Categories
boby-chemmannur  
EBS

മനോരമയും പി.രാജീവും ഫണ്ടിംഗ് വിവാദത്തിലെ കാണാപ്പുറവും


ഹരീഷ് വാസുദേവന്‍

പി.രാജീവ് എം.പിക്ക് പാര്‍ലമെന്ററി പ്രവര്‍ത്തനത്തിന് അമേരിക്കന്‍ ഫൌണ്ടേഷന്റെ സഹായം ലഭിക്കുന്നുവെന്ന മട്ടില്‍ മനോരമ ചാനല്‍ ഒരു വാര്‍ത്ത പുറത്തുവിട്ടു. അതിനു പി.രാജീവ് ഫെയ്‌സ് ബുക്കില്‍ ഇങ്ങനെ മറുപടി പറഞ്ഞു

‘Manorama channel published a bogus story regarding my parliamentary work. They have reported that my parliamentary works are supported by US. Totally basless and an example of stupid journalism. MPs are selected by Constitution Club of India for getting assistance. Constitution club is a club of MPs and former MPs which was started in 1947. Speaker is the chairperson and Hannanmulla cpim. Cetnral secretariat member is thet reasurer. The assistants are giving the information as directed by the MPs. Everybody can check the official website of Rajyasabha and find out all the questions raised by myself and the debates and can decide whose itnrest aret rying to protect.’

തൊട്ടു പിന്നാലെ ഇങ്ങനെയും പി.രാജീവ് വിശദീകരിച്ചു.

‘PRS is an organisation associated with constitution club for this programme. They are giving bill summery to all MPs. They have conductedt raining program for MLAs from all states including Kerala in association with IIM ‘

മനോരമയ്ക്ക് ഫോര്‍ഡ് ഫൌണ്ടേഷന്‍ എന്ന അമേരിക്കന്‍ ഫണ്ടിംഗ് ഏജന്‍സിയുടെ സഹായത്തോടെ പ്രവര്‍ത്തിക്കുന്ന PRS എന്ന NGO ആണ് ചര്‍ച്ചാവിഷയം. ഫോര്‍ഡ് ഫൌണ്ടേഷനെ കൂടാതെ ഗൂഗിള്‍ കൊര്‍പ്പറെഷനും PRS ന്റെ ഫണ്ടിംഗ് സഹായിയാണ്. എം.പിമാര്‍ക്ക് ഗവേഷണത്തിനായി PRS സഹായിക്കുന്നു എന്നത് ഒരു പുതിയ വാര്‍ത്തയല്ല. വര്‍ഷങ്ങളായി അവരുടെ ഫെല്ലോഷിപ്പ് അറിയിപ്പുകള്‍ മലയാള പത്രങ്ങളില്‍ അടക്കം പ്രസിദ്ധീകരിച്ചിട്ടുണ്ട്. അത് മനോരമയ്ക്കറിയാത്തതല്ല. പിന്നെങ്ങിനെ ഇതിപ്പോള്‍ സ്‌കൂപ്പ് വാര്‍ത്തയായി? വിദേശഫണ്ട്, അമേരിക്ക, സി.പി.ഐ.എം എന്നീ ടാഗ് വാക്കുകള്‍ ചേര്‍ത്താല്‍ വിളമ്പാവുന്ന നല്ലൊരു മസാല വാര്‍ത്തയാണ് ഇതെന്ന് മനോരമ തിരിച്ചറിഞ്ഞു. മനോരമ ഈ വാര്‍ത്ത ഉപയോഗിച്ച രീതി പതിവുപോലെ തരം താണത് ആയിപ്പോയി. വിദേശ ഫണ്ട്- സി.പി.ഐ.എം എന്ന സ്ഥിരം ദ്വന്ത്വ സമവാക്യത്തിലാണ് അവരിതിനെ എത്തിച്ചത്. അതിനാല്‍ത്തന്നെ ഈ വാര്‍ത്തയില്‍ മനോരമയും, മറുപടിയില്‍ രാജീവും കാണാതെ പോയ ചിലതുണ്ട്. അത് ഇന്ത്യന്‍ ജനാധിപത്യത്തെ മൊത്തത്തില്‍ ബാധിക്കുന്നത് ആകയാല്‍ അതെപ്പറ്റി ചിലത് ‘പറയാതെ വയ്യ’.

