Administrator
Administrator
പിണറായി വീണ്ടും സെക്രട്ടറി
Administrator
Friday 10th February 2012 12:14pm

pinarayi-vijayanതിരുവനന്തപുരം: സി.പി.ഐ.എം സംസ്ഥാന സെക്രട്ടറിയായി പിണറായി വിജയനെ വീണ്ടും തിരഞ്ഞെടുത്തു. നാലാം തവണയാണ് പിണറായി വീണ്ടും സെക്രട്ടറിയായി തിരഞ്ഞെടുക്കപ്പെടുന്നത്. 12 പേര്‍ പുതുതായി സംസ്ഥാന കമ്മിറ്റിയിലേക്ക്‌ വരും. 1998ല്‍ ചടയന്‍ ഗോവിന്ദന്റെ മരണത്തെ തുടര്‍ന്ന് സംസ്ഥാന സെക്രട്ടറിയായി തിരഞ്ഞെടുക്കപ്പെട്ട പിണറായി വിജയന്‍ പിന്നീട് കണ്ണൂര്‍, മലപ്പുറം, കോട്ടയം സമ്മേളനങ്ങളിലും ഇപ്പോള്‍ തിരുവനന്തപുരം സമ്മേളനത്തിലും സെക്രട്ടറിയായി തിരഞ്ഞെടുക്കപ്പെടുകയായിരുന്നു.

പാര്‍ട്ടിയില്‍ വിമത ശബ്ദമുയര്‍ത്തിയ വി.എസ് അച്ച്യുതാനന്ദന്റെ ഭീഷണി പൂര്‍ണ്ണമായി ഇല്ലാതാക്കിയാണ് പിണറായി വീണ്ടും സെക്രട്ടറിയായി തിരഞ്ഞെടുക്കപ്പെട്ടത്. മലപ്പുറം ജില്ലാ സമ്മേളനത്തില്‍ ശക്തമായ പോരാട്ടം നടത്തിയ വി.എസിന് കോട്ടയം സമ്മേളനത്തിലെത്തിയപ്പോഴേക്കും ശക്തമായ തിരിച്ചടി നല്‍കാന്‍ പിണറായിക്ക് കഴിഞ്ഞു. കോട്ടയത്തിന് ശേഷവും പ്രതിരോധ മതില്‍ ഉയര്‍ത്തിയ വി.എസിന്റെ മൃതപ്രായ രൂപമാണ് തിരുവനന്തപുരത്ത് കണ്ടത്. സമ്മേളനത്തില്‍ വി.എസിനെ പൂര്‍ണ്ണമായി ഇല്ലാതാക്കാനാണ് പിണറായിയുടെ നേതൃത്വത്തിലുള്ള സംസ്ഥാന നേതൃത്വം ആഗ്രഹിച്ചതെങ്കിലും പി.ബിയുടെ ഇടപെടലിനെത്തുടര്‍ന്ന് വി.എസിനെക്കൂടി ഉള്‍ക്കൊണ്ട് മുന്നോട്ട് പോകാന്‍ തീരുമാനിക്കുകയായിരുന്നു.

കേരളത്തിലെ ഇടതുപക്ഷ വിദ്യാര്‍ത്ഥി യുവജന സംഘടനാ പ്രവര്‍ത്തനത്തിലൂടെ രാഷ്ട്രീയ നേതൃനിരയിലെത്തിയ വിജയന്‍ സി.പി.ഐ.എം പോളിറ്റ് ബ്യൂറോ അംഗം കൂടിയാണ്. 1970ല്‍ 26ാം വയസ്സില്‍ കൂത്തുപറമ്പ് മണ്ഡലത്തെ പ്രതിനിധീകരിച്ച് കേരള നിയമസഭയില്‍ അംഗമായി. 1977ലും 1991ലും കൂത്തുപറമ്പ് മണ്ഡലത്തില്‍ നിന്നും 1996ല്‍ പയ്യന്നൂരില്‍ നിന്നും നിയമസഭയിലേക്ക് തെരഞ്ഞെടുക്കപ്പെട്ടു. 1996 മുതല്‍ 1998 വരെ ഇ.കെ നായനാര്‍ മന്ത്രിസഭയില്‍ വിദ്യുച്ഛക്തി-സഹകരണ വകുപ്പുകള്‍ കൈകാര്യം ചെയ്തു.

സി.പി.ഐ.എം കണ്ണൂര്‍ ജില്ലാ സെക്രട്ടറിയായും, സംസ്ഥാന സെക്രട്ടറിയേറ്റു് അംഗമായും പ്രപര്‍ത്തിച്ചിട്ടുണ്ട്. 1998 മുതല്‍ സി.പി.ഐ.എം സംസ്ഥാന സെക്രട്ടറിയാണ്. കേരള സംസ്ഥാന സഹകരണ ബാങ്കിന്റെ പ്രസിഡന്റായും പ്രവര്‍ത്തിച്ചിട്ടുണ്ട്.

കണ്ണൂര്‍ ജില്ലയിലെ പിണറായിയില്‍ തെങ്ങു ചെത്തുതൊഴിലാളിയായ മുണ്ടയില്‍ കോരന്റെയും കല്യാണിയുടെയും ഇളയമകന്‍ വിജയന്‍ 1944 മാര്‍ച്ച് 21ന് ജനിച്ചു.തലശ്ശേരി സെന്റ് ജോസഫ്‌സ് സ്‌കൂള്‍ അദ്ധ്യാപിക ഒഞ്ചിയം കണ്ണൂക്കര സ്വദേശിനി ടി കമലയാണ് ഭാര്യ. വിവേക് കിരണ്‍, വീണ എന്നിവര്‍ മക്കള്‍. കുമാരന്‍, നാണു എന്നിവര്‍ സഹോദരങ്ങള്‍.

സി.ബി.ഐ അന്വേഷിക്കുന്ന എസ്.എന്‍.സി ലാവലിന്‍ കേസില്‍ ഒമ്പതാം പ്രതിയായ പിണറായി വിജയന്റെ രാഷ്ട്രീയ ഭാവിയില്‍ ഏറെ ഇരുള്‍ വീഴ്ത്തിയതും ഈ സംഭവമായിരുന്നു. പാര്‍ട്ടിയില്‍ നടക്കുന്ന വലതുപക്ഷ വ്യതിയാന ചിന്തയുടെ ചുക്കാന്‍ പിടിക്കുന്നത് പിണറായി വിജയനാണെന്ന ആക്ഷേപമുയര്‍ന്നു. പാര്‍ട്ടികകത്തും പുറത്തു നിന്നുമുയര്‍ന്ന ശക്തമായ എതിര്‍പ്പുകളെ വെട്ടി നിരത്തിയാണ് പിണറായി വീണ്ടും പാര്‍ട്ടി സെക്രട്ടറിയായി തിരഞ്ഞെടുക്കപ്പെട്ടിരിക്കുന്നത്.

Malayalam news

Kerala news in English

Advertisement