Administrator
Administrator
വി.എസിനെതിരെയുള്ള ‘ കുറ്റപത്രം’ പി.ബി മരവിപ്പിച്ചു
Administrator
Thursday 9th February 2012 7:35pm

vs-achuthanandanതിരുവനന്തപുരം: സി.പി.ഐ.എം സംസ്ഥാന സമ്മേളന പ്രവര്‍ത്തന റിപ്പോര്‍ട്ടില്‍ വി.എസ് അച്ച്യുതാനന്ദനെതിരെയുള്ള ഭാഗം പി.ബി മരവിപ്പിച്ചു. വി.എസിനെതിരെ രൂക്ഷ വിമര്‍ശനമുള്ള ഭാഗമാണ് മരവിപ്പിച്ചത്. ചര്‍ച്ചയ്ക്കുള്ള മറുപടി പ്രസംഗത്തില്‍ ജനറല്‍ സെക്രട്ടറി പ്രകാശ് കാരാട്ടാണ് റിപ്പോര്‍ട്ടിലെ ഭാഗം മരവിപ്പിച്ചതായി വ്യക്തമാക്കിയത്. പാര്‍ട്ടി കോണ്‍ഗ്രസ്സിന് മുമ്പെ പി.ബിയും കേന്ദ്ര കമ്മിറ്റിയും ചേരുമെന്നും ഇക്കാര്യം ചര്‍ച്ച ചെയ്യുമെന്നും കാരാട്ട് വ്യക്തമാക്കി. സി.പി.ഐ.എം സംഘടനാ ചരിത്രത്തില്‍ അപൂര്‍വ്വമായ നടപടിയാണ് പ്രവര്‍ത്തന റിപ്പോര്‍ട്ട് മരവിപ്പിക്കല്‍.

പ്രവര്‍ത്തന റിപ്പോര്‍ട്ടിലെ തനിക്കെതിരെയുള്ള പരാമര്‍ശങ്ങളിലും ചര്‍ച്ചകളിലുയര്‍ന്ന വിമര്‍ശനങ്ങളിലും മറുപടി പറയണമെന്നാവശ്യപ്പെട്ട് വി.എസ് നേരത്തെ പി.ബിക്ക് പരാതി നല്‍കിയിരുന്നു. തനിക്കെതിരെ ഉയര്‍ന്ന ആരോപണങ്ങളെല്ലാം നിഷേധിച്ചുകൊണ്ടാണ് വി.എസ് പി.ബിക്ക് പരാതി നല്‍കിയത്. റിപ്പോര്‍ട്ടിലെ ഏകപക്ഷീയ പരാമര്‍ശങ്ങള്‍ പാര്‍ട്ടി അണികളിലും പ്രവര്‍ത്തകരിലും തന്നെക്കുറിച്ച് തെറ്റിദ്ധാരണയ്ക്ക് ഇടയാക്കുമെന്നും അതിനാല്‍ തനിക്ക് വിശദീകരണത്തിന് അവസരം നല്‍കണമെന്നും പരാതിയില്‍ വി.എസ്. ആവശ്യപ്പെടുന്നു.

പ്രതിനിധികള്‍ ഒറ്റക്കെട്ടായി തനിക്കെതിരെ ആക്രമണം നടത്തുകയാണെന്നും ഇതില്‍ തനിക്ക് വിശദീകരണത്തിന് അവസരം നല്‍കണമെന്നും വി.എസ് ആവശ്യപ്പെട്ടു. 2006ലെയും 2011ലെയും നിയമസഭാ തിരഞ്ഞെടുപ്പിന് ശേഷം നടന്ന റിവ്യൂവില്‍ തന്റെ സ്ഥാനാര്‍ത്ഥിത്വത്തെക്കുറിച്ച് നിലപാട് വ്യക്തമാക്കിയതാണ്. ലോക്‌സഭാ തിരഞ്ഞെടുപ്പില്‍ ജനതാദളിനെ പിണക്കിയതും പി.ഡി.പിയെ ഒപ്പം കൂട്ടിയതുമാണ് തിരിച്ചടിക്ക് കാരണമാക്കിയതെന്ന് പാര്‍ട്ടി തന്നെ വിലയിരുത്തിയതാണ്. ലാവലിന്‍ വിഷയത്തില്‍ അഴിമതിക്കെതിരെയാണ് താന്‍ എപ്പോഴും നിലപാടെടുത്തിട്ടുള്ളതെന്നും തനിക്കെതിരെ അഴിമതി ആരോപണം ഉയര്‍ന്നപ്പോള്‍ രാജിക്ക് സന്നദ്ധനായിട്ടുണ്ടെന്നും വി.എസ് പി.ബിയെ അറിയിച്ചിരുന്നു.

വി.എസിന്റെ പരാതി അവയ്‌ലബിള്‍ പി.ബി ചേര്‍ന്ന് ചര്‍ച്ച ചെയ്യുകയായിരുന്നു. സീതാറാം യെച്ചൂരിയും വൃന്ദ കാരാട്ടും വി.എസിന് അനുകൂല തീരുമാനമെടുത്തു. റിപ്പോര്‍ട്ടിന്റെ മരവിപ്പിച്ച ഭാഗം പി.ബിയും കേന്ദ്ര കമ്മിറ്റിയും ചര്‍ച്ച ചെയ്യും. എന്നാല്‍, പി.ബിയുടേത് അസാധാണ നടപടിയാണെന്ന് ചൂണ്ടിക്കാട്ടിയ സംസ്ഥാന നേതാക്കള്‍ അതൃപ്തി പ്രകടിപ്പിച്ചു എന്നാണ് റിപ്പോര്‍ട്ടുകള്‍.

Malayalam news

Kerala news in English

Advertisement