ഫോര്‍ഡ് ഫൌണ്ടേഷന്‍ എന്ന വിദേശ ഫണ്ടിംഗ് ഏജന്‍സി സ്ഥാപിച്ച PRS എന്ന NGO, ലോക്‌സഭാ സ്പീക്കര്‍ അധ്യക്ഷയായ കോണ്‍സ്റ്റിട്യൂഷന്‍ ക്ലബുമായി സഹകരിച്ച് എം.പിമാര്‍ക്ക് നല്‍കുന്ന സഹായങ്ങള്‍ എന്തൊക്കെയാണ് എന്ന് നോക്കാം.[1] നിയമങ്ങളുടെ ചുരുക്കം തയ്യാറാക്കി അയക്കുക, എം.പി മാര്‍ ആവശ്യപ്പെട്ടാല്‍ നേരിട്ട് കണ്ട് നിയമത്തിലും പുറത്തുമുള്ള വിഷയങ്ങളില്‍ ഉപദേശം നല്‍കുക,  നിയമനിര്‍മ്മാണ സഭകളില്‍ ഉള്ള ബില്ലുകളുടെ ചുരുക്കം തയ്യാറാക്കുക, പാര്‍ലമെന്റ് സ്റ്റാന്‍ഡിംഗ് കമ്മറ്റികളുടെയും സ്വതന്ത്ര കമ്മീഷനുകളുടെയും റിപ്പോര്‍ട്ടുകളുടെ ചുരുക്കം തയ്യാറാക്കി നല്‍കുക,  രാജ്യത്തെ പ്രധാനപ്പെട്ട നയങ്ങള്‍ സംബന്ധിച്ച കുറിപ്പുകള്‍ നല്‍കുക, തുടങ്ങിയ ജോലികളാണ് SPR ഫെല്ലോകള്‍ എം.പിമാര്‍ക്കായി ചെയ്യുന്നത്.

ഈ വിഷയവുമായി ബന്ധപ്പെട്ട ചില ചോദ്യങ്ങള്‍ വളരെ പ്രസക്തമാണെന്നു തോന്നുന്നു

1.നമ്മുടെ നയരൂപീകരണ, നിയമനിര്‍മ്മാണ പ്രക്രിയയില്‍ ഫോര്‍ഡ് ഫൌണ്ടേഷന്‍ നെപ്പോലെയുള്ള  കുപ്രസിദ്ധി ചരിത്രമുള്ള ഫണ്ടിംഗ് സംഘടനകള്‍ ഇടപെടുന്നത് എത്രത്തോളം ശരിയാണ്?

2.  പ്രതിമാസം ഭീമമായ പണവും എല്ലാ സൗകര്യങ്ങളും വാങ്ങി ജനസേവനത്തിന് ഇറങ്ങുന്ന എം.പി.മാര്‍ നിയമങ്ങളും റിപ്പോര്‍ട്ടുകളും പഠിക്കാന്‍ മിനക്കെടാതെ എന്‍.ജി.ഓ പ്രവര്‍ത്തകര്‍ ചവച്ചു തുപ്പുന്ന കുറിപ്പുകളെ ആശ്രയിച്ചു  മുന്നോട്ടു പോകുന്നത് പാര്‍ലമെന്റ് പ്രവര്‍ത്തനത്തിന് എത്രത്തോളം ആശാസ്യമാണ്?

3. ഇനി അഥവാ എം.പി മാര്‍ക്ക് ഇത്തരം കാര്യങ്ങള്‍ക്ക് സഹായി ആവശ്യമാണെങ്കില്‍ തന്നെ അതിനുള്ള സംവിധാനം പാര്‌ലമെന്റിനോ എം.പി.ക്ക് തന്നെയോ ഒരുക്കാവുന്നതല്ലേ ഉള്ളൂ.. അതിനായി പുറംകരാര്‍ ഫെല്ലോകളെ ആശ്രയിക്കേണ്ട കാര്യമുണ്ടോ?

പി.ആര്‍.എസ് നല്‍കുന്ന 18000 രൂപ പ്രതിമാസം ഫെല്ലോഷിപ്പ് പറ്റി ജനാധിപത്യത്തില്‍ ഗവേഷണം നടത്തുന്ന യുവാക്കള്‍ക്ക് ഫോര്‍ഡ് ഫൌണ്ടേഷന്റെ കൃത്യമായ അജണ്ടകള്‍ നടപ്പാക്കേണ്ടി വരും. അവരത് ഭംഗിയായി ചെയ്യുന്നുമുണ്ടാകും. എന്തായിരിക്കും ഫോര്‍ഡ് ഫൌണ്ടേഷന്റെ അജണ്ട? അമേരിക്കയ്ക്ക് വലിയതോതില്‍ നെല്‍കൃഷിയില്ല.. അരി അവരുടെ പ്രധാന ഭക്ഷണവുമല്ല. എന്നിട്ടും പണ്ട് അന്താരാഷ്ട്ര നെല്ല് ഗവേഷണ കേന്ദ്രം മനിലയില്‍ തുടങ്ങാന്‍ പണം കൊടുത്ത് ഇന്ത്യയിലെ കൃഷിശാസ്ത്രജ്ഞന്മാരില്‍ നേതൃനിരയില്‍ ഉണ്ടായിരുന്ന സ്വാമിനാഥന്‍ വഴി  ഒരുലക്ഷതില്‍പ്പരം നെല്‍വിത്ത് ശേഖരം മനിലയിലേക്ക് കടത്തുന്നതില്‍ വിജയിച്ച അതെ ഫോര്‍ഡ് ഫൌണ്ടേഷന്‍ ആണ് ഇതിന്റെയും പിന്നില്‍.

