Categories

ഓര്‍ഗനൈസേഷന്‍ ഓഫ് ഇസ്‌ലാമിക് കോര്‍പ്പറേഷനില്‍ നിന്നും സിറിയയെ സസ്‌പെന്‍ഡ് ചെയ്തു

ദമാസ്‌ക്കസ്: ഇസ്‌ലാമിക രാജ്യങ്ങളുടെ കൂട്ടായ്മയായ ഓര്‍ഗനൈസേഷന്‍ ഓഫ് ഇസ്‌ലാമിക് കോര്‍പ്പറേഷനില്‍ നിന്നും സിറിയയെ ഒഴിവാക്കി. സിറിയയുടെ അംഗത്വം റദ്ദ് ചെയ്യാന്‍ മെക്കയില്‍ ചേര്‍ന്ന ഉച്ചകോടിയില്‍ തീരുമാനിക്കുകായിരുന്നു. സിറിയയില്‍ തുടരുന്ന കലാപത്തിന്റെ പശ്ചാത്തലത്തിലാണ് തീരുമാനം.

Ads By Google

സിറിയന്‍ ജനതയ്‌ക്കെതിരെയുള്ള മനുഷ്യത്വരഹിതമായ പ്രവൃത്തിയിലും കൂട്ടക്കൊലയിലും ഓര്‍ഗനൈസേഷന്‍ ഓഫ് ഇസ്‌ലാമിക് കോര്‍പ്പറേഷന്‍ ആശങ്ക രേഖപ്പെടുത്തി. രാജ്യത്തെ ജനങ്ങളെ പരിഗണിക്കാതെ തുടരുന്ന യുദ്ധം അവസാനിപ്പിക്കാന്‍ നടപടിയുണ്ടാകണമെന്നും അതല്ലാതെ സിറിയയ്ക്ക് ആരുടെ പിന്തുണയും ലഭിക്കില്ലെന്നും ഇസ്‌ലാമിക് കോര്‍പ്പറേഷന്‍ മുന്നറിയിപ്പ് നല്‍കി.

രാജ്യത്തെ കലാപം അവസാനിപ്പിക്കേണ്ടതുണ്ടെന്നും അംഗത്വം റദ്ദാക്കിയതിലൂടെ മുസ്‌ലീം ലോകത്തുനിന്നും സിറിയയ്ക്ക് ശക്തമായ സന്ദേശമാണ് നല്‍കുന്നതെന്നും കോര്‍പ്പറേഷന്‍ മേധാവി എക്‌മെലഡിന്‍ ഇസാനോഗ്ലു പറഞ്ഞു. നേരത്തെ സിറിയയെ അറബ് ലീഗും സസ്‌പെന്‍ഡ് ചെയ്തിരുന്നു.

ഇതിനിടെ സിറിയയില്‍ സൈന്യവും വിമതരും തമ്മിലുള്ള ഏറ്റുമുട്ടല്‍ രൂക്ഷമായി. സിറിയയില്‍ വിമതപക്ഷം സൈനിക വിമാനം വെടിവെച്ച് വീഴ്ത്തിയതിനെ തുടര്‍ന്നാണ്‌ പോരാട്ടം വീണ്ടും രൂക്ഷമായത്.

അലെപ്പോ നഗരം പിടിച്ചെടുക്കുന്നതിനായി സൈന്യം നടത്തിയ ആക്രമണത്തില്‍ 30 പേര്‍ കൊല്ലപ്പെട്ടു. നിരവധി പേര്‍ക്ക് പരിക്കേറ്റിട്ടുണ്ട്. അതേസമയം കലാപം ലെബനനിലേക്ക് കൂടി വ്യാപിക്കുന്ന പശ്ചാത്തലത്തില്‍ തങ്ങളുടെ പൗരന്മാരോട് ലെബനനില്‍ നിന്നും ഒഴിഞ്ഞുപോകാന്‍ സൗദി അറേബ്യയും ഖത്തറും യു.എ.ഇ യും ആവശ്യപ്പെട്ടു.