രാജേഷ് പിള്ള

ഏതാനും വര്‍ഷങ്ങള്‍ മുന്‍പ്, ഇന്ത്യയുടെ സുരക്ഷാസംവിധാനങ്ങളുടെ ചുമതലയുളളവര്‍ക്കു മുന്‍പില്‍ ലണ്ടനില്‍ നിന്ന് ഒരു രഹസ്യസന്ദേശം എത്തി. ഒറ്റനോട്ടത്തില്‍ വലിയ പ്രാധാന്യമൊന്നുമില്ലാത്ത ആ സന്ദേശത്തില്‍ ചൂണ്ടിക്കാട്ടിയത്, യഥാര്‍ത്ഥത്തില്‍, രാജ്യത്തിന്റെ സമ്പദ് വ്യവസ്ഥയുടെ അടിവേരറുക്കാന്‍ ശത്രു രാജ്യമായ പാകിസ്ഥാന്‍ നടത്തുന്ന ബൃഹദ് പദ്ധതിയുടെ ഭാഗമാണെന്ന് തിരിച്ചറിയിക്കാനുളള ഉള്‍ക്കാഴ്ച ബന്ധപ്പെട്ടവര്‍ക്കില്ലാതെ പോയി.

അതില്‍ അത്ഭുതമില്ല, അതാണല്ലോ നമ്മുടെ പാരമ്പര്യം
ലണ്ടനില്‍ നിന്ന്, പാകിസ്ഥാന്‍ സര്‍ക്കാര്‍ കറന്‍സിനോട്ടുകള്‍ അച്ചടിക്കാനുളള പ്രത്യേകതരം കടലാസ്  വന്‍തോതില്‍ വാങ്ങിക്കൂട്ടുന്നു എന്നതായിരുന്നു ആ സന്ദേശത്തിന്റെ കാതല്‍.  ഇത് വളരെ രഹസ്യമായി, ആസൂത്രിതമായാണ് നടത്തുന്നതെന്നും ലണ്ടനിലെ പാകിസ്ഥാന്‍ എംബസിയിലെ ഉന്നതര്‍ നേരിട്ടാണ് ഇടപാട് നടത്തുന്നതെന്നും സന്ദേശത്തിലുണ്ടായിരുന്നു.

ഒരു സ്വതന്ത്യ്രരാജ്യത്തിന് കറന്‍സിയടിക്കാനുളള സാധനസാമഗ്രികള്‍ വാങ്ങുന്നതിന് ഈ രഹസ്യ സ്വഭാവം എന്തിനെന്നോ, അതല്ലെങ്കില്‍ പാകിസ്ഥാന് ആവശ്യമുളളതിലധികം കടലാസ് വാങ്ങുന്നതെന്തിനെന്നോ അന്വേഷിക്കാന്‍ ആരും ഇവിടെ മിനക്കെട്ടില്ല.

ഏതാണ്ട് ഇതേ സമയത്ത് തന്നെ റിപ്പോര്‍ട്ട് ചെയ്യപ്പെട്ട മറ്റൊരു സംഭവവികാസവുമായി ബന്ധപ്പെടുത്തിയിരുന്നെങ്കില്‍പോലും ഈ സന്ദേശത്തിന്റെ പ്രാധാന്യം രഹസ്യാന്വേഷണ മേലാളന്‍മാര്‍ക്ക് മനസ്സിലാകുമായിരുന്നു.  ഇന്ത്യന്‍ കറന്‍സി അടിക്കുന്ന നമ്മുടെ അതീവ സുരക്ഷാ സംവിധാനമുളള സംവിധാനത്തില്‍ പാക് രഹസ്യാന്വേഷണ ഏജന്റുമാര്‍ നുഴഞ്ഞു കയറിയെന്നും കറന്‍സി നോട്ടുകളുടെ ടെംപ്ളേറ്റ് (രൂപരേഖ) മോഷ്ടിക്കപ്പെട്ടുവെന്നുമായിരുന്നു ആ വിവരം.