ഫോര്‍ഡ് ഫൌണ്ടേഷന്‍ പോലുള്ള അമേരിക്കന്‍ സംഘടകള്‍ അന്താരാഷ്ട്ര തലത്തില്‍ കൊടുത്ത ധനസഹായങ്ങളില്‍ പകുതിയും സി.ഐ.എ എന്ന ചാരസംഘടനയാണ് നല്‍കിയതെന്ന് 1976 ല്‍ അമേരിക്കയില്‍ നടന്ന അന്വേഷണം പറയുന്നു.[2] ആ ബന്ധം ഇപ്പോഴും തുടരുന്നുണ്ടോ എന്നെ അറിയേണ്ടതുള്ളൂ.. രാജ്യങ്ങളെയും വ്യക്തികളെയും പണംകൊടുത്തു വശത്താക്കി തങ്ങളുടെ ആഗോളസാമ്പത്തിക അജണ്ടകള്‍ നടപ്പാക്കുകയെന്ന ദൗത്യമാണ് ചാരിറ്റിയുടെ പേരില്‍ അവര്‍ നടത്തുന്നത്. ആദ്യകാലങ്ങളില്‍ ഇവരുടെ സര്‍ക്കാര്‍തല ഇടപെടല്‍ രഹസ്യമായിരുന്നുവെങ്കില്‍ ഇന്നത് പരസ്യമായി ആണ്.

ഒരു കോടി രൂപയ്ക്ക് ഇന്ത്യന്‍ ജനാധിപത്യം വില്‍പ്പനയ്ക്ക് !!

നിയമം ഉണ്ടാക്കുന്നത് ആരാണ്? പാര്‍ലമെന്റിലെ അംഗങ്ങള്‍ ആണെന്നാണ് വെയ്പ്പ്. അവര്‍ക്ക് ആരാണ് നിയമങ്ങളെപ്പറ്റി വിവരം നല്‍കുന്നത്? എത്ര അംഗങ്ങള്‍ക്കാണ് നിയമങ്ങള്‍ അറിയുക?  എത്ര പേര്‍ക്ക് ഗഹനമായ വിഷയങ്ങളില്‍ പഠിക്കാനുള്ള പ്രാപ്തിയുണ്ട്? എന്തിനേറെ എത്ര എം.പി മാര്‍ക്ക് അക്ഷരാഭ്യാസമുണ്ടാവുമോ ആവോ!! അപ്പോള്‍ ഇവര്‍ക്ക് വേണ്ടി ഈ പണി ഏറ്റെടുക്കാന്‍ ചിലര്‍ മുന്നോട്ടു വരുന്നു. അങ്ങനെ ഇന്ത്യയില്‍ പ്രവര്‍ത്തിക്കുന്ന ഏക NGO യാണ് PRS.

നാട്ടിലെ ഉദ്ഘാടനങ്ങളും സമ്മേളനങ്ങളും കഴിഞ്ഞു ഓരോ പാര്‍ലമെന്റ് സമ്മേളനവും തുടങ്ങുന്നതിനു തൊട്ടുമുന്‍പ് ഡല്‍ഹിയില്‍ പറന്നെത്തുന്ന പല എം.പി മാരും നയച്ചര്‍ച്ചകളില്‍ നെടുനെടുങ്കന്‍ പ്രസംഗങ്ങള്‍ നടത്തുന്നതിന്റെ പിന്നില്‍ PRS ന്റെ ‘കിടാങ്ങ’ളുടെ തലച്ചോറാണ്. PRS ന്റെ ഫെല്ലോഷിപ്പ് വാങ്ങുന്നവര്‍ നല്‍കുന്ന ചുരുക്കെഴുത്തുകള്‍ ആണ് എം.പി മാര്‍ വിലയിരുത്തുന്നതും അതിന്മേല്‍ നയങ്ങള്‍ രൂപീകരിക്കുന്നതും. നിയമനിര്‍മ്മാണം പോലെ ഓരോ വാക്കും സശ്രദ്ധം സസൂക്ഷ്മം സഗൌരവം  ചെയ്യേണ്ട പ്രവര്‍ത്തികളില്‍ നിയമത്തിന്റെ കണ്ണില്‍ ‘പബ്ലിക് അക്കൌണ്ടബിലിറ്റി’  ഇല്ലാത്തവര്‍ നല്‍കുന്ന വിവരങ്ങളെ ആശ്രയിക്കുന്നത് ഗുരുതരമായ വീഴ്ചയാണ്. അതിനോടൊപ്പം, സംശയാസ്പദമായ ചരിത്രമുള്ളരുടെ കൈകളില്‍ ഈ പണി എത്തുന്നു എന്നത് വീഴ്ചയുടെ ഗൌരവം വര്‍ധിപ്പിക്കുന്നു.

ഇന്ത്യന്‍ പാര്‍ലമെന്റില്‍ നിയമം ഉണ്ടാക്കുന്നവരെ നിയമം പഠിപ്പിക്കുന്നത് അമേരിക്കന്‍ സംഘടനയുടെ ചെലവില്‍ നിയമിക്കപ്പെട്ടവരാണെന്ന വാര്‍ത്ത അന്താരാഷ്ട്ര തലത്തില്‍ ഇന്ത്യക്ക് എത്രമാത്രം അപമാനമാണെന്ന് ഓര്‍ക്കുക.

