എഡിറ്റര്‍
എഡിറ്റര്‍
എം.എല്‍.എമാരെ ആദ്യം ജനങ്ങള്‍ കാണട്ടെ; അവരിലൂടെ സഭയിലെത്തേണ്ടത് ജനങ്ങളുടെ ശബ്ദം: പനീര്‍ശെല്‍വം
എഡിറ്റര്‍
Saturday 18th February 2017 1:23pm

ചെന്നൈ: തമിഴ്‌നാട് നിയമസഭയില്‍ വിശ്വാസവോട്ട് തേടാന്‍ എന്തിനാണ് സ്പീക്കര്‍ ഇത്ര തിടുക്കം കാട്ടുന്നതെന്നും എം.എല്‍.എമാരെ ആദ്യം ജനങ്ങള്‍ കാണട്ടെയെന്നും ഒ. പനീര്‍ശെല്‍വം. എം.എല്‍.എമാരിലൂടെ സഭയിലെത്തേണ്ടത് ജനങ്ങളുടെ ശബ്ദമാണെന്നും പനീര്‍ശെല്‍വം പ്രതികരിച്ചു.

എം.എല്‍.എമാര്‍ അവരുടെ മണ്ഡലങ്ങളില്‍ചെന്ന് ജനങ്ങളുമായി സംസാരിക്കണമെന്നും അതിനുശേഷം മാത്രമേ വോട്ടെടുപ്പു നടത്താവൂ എന്നും പനീര്‍സെല്‍വം ആവശ്യപ്പെട്ടു.

ജനങ്ങളുടെ നിലപാട് മനസിലാക്കാന്‍ എം.എല്‍.എമാര്‍ക്ക് അവസരം നല്‍കണം. അതിനുശേഷമേ വോട്ടെടുപ്പു നടത്താവൂ എന്നും പനീര്‍സെല്‍വം നിര്‍ദേശിച്ചു.

വോട്ടെടുപ്പു തീര്‍ക്കാന്‍ എന്താണിത്ര തിടുക്കമെന്ന് എം.കെ സ്റ്റാലിനും ചോദിച്ചു. ജനാധിപത്യം സംരക്ഷിക്കപ്പെട്ടേ തീരൂ. ഭൂരിപക്ഷം തെളിയിക്കാന്‍ പളനിസാമി സര്‍ക്കാരിന് ഗവര്‍ണര്‍ 15 ദിവസത്തെ സമയം അനുവദിച്ചതും അദ്ദേഹം ചൂണ്ടിക്കാട്ടി.

എന്നാല്‍, വോട്ടെടുപ്പ് നീട്ടിവയ്ക്കണമെന്ന ഇരുവരുടെയും ആവശ്യം സ്പീക്കര്‍ തള്ളി. ഇതോടെ സഭ വീണ്ടും ബഹളത്തില്‍ മുങ്ങുകയായിരുന്നു.


Also Read തമിഴ്‌നാട് നിയമസഭയില്‍ സംഘര്‍ഷം; സ്പീക്കറുടെ മേശ തകര്‍ത്തു; മുഖത്തേക്ക് പേപ്പര്‍ കീറിയെറിഞ്ഞു; സഭ നിര്‍ത്തി


രഹസ്യബാലറ്റ് ആവശ്യപ്പെട്ടാണ് ഡി.എം.കെയും പനീര്‍ശെല്‍വം പക്ഷവും രംഗത്തെത്തിയത്. രഹസ്യബാലറ്റിനായി ഡി.എം.കെ അംഗങ്ങള്‍ ആവശ്യപ്പെട്ടെങ്കിലും സ്പീക്കര്‍ അത് നിഷേധിക്കുകയായിരുന്നു. ഇതാണ് പ്രതിപക്ഷത്തെ പ്രകോപിച്ചത്.

വോട്ടെടുപ്പു നീട്ടിവയ്ക്കുക അല്ലെങ്കില്‍ രഹസ്യവോട്ടെടുപ്പിന് അനുമതി നല്‍കുക എന്നീ ആവശ്യങ്ങളുമായാണ് പ്രതിപക്ഷത്തിന്റെയും പനീര്‍സെല്‍വം വിഭാഗത്തിന്റെയും പ്രതിഷേധം.

പ്രതിപക്ഷ പാര്‍ട്ടികളായ ഡിഎംകെ, കോണ്‍ഗ്രസ്, മുസ്‌ലിം ലീഗ് എന്നിവരും പനീര്‍സെല്‍വം വിഭാഗവും രഹസ്യവോട്ടെടുപ്പ് എന്ന ആവശ്യം ഉയര്‍ത്തിയിട്ടുണ്ട്. രണ്ട് ആവശ്യങ്ങളും സ്പീക്കര്‍ തള്ളിക്കളഞ്ഞു. സഭാനടപടികളെക്കുറിച്ച് ഭരണപക്ഷവും പ്രതിപക്ഷവും തന്നെ പഠിപ്പിക്കേണ്ടതില്ലെന്നും എന്തുചെയ്യണമെന്ന് തനിക്കറിയാമെന്നും സ്പീക്കര്‍ പി.ധനപാല്‍ നിലപാടെടുക്കുകയായിരുന്നു.

Advertisement