിലുണ്ടായ കുറവുമാണ് ഇതിന് പ്രധാന കാരണം. കാലവര്‍ഷത്തില്‍ 16 ശതമാനം കുറവാണ് രേഖപ്പെടുത്തിയത്. കാര്‍ഷിക വളര്‍ച്ച കഴിഞ്ഞവര്‍ഷം 2.8% ആയിരുന്നു.

ഈ സാമ്പത്തിക വര്‍ഷം രാജ്യത്തിന്റെ മൊത്തം വളര്‍ച്ചാ നിരക്ക് 6.7 ശതമാനമായിരിക്കും. പണപ്പെരുപ്പ നിരക്ക് 6.5-7 ശതമാനത്തിനിടയില്‍ തന്നെ നില്‍ക്കും. ധനക്കമ്മി മൊത്തം ആഭ്യന്തര ഉത്പാദനത്തിന്റെ 5.6 ശതമാനമായിരിക്കും.

എട്ട് ശതമാനം വളര്‍ച്ചാ നിരക്കാണ് ലക്ഷ്യം വയ്ക്കുന്നത്. വ്യാപാര കമ്മി കുറയാനും സാധ്യതയുണ്ടെന്ന് റിപ്പോര്‍ട്ടില്‍ പറയുന്നു.