ലോകസഭയുടെ നിയമനിര്‍മ്മാണ അധികാരങ്ങളില്‍ കൈകടത്തുന്നു എന്നതായിരുന്നു ലോക്പാല്‍ സമരം നടക്കുമ്പോള്‍ ബദല്‍ ബില്ല് മുന്നോട്ടുവെച്ച അണ്ണാ ഹസാരെക്കെതിരായി ഇടതും വലതും പാര്‍ട്ടികള്‍ ഉന്നയിച്ച പ്രധാന ആക്ഷേപം. അങ്ങനെ സംരക്ഷിക്കുന്ന ലോക്‌സഭയുടെ അധികാരങ്ങള്‍ എം.പി മാര്‍ എങ്ങനെയാണ് കാത്തുസൂക്ഷിക്കുന്നത് എന്ന് ഇപ്പോള്‍ മനസിലായല്ലോ. നേരിട്ടല്ലാതെ ഈ ‘ഇടപെടല്‍ സ്വാതന്ത്ര്യം’ ആര്‍ക്കാണ് നല്‍കുന്നതെന്ന് വ്യക്തം.

PRS  ന്റെ ലാമ്പ് ഫെല്ലോഷിപ്പ് ലഭിക്കുന്ന ചെറുപ്പക്കാരാണ് എം.പി മാര്‍ക്ക് വേണ്ടി ഈ പണി ചെയ്യുന്നത്. അവര്‍ക്ക് പ്രതിവര്‍ഷം ഇതിനായി ലഭിക്കുന്ന ഫെല്ലോഷിപ്പ് തുക 2,16,000 രൂപയാണ്. 2010-11 വര്‍ഷത്തില്‍ 12 പേരും 2011-12 വര്‍ഷത്തില്‍ 46 പേരുമാണ് ലാമ്പ് ഫെല്ലോഷിപ്പ് നേടി ഈ ജോലി ചെയ്തത്. ആകെ ഈ വര്‍ഷം PRS ചെലവിട്ട ഫണ്ട് ഒരു കോടിയോളം രൂപയാണ്. ഇത് ഇന്ത്യന്‍ ജനാധിപത്യത്തെ ശക്തിപ്പെടുത്താനുള്ള അദമ്യമായ ആഗ്രഹമാണ് എന്ന്  വിശ്വസിക്കാന്‍ സാമാന്യബുദ്ധി അനുവദിക്കുന്നില്ല.

ഓരോ എം.പി ക്കും നാലു പേരെ സഹായത്തിനു നിയമിക്കാന്‍ സര്‍ക്കാര്‍ പണം ചെലവിടുന്നുണ്ട് എന്ന് പി.രാജീവ് തന്നെ ചാനല്‍ ചര്‍ച്ചകളില്‍ പറയുന്നതുകേട്ടു.. ഇത് കൂടാതെ എം.പിമാര്‍ക്ക് ഭീമമായ മറ്റു ഫണ്ടുകളും ഉണ്ട്. ഒരുവര്‍ഷം ഇരുനൂറു കോടിയോളം രൂപയാണ് എം.പിമാരുടെ ശമ്പള അലവന്‍സ് ഇനത്തില്‍ സര്‍ക്കാര്‍ ചെലവിടുന്നത്. ഈ തുകയുടെ കൂടെ ഒരു കോടി രൂപ കൂടി ചെലവിട്ടാല്‍ ഈ മിടുക്കരായ ഗവേഷകരെ ഫെല്ലോഷിപ്പ് നല്‍കി പാര്‍ലമെന്റിന് കീഴില്‍ ഗവേഷകരായി നിയമിക്കാനാകും. എന്നിട്ടാണോ സര്‍ക്കാരും എംപിമാരും ഇപ്പോഴും അറിഞ്ഞുകൊണ്ട് വിദേശപണം വാങ്ങി പ്രവര്‍ത്തിക്കുന്ന എന്‍.ജി.ഒ കള്‍ക്ക് മുന്നില്‍ തങ്ങളുടെ ജനാധിപത്യപരമായ കര്‍ത്തവ്യങ്ങള്‍ അടിയറ വെക്കുന്നത്?? അപ്പോള്‍ പ്രശ്‌നം പണമല്ല എന്ന് മനസിലാക്കാം.

പി.രാജീവ് എം.പി ക്ക് ലഭിച്ചത് പോലെ ജോസ് കെ.മാണിക്കും വിദേശഫണ്ട് സംഘടനയുടെ ഗവേഷണസഹായം കിട്ടിയെന്ന സ്ഥിരം ഇടതുവലതു തുല്യതാന്യായം പറഞ്ഞു തടിതപ്പാന്‍ പി.രാജീവിനോ സി.പി.എം  എം.പിമാര്‍ക്കോ ആവില്ല. കാരണം,  അവര്‍ക്കാര്‍ക്കും ഇല്ലാത്ത ചിലതുണ്ട് ഇടതു എം.പി.മാര്‍ക്ക്;  ഇടതുജാഗ്രത, രാഷ്ട്രീയപാഠം. ഓരോ പാര്‍ട്ടി കോണ്‍ഗ്രസിലും അടിത്തട്ടു മുതല്‍ ചര്‍ച്ച ചെയ്തുണ്ടാക്കുന്ന നയരേഖകളും സമീപന രേഖകളും ഈ ജാഗ്രതക്കായി നിങ്ങളെ ഓര്‍മ്മപ്പെടുത്തുന്നുണ്ട്.

വിദേശഫണ്ട് വാങ്ങുന്ന എന്‍.ജി ഒ കളോടുള്ള സമീപനം എങ്ങനെയാകണമെന്നു അത് കൃത്യമായി പറയുന്നുണ്ട്. ആരാണ് ഫോര്‍ഡ് ഫൌണ്ടേഷന്‍ എന്നും എന്താണ് അവര്‍ ചെയ്തതെന്നുമുള്ള രാഷ്ട്രീയ പാഠം സി.പി.ഐ.എമ്മിനുണ്ട്. അതെല്ലാം മറന്ന് പെരുമാറിയതിനു പക്ഷെ, മനോരമയോടല്ല പാര്‍ട്ടി അണികളോട് മാത്രം രാജീവ് മറുപടി പറഞ്ഞാല്‍ മതിയാകും. എന്നാല്‍ എം.പി.മാരെ, ജനാധിപത്യം മുപ്പതു വെള്ളിക്കാശിനു ഒറ്റിക്കൊടുക്കുന്നതിന് ജനങ്ങളോട് ഇതിനെല്ലാം നിങ്ങള്‍ മറുപടി പറഞ്ഞെ മതിയാകൂ.

http://www.ratical.org/ratville/CAH/FordFandCIA.html

http://www.prsindia.org/aboutus/products-services/

Malayalam news

Kerala news in English

6 Responses to “മനോരമയും പി.രാജീവും ഫണ്ടിംഗ് വിവാദത്തിലെ കാണാപ്പുറവും”

  1. MANJU MANOJ.

    ഹരിഷ് വാസുദേവന്‍‌,

    ഒരു രൂപ കട്ടാലും,
    ഒരു കോടി കട്ടാലും,
    കള്ളന്‍ കള്ളന്‍ തന്നെ !!!!!

    കോഴിയെ കട്ടവാന്റെ തലയിലെ കോഴി പപ്പു കാണൂ….

    ഇതൊക്കെ പൂര്‍വികര്‍ പറഞ്ഞയ്തു വെറുതെയല്ല…..

  2. ശശാങ്കന്‍

    പി.രാജീവന്‍ എം.പി-യുടെ ചോദ്യങ്ങളും പങ്കെടുത്ത ചര്‍ച്ചകളും ഒക്കെ രാജ്യസഭാ വെബ്ബ്‌സൈറ്റില്‍ ഉണ്ടല്ലോ. അതെടുത്ത് നോക്കിയാല്‍ വ്യക്തമാകില്ലേ ഏതൊക്കെ നിലപടുകളാണ് സാമ്രാജ്യത്യാനുകൂലമായി എടുത്തതെന്ന്.

  3. Adv. T.K Sujith

    ഹരീഷ് വളരെ പ്രസക്തമായ ലേഖനം ചെളിവാരിയെറിയലല്ലാതെ, വിശകലാത്മകമായി ഈ ലേഖനം കേരളത്തില്‍ പരിഗണിക്കപ്പെടുമെന്ന് കരുതുന്നു… ഇവിടെ ചില ചോദ്യങ്ങള്‍ പ്രസക്തമാണ്:
    ൧) വിദേശ ധനഹായം പ്രത്യക്ഷമായും പരോക്ഷമായും (ചരടുള്ളതും ഇല്ലാത്തതുമായ പണം) വാങ്ങി പ്രവര്‍ത്തിക്കുന്ന എന്‍.ജി.ഒ കളോടുള്ള സമീപനം
    ൨) ഇന്ത്യയിലെ എം.പി മാരുടെയും എം.എല്‍.എ മാരുടെയും കടമകള്‍, ഉത്തരവാദിത്വങ്ങള്‍, അവരുടെ യോഗ്യത, കഴിവ് എന്നിവ.
    ൩) കഴിവുറ്റ ചെറുപ്പക്കാര്‍ക്ക്, പൊതു പ്രശ്നങ്ങളില്‍ നിസ്വാര്‍ത്ഥമായി ഇടപെടാനും പ്രവര്‍ത്തിക്കാനുമുള്ള ഇന്നത്തെ സന്നദ്ധത.