എന്തായാലും കണ്ടാലറിയാത്തവന്‍ കൊണ്ടാലറിയും എന്ന പഴമൊഴി ഇവിടെ ആവര്‍ത്തിച്ചുവെന്നു ചുരുക്കം.  ഇന്ത്യാവിരുദ്ധവികാരത്തില്‍ മാത്രം സ്വന്തം നിലനില്‍പ്പിന്റെ രസതന്ത്രം കണ്ടെത്തുന്ന പാകിസ്ഥാന് ഇന്ത്യയുമായി നിശബ്ദവും, എന്നാല്‍ മാരകവുമായ ഒരു ദീര്‍ഘകാല നിഴല്‍ യുദ്ധത്തില്‍ ഏര്‍പ്പെടാനുളള എല്ലാ സാധനസാമഗ്രികളും ഇതോടെ ലഭ്യമായി.

അതിന്റെ ഫലമറിയണമെങ്കില്‍ ഇക്കഴിഞ്ഞ രണ്ടുമൂന്ന് വര്‍ഷങ്ങള്‍ക്കിടയില്‍ ഇന്ത്യയില്‍ പ്രചരിക്കുന്ന കള്ളനോട്ടിന്റെ ‘ഗുണമേന്മ’യും വ്യാപ്തിയും മാത്രം നോക്കിയാല്‍ മതി.  വര്‍ഷങ്ങള്‍ മുമ്പ് പാകിസ്ഥാന്റെ ഐ.എസ്.ഐ നിഴല്‍ യുദ്ധം ആരംഭിച്ചപ്പോള്‍ കള്ളനോട്ട് അടിക്കാന്‍ ഉപയോഗിച്ചിരുന്നത് പാകിസ്ഥാനില്‍ തന്നെ തടിപള്‍പ്പില്‍ നിന്ന് ഉത്പാദിപ്പിക്കുന്ന കടലാസായിരുന്നു.

അത് വിദേശനിര്‍മ്മിതവും ഗുണമേന്മ കൂടിയതും ഇന്ത്യ ഇറക്കുമതി ചെയ്യുന്ന കടലാസിനോട് കിടപിടിക്കുന്നതുമായ കടലാസിന് വഴി മാറി.  ടെംപ്ളേറ്റിന്റെ മാതൃക മോഷ്ടിക്കപ്പെട്ടതിലൂടെ നോട്ടിന്റെ സുരക്ഷാ മുന്‍കരുതലുകളെയും, അതുവരെയുണ്ടായിരുന്ന സാങ്കേതിക പിഴവുകളെയും ഫലപ്രദമായി മറികടക്കാന്‍ ശത്രുരാജ്യത്തിന് കഴിയുമെന്ന് ചുരുക്കം.

പിടിക്കപ്പെടുന്നത് യഥാര്‍ത്ഥത്തില്‍ വ്യാപനത്തിലുളള വ്യാജനോട്ടുകളുടെ ഒരു ചെറിയ അംശം മാത്രമാണ്

ഒറിജിലിനോട് തൊട്ടടുത്തു നില്‍ക്കുന്ന വ്യാജന്‍ നിര്‍മ്മിക്കുന്നതില്‍ വിജയിച്ചതോടെ, നോട്ടുകളുടെ വ്യാപനം വികസിപ്പിക്കുന്നതില്‍ പാകിസ്ഥാന്‍ കൂടുതല്‍ ശ്രദ്ധ കൊടുത്തു.  ഇത് നമ്മുടെ അധികാരികള്‍ക്ക് ബോധ്യപ്പെട്ടിട്ടുമുണ്ട്.  സാമ്പത്തിക കാര്യങ്ങള്‍ക്കുളള പാര്‍ലമെന്ററി സ്റാന്‍ഡിംഗ് കമ്മറ്റി ഒരു റിപ്പോര്‍ട്ടില്‍ പറഞ്ഞിട്ടുളളത് ശ്രദ്ധിക്കുക.

“റിസര്‍വ് ബാങ്ക് അധികൃതരുടെ കണക്കനുസരിച്ച്, കള്ളനോട്ട് വ്യാപനത്തിന്റെ തോതില്‍ കഴിഞ്ഞ ഏതാനും വര്‍ഷങ്ങള്‍ക്കിടയില്‍ പെട്ടെന്ന് ഒരു വര്‍ദ്ധനയുണ്ടായിട്ടുണ്ട്.  2000-06 ല്‍ പിടിക്കപ്പെട്ടത് 1.77കോടിയുടെ വ്യാജനോട്ടായിരുന്നെങ്കില്‍ 2007-08 ല്‍ അത് 5.50 കോടിയായി കുത്തനെ ഉയര്‍ന്നിരിക്കുന്നു.