  4. Adv. T.K Sujith

    മൂന്നാമത്തെ പ്രശ്നം വിശകലനം ചെയ്തിട്ട് ആദ്യത്തെ പ്രശ്നത്തിലേക്ക് പോകുന്നതായിരിക്കും നല്ലതെന്ന് തോന്നുന്നു. പ്രകാശ് കാരാട്ട് എന്ന സമ്പന്നനും വിദ്യാസമ്പന്നനും ആയിരുന്ന ചെറുപ്പക്കാരന്‍ രാഷ്ട്രീയ പ്രബുദ്ധത തലയ്കുപിടിച്ച് ചെന്നുകയറുന്നത് സി.പി.ഐ.എം നേതാവ് ഇ.എം.എസിന്റെ സഹായി ആയിട്ടാണ്. പി.ആര്‍.എസ് എന്ന, ഫോര്‍ഡ് ഫൌണ്ടേഷനാല്‍ സ്ഥാപിതമായതെന്ന് ഹരീഷ് വിശദീകരിക്കുന്ന സംഘടനയുടെ ശമ്പളം വാങ്ങിക്കൊണ്ട് ഇന്ന് ചില പിള്ളേര്‍ ചെയ്യുന്ന അതേപണി തന്നെയാവണം കാരാട്ട് അന്ന് ഇ.എം.എസിന് വേണ്ടി ചെയ്തത്. പ്രതിമാസം ഡല്‍ഹിയില്‍ ഭക്ഷണം കഴിച്ച് കഴിഞ്ഞുപോകാനുള്ള പണം തീര്‍ച്ചയായും പാര്‍ട്ടി ഫണ്ടില്‍ നിന്നും അന്ന് കാരാട്ടിന് നല്‍കിയുമിരിക്കും. (അത് കിട്ടുമെന്ന് പ്രതീക്ഷിച്ചാവലില്ല അദ്ദേഹം ആ പണി എടുത്തത്. പക്ഷേ, പാര്‍ട്ടി അത് തീര്‍ച്ചയായും നല്‍കിയിട്ടുണ്ടാവും) ഇ.എം.എസിന് വേണ്ടി പല രേഖകളും പഠിച്ച് അഭിപ്രായം പറഞ്ഞിട്ടുള്ളത് കാരാട്ടെന്ന ആ പയ്യന്‍ തന്നെ ആയിരിക്കും. പക്ഷേ അത് ഇ.എം.എസിന്റെ മഹത്വത്തെ ഏതെങ്കിലും വിധത്തില്‍ കുറയ്കുന്നുണ്ടോ എന്ന് എനിക്കോ നിങ്ങള്‍ക്കോ തോന്നില്ല.
    പക്ഷേ ഇന്ന് ഇത്തരത്തില്‍ കഴിവുള്ള ചെറുപ്പക്കാരാരും -ഹരീഷടക്കം – പാര്‍ട്ടിയുടെ (കളുടെ) നക്കാപ്പിച്ച കാശുവാങ്ങിയോ, നിസ്വാര്‍ത്ഥമായോ ഇത്തരം പണിയെടുക്കുവാന്‍, തയ്യാറല്ല. അവര്‍ മാറിനിന്ന് ഈ സംവിധാനങ്ങളെയൊക്കെ പുച്ഛിക്കുകയും അതേസമം പതിനായിരങ്ങള്‍ ശമ്പളമായി തന്നാല്‍ ഞങ്ങള്‍ ഇതല്ല ഏത് പണിവേണമെങ്കിലും ചെയ്ത് കാണിച്ചുതരാം എന്ന് വാഗ്ധാനം ചെയ്യുകയും ചെയ്യുന്നു. ഇവിടെയാണ് ഈ ചെറുപ്പക്കാരെ കൂലിക്കാരാക്കുന്ന പി.ആര്‍,എസിനെ പോലുള്ള എന്‍.ജി.ഒ കള്‍ പ്രസക്തമാകുന്നത്

    പി.ആര്‍.എസ് എന്ന സംഘടനയുടെ ചരിത്രം പരിശോധിക്കുന്നത് ആദ്യത്തെ പ്രശ്നത്തെ വിശകലനം ചെയ്യുന്നതിന് സഹായക

  5. Harish Vasudevan

    >>>>>>ഓരോ എം.പി ക്കും നാലു പേരെ സഹായത്തിനു നിയമിക്കാന്‍ സര്‍ക്കാര്‍ പണം ചെലവിടുന്നുണ്ട് എന്ന് പി.രാജീവ് തന്നെ ചാനല്‍ ചര്‍ച്ചകളില്‍ പറയുന്നതുകേട്ടു.. ഇത് കൂടാതെ എം.പിമാര്‍ക്ക് ഭീമമായ മറ്റു ഫണ്ടുകളും ഉണ്ട്. ഒരുവര്‍ഷം ഇരുനൂറു കോടിയോളം രൂപയാണ് എം.പിമാരുടെ ശമ്പള അലവന്‍സ് ഇനത്തില്‍ സര്‍ക്കാര്‍ ചെലവിടുന്നത്. ഈ തുകയുടെ കൂടെ ഒരു കോടി രൂപ കൂടി ചെലവിട്ടാല്‍ ഈ മിടുക്കരായ ഗവേഷകരെ ഫെല്ലോഷിപ്പ് നല്‍കി പാര്‍ലമെന്റിന് കീഴില്‍ ഗവേഷകരായി നിയമിക്കാനാകും. എന്നിട്ടാണോ സര്‍ക്കാരും എംപിമാരും ഇപ്പോഴും അറിഞ്ഞുകൊണ്ട് വിദേശപണം വാങ്ങി പ്രവര്‍ത്തിക്കുന്ന എന്‍.ജി.ഒ കള്‍ക്ക് മുന്നില്‍ തങ്ങളുടെ ജനാധിപത്യപരമായ കര്‍ത്തവ്യങ്ങള്‍ അടിയറ വെക്കുന്നത്?? അപ്പോള്‍ പ്രശ്‌നം പണമല്ല എന്ന് മനസിലാക്കാം.<<<<<<

    സുജിത്തേട്ടാ, പ്രതികരണത്തിന് വളരെ നന്ദി.
    അങ്ങനെയുള്ളവരെ സര്‍ക്കാര്‍ / പാര്‍ട്ടികള്‍/ പ്രസ്ഥാനങ്ങള്‍ പോറ്റാന്‍? എന്‍.ജി.ഓ കള്‍ ആയാല്പ്പോലും ഫോര്‍ഡ് / ബില്‍ ഗേറ്റ്സ് പോലുള്ളവരുടെ NGO കള്‍ വേണോ? ഞാനടക്കം പലര്‍ക്കും ഇത്തരം സഹായ വാഗ്ദാനങ്ങള്‍ കിട്ടാറുണ്ട്. ചരടുകള്‍ ഇല്ല എന്നുറപ്പുള്ള പണമേ സ്വീകരിക്കാവൂ എന്നതാണ് എന്റെ നിലപാട്.

  6. Joseph Thomas

    വിദേശ പണം പറ്റുന്ന സന്നദ്ധ സംഘടനകളോടുള്ള സമീപനം തീര്‍ച്ചയായും ശ്രദ്ധയോടെ എടുക്കേണ്ടതാണു്. പണം എവിടെ നിന്നു്, എന്തിനു്, തരുന്നവരുടെ ലക്ഷ്യം എന്തു് തുടങ്ങിയ ചോദ്യങ്ങള്‍ പ്രസക്തമാണു്. പൊതു ലക്ഷ്യത്തോടെ നിലവില്‍ വന്നവയും അതനുസരിച്ചു് പ്രവര്‍ത്തിക്കുന്നവയുമായ സാര്‍വ്വ ദേശീയ സംഘടനകളോടുള്ള സമീപനമാകരുതു് ആഗോള ധന മൂലധന ശക്തികളുടെ സേവനത്തിനായി പ്രവര്‍ത്തിക്കുന്നവയോടുള്ളതു്.

    വിദേശ പണം പറ്റുന്ന സന്നദ്ധ സംഘടനകളോടും നാട്ടില്‍ തന്നെ ജനങ്ങളെ ജാതിയുടേയും മതത്തിന്റേയും അടിസ്ഥാനത്തില്‍ സംഘടിപ്പിക്കുകയും സമൂഹത്തിന്റെ മാനസികൈക്യം തകര്‍ക്കുകയും ചെയ്യുന്ന സന്നദ്ധ സംഘടനകളോടും അനുഭാവം പാടില്ല.

    അതേസമയം പൊതുവായ ശാസ്ത്ര-സാങ്കേതിക-സാംസ്കാരിക പുരോഗതിക്കു് വേണ്ടി പ്രവര്‍ത്തിക്കുന്ന സന്നദ്ധ സംഘടനകള്‍ പ്രോത്സാഹിപ്പിക്കപ്പെടുകയും വേണം. വിദേശ ഫണ്ടുപയോഗിക്കുന്നതും സ്വത്വ വാദം വളര്‍ത്തുന്നവയോടുമുള്ള എതിര്‍പ്പു് എല്ലാ സന്നദ്ധ സംഘടനകളോടുള്ള അവജ്ഞയും അവിശ്വാസവുമായി മാറിക്കൂടാ.

    ജനപ്രതിനിധികളുടെ പ്രവര്‍ത്തന ശേഷിയും വൈദഗ്ദ്ധ്യപോഷണവും ശാക്തീകരണവും ശാക്തീകരണവുമായി ബന്ധപ്പെട്ടു് തീര്‍ച്ചയായും പരിശ്രമങ്ങളും സംവിധാനങ്ങളും ആവശ്യമാണു്. ആരും അപ്രമാദികളോ പൂര്‍ണ്ണമായ കഴിവുള്ളവരോ ആവില്ല. കഴിവും ശേഷിയുമെല്ലാം കാല ദേശാനുസാരിയാണു്. അതു് വര്‍ദ്ധിപ്പിച്ചു് നേടേണ്ടവയാണു്. അതു് ജനങ്ങള്‍ക്കെന്നപോലെ ജനപ്രതിനിധികള്‍ക്കും ബാധകവും ആവശ്യവുമാണു്.

    അതേ സമയം ജനപ്രതിനിധികളെ സഹായിക്കാനും അവര്‍ക്കാവശഅയമായ വിവര പശ്ചാത്തല സൌകര്യങ്ങള്‍ ഒരുക്കാനും സൌകര്യങ്ങളും സംവിധാനങ്ങളും ആവശ്യമായിരിക്കുമ്പോള്‍ തന്നെ, അതു് വിദേശ ഫണ്ടോടെ പ്രവര്‍ത്തിക്കുന്നവയാകുന്നതു് ശരിയല്ല. പ്രത്യേകിച്ചും ധന മൂലധന മേധാവിത്വകാലത്തെ സാമ്രാജ്യത്വ നായക സ്ഥാനത്തുള്ള അമേരിക്കന്‍ സര്‍ക്കാരിന്റേയും അതോടൊപ്പം നീങ്ങുന്ന ഫോര്‍ഡ് ഫൌണ്ടേഷന്റേയും തീരെ ഉപയോഗിക്കപ്പെടാന്‍ പാടില്ല.

    എന്നാല്‍ ഇവിടെ അങ്ങിനെ ഉപയോഗിച്ചതു് സ. പി രാജീവ് മാത്രമല്ല. അദ്ദേഹത്തെ മാത്രമായോ സിപിഐ(എം) നേയോ ഇടതു് പക്ഷ പാര്‍ടികളേയോ മാത്രമായോ ഇക്കാര്യത്തില്‍ കുറ്റപ്പെടുത്തുന്നതിനും പഴിക്കുന്നതിനും മുതിരുന്നതു് അന്യായമാണു്. കാരണം, എപിമാരുടെ ക്ലബ്ബാണു് പീആര്‍എസിനെ ഇക്കാര്യത്തിനുപയോഗിച്ചതു്. അല്ലാതെ രാജീവു് ഇക്കാര്യത്തിനായി സ്വന്തമായ സംവിധാനം ഉണ്ടാക്കുകയല്ല ചെയ്തിരിക്കുന്നതു്. മാത്രവുമല്ല, അദ്ദേഹം ത്യാജ്യ-ഗ്രാഹ്യ ബുദ്ധിയോടെ ഓരോ വിഷയത്തേയും പരിശോധിച്ചു് തന്നെയാണു് കൈകാര്യം ചെയ്യുന്നതു്. അതിനാല്‍, ഈ വാര്‍ത്ത രാജീവിനേയോ ഹനന്‍മുള്ളയേയോ പഴിക്കാനല്ല, മറിച്ചു് ഇന്ത്യന്‍ പാര്‍ലമെണ്ടിന്റെ സ്ഥിതിയും നമ്മുടെ ജനപ്രതിനിധികളുടെ ഗതികേടും മനസിലാക്കാനും അതിനു് പരിഹാരം കാണാനുമാണു് ഉപയോഗിക്കപ്പെടേണ്ടതു്. അക്കാര്യത്തില്‍, ഈ വാര്‍ത്ത ഇന്ത്യന്‍ പാര്‍ലമെണ്ടിന്റേയും സര്‍ക്കാരിന്റേയും അമേരിക്കന്‍-സാമ്രാജ്യത്വ വിധേയത്വം തുറന്നു് കാട്ടുന്നതാണു്. അമേരിക്കയുമായി ആണവ കരാറും ആണവ നിലയ കച്ചവടവുമടക്കം തന്ത്രപരമായ ബന്ധത്തിനു് ശ്രമിക്കുന്ന കോണ്‍ഗ്രസിന്റേയും ഇപ്പോള്‍, യുപിഎയുടേയും, വികൃത മുഖമാണു് ഈ വാര്‍ത്തയിലൂടെ തെളിയുന്നതു്.

    തീര്‍ച്ചയായും ഇതിനു് പരിഹാരം നമ്മുടെ ഗവേഷകരും വിവര വിദഗ്ദ്ധരും അടങ്ങുന്ന സംഘങ്ങള്‍ അതാതു് രാഷ്ട്രീയ പാര്‍ടികള്‍ക്കും പാര്‍ലമെണ്ടിനും നിയമ സഭകള്‍ക്കും പൊതുവേയും ഉണ്ടാകുകയും അത്തരം വൈദഗ്ദ്ധ്യം നമ്മുടെ നാട്ടിലും സ്ഥാപനങ്ങളിലും സൃഷ്ടിച്ചെടുക്കുകയാണു് വേണ്ടതു്.

    നിലവില്‍ അമേരിക്കയിലാണു് എല്ലാ കഴിവും കേന്ദ്രീകരിച്ചിരിക്കുന്നതെന്ന ധാരണയില്‍ അവിടെ നിന്നേ അവ ലഭിക്കൂ എന്ന കാഴ്ചപ്പാടു് ആവശഅയമില്ല. അതു് നമുക്കു് ആര്‍ജ്ജിക്കാവുന്നവയാണു്. ഇന്ത്യ അതില്‍ പുറകിലുമല്ല. പക്ഷെ, ഇന്ത്യക്കാരുടെ കഴിവുകള്‍ ഉപയോഗിക്കാന്‍ നമ്മുടെ ഭരണാധികാരികളും രാഷ്ട്രീയ പാര്‍ടികളും തയ്യാറാകാത്തതാണു് നമ്മുടെ വളര്‍ച്ച മുരടിക്കുന്നതിനും വിദേശ വിധേയത്വം തുടരുന്നതിനും കാരണമാകുന്നതു്.

    നമുക്കുള്ള കഴിവുകള്‍ അംഗീകരിക്കുകയും പരിപോഷിപ്പിക്കുകയും കഴിവു് കേടുകള്‍ കണ്ടെത്തുകയും പരിഹരിക്കുകയുമാണു് വേണ്ടതു്.

    സ. പി രാജീവിന്റെ അല്ല, ഇന്ത്യന്‍ പാര്‍ലമെണ്ടിന്റെ ഗതികേടു് തുറന്നു് കാട്ടിയതിനു് മനോരമയ്ക്കു് നന്ദി.

    ജോസഫ് തോമസ്.

    .

LEAVE YOUR COMMENTS

Press ctrl+g to toggle between English and Malayalam.