പക്ഷേ ഈ കണക്ക് തന്നെ ഒരു സൂചകം മാത്രമാകാനാണ് സാധ്യത.  കാരണം പിടിക്കപ്പെടുന്നത് യഥാര്‍ത്ഥത്തില്‍ വ്യാപനത്തിലുളള വ്യാജനോട്ടുകളുടെ ഒരു ചെറിയ അംശം മാത്രമാണ്.”

ഇത്തരം റിപ്പോര്‍ട്ടുകളേയും, വിമര്‍ശനങ്ങളേയും പക്ഷേ റിസര്‍വ് ബാങ്ക് അധികൃതര്‍ നേരിടുന്നത് യഥാര്‍ത്ഥ ചിത്രം മറച്ചു വയ്ക്കാന്‍ കണക്കുകൊണ്ടു നടത്തുന്ന ഒരു കുമ്മാട്ടിക്കളിയിലൂടെയാണ്.  അതിലേയ്ക്കുവരും മുമ്പ് ഇന്ന് പാകിസ്ഥാന്‍ നിര്‍മ്മിത വ്യജനോട്ടുകള്‍ എങ്ങനെയാണ് നമ്മുടെ സമ്പദ്വ്യവസ്ഥയില്‍ വിഷം കലര്‍ത്തുന്നതെന്ന് നോക്കാം.

ഇന്ത്യന്‍ കറന്‍സി അടിക്കാനുളള അസംസ്കൃതവസ്തുക്കളും മറ്റു സൂക്ഷ്മവിവരങ്ങളും സ്വായത്തമാക്കിയ പാകിസ്ഥാന്‍ ഇന്ന് വന്‍തോതിലാണ് ഇന്ത്യന്‍ നോട്ടുകള്‍ അച്ചടിക്കുന്നത്. ബലൂചിസ്ഥാനിലെ ഖ്വാട്ടയിലെ പാക് സര്‍ക്കാരിന്റെ ഉടമസ്ഥതയിലുളള കറന്‍സി പ്രിന്റിംഗ് പ്രസ്സില്‍ ആയിരുന്നു ആദ്യകാലത്ത് ഇത് അച്ചടിച്ചിരുന്നതെങ്കില്‍ ഇപ്പോള്‍ കറാച്ചിയിലും ലഹോറിലും പെഷാവറിലും ഇന്ത്യന്‍ നോട്ടുകള്‍ അടിക്കാനുളള സംവിധാനമുണ്ടന്ന് പിടിക്കപ്പെട്ട ചില ഏജന്റുമാര്‍ പറയുന്നു.

വ്യജനോട്ടുകള്‍ അച്ചടിച്ചാല്‍ അത് പാക്കിസ്ഥാന്റെ ദേശീയ വിമാന കമ്പനിയായ പാക്കിസ്ഥാന്‍ ഇന്റര്‍നാഷണല്‍ ഏയര്‍വോയ്സ്  സര്‍വീസുകള്‍ ഉപയോഗിച്ച് ഇന്ത്യയുടെ അയല്‍ പക്കത്തുളള നേപ്പാള്‍, ശ്രീലങ്ക, മാലദ്വീപുകള്‍, ബംഗ്ളാദേശ് തുടങ്ങിയ രാജ്യങ്ങളില്‍ ഏത്തിക്കുകയാണ് അടുത്തഘട്ടം.

അതാതു രാജ്യങ്ങളില്‍ ആളും അര്‍ത്ഥവുമുളള വ്യക്തികളേയോ പ്രസ്ഥാനങ്ങളെയോ കൂട്ടുപിടിച്ച് വ്യാജ കറന്‍സി ഇന്ത്യന്‍ അതിര്‍ത്തിക്കുളളിലെത്തിക്കാന്‍ വേണ്ട വിപുലമായ സംവിധാനം ഒരുക്കുന്നതാകട്ടെ ആ രാജ്യങ്ങളിലെ പാകിസ്ഥാന്‍ എംബസികളും.കഴിഞ്ഞ ഏതാനും വര്‍ഷങ്ങള്‍ക്കുളളില്‍ ഇന്ത്യക്കെതിരെ ആയുധമെടുത്തുപോരാടുന്ന തീവ്രവാദികളെ മാത്രമല്ല, പാകിസ്ഥാന്‍ നമ്മുടെ അയല്‍ രാജ്യങ്ങളില്‍ സൃഷ്ടിച്ചത്.

ശക്തമായ ഇന്ത്യാവിരുദ്ധവികാരം നിലനിര്‍ത്തുന്ന അധോലോക മാഫിയ സംഘങ്ങളും ഇതില്‍പ്പെടും.  ബംഗ്ലാദേശിലെ ഹുജി മുതല്‍ നോപ്പാളിലെ പരസ് രാജകുമാരന്‍ വളരെ ഈ ശൃംഖലയിലെ കണ്ണികളാകുന്നത് ഈ സാഹചര്യത്തിലാണ്.

ഇതിന് സമാന്തരമായി മറ്റൊരു ‘വലിയ മീനി’നെ കൂടി പാക് അധികൃതര്‍ ഈ നിഴല്‍ യുദ്ധത്തില്‍ സമര്‍ത്ഥമായി ഉപയോരിക്കുന്നുണ്ട്.  സാക്ഷാല്‍ ദാവൂദ് ഇബ്രാഹിമിനേയും അയാളുടെ ‘ഡി’ കമ്പനിയേയും. ദാവൂദിന്റെ വിശ്വസ്തരായ മുംബൈ സ്വദേശിയായ അഫ്താബ് ബക്തിയും, ഹൈദരാബാദുകാരനായ ബാബുവെയ്തനുമാണ് ഈ ഓപ്പറേഷനു നേതൃത്വം കൊടുക്കുന്നതെന്നാണ് 33 ലക്ഷത്തിന്റെ ‘കള്ളനു’മായി പിടിയിലായ നയിം, വസിം, മുഹമ്മദ് മുസ്ളിം എന്നിവര്‍ കഴിഞ്ഞ വര്‍ഷം ഡല്‍ഹി പോലീസിനോട് പറഞ്ഞത്.

അവര്‍ പറഞ്ഞ മറ്റൊരു വിവരം ഇന്ത്യക്കും പാകിസ്ഥാനുമിടയില്‍ ഓടുന്ന സൌഹൃദ തീവണ്ടിയായ ഝാര്‍ എക്സ്പ്രസ്സിലാണ് അവര്‍ നോട്ടുകള്‍ കടത്തുന്നത് എന്നായിരുന്നു ഇത്തരം സങ്കീര്‍ണ്ണമായ ഒരു ഓപ്പറേഷനിലും പാക്അധികൃതര്‍ പുലര്‍ത്തുന്ന നര്‍മ്മബോധം ശ്ളാഘനീയമല്ലെ? സൌഹൃദതീവണ്ടിയിലും കള്ളക്കടത്ത്!

എല്ലാ പരീക്ഷണങ്ങഘട്ടങ്ങളും മാറികടന്ന് അങ്ങനെ ഇന്ത്യയിലെത്തുന്ന വ്യാജനോട്ടുകള്‍ ഇവിടുത്തെ റിയല്‍ എസ്റേറ്റു ബിസിനസ്സുകാര്‍ മുതല്‍ സാധാരണ പലചരക്കുകാരന്റെ കൈയ്യില്‍ വരെയെത്തുന്നു. വ്യാപാരവ്യവസായങ്ങളുടെ ക്രയവിക്രയങ്ങളില്‍ നിക്ഷേപിക്കപ്പെടുന്നതോടെ അവ ബാങ്കുകളിലും മറ്റു മേഖലകളിലും വ്യാപിക്കുന്നു. സൂക്ഷ്മ പരിശോധനയില്‍ മാത്രം തിരിച്ചറിയപ്പെടുന്ന ഇത്തരം കള്ളന്‍മാരെ നമ്മുടെ സമ്പദ് ഘടനയിലേയ്ക്ക് കടത്തിവിടാന്‍ സ്ത്രീകളെയും കുട്ടികളെയും വരെ ഏജന്റുമാര്‍ ഉപകരണങ്ങളാക്കുന്നു.

ഇതിന്റെയൊക്കെ ഫലമായി  കള്ളനോട്ടുകാര്‍ ഇന്ന് ഏ.ടി.എമ്മു കളില്‍ നിന്നു വരെ ഉപഭോക്താവിന് ലഭിക്കുന്നു.  റിസര്‍വ്വ് ബാങ്ക് ജീവനക്കാര്‍ തന്നെ സ്വീകാര്യമായി പറയുന്നത് ഇന്ത്യയില്‍ പ്രചരിക്കുന്ന നോട്ടുകളില്‍ 27 ശതമാനം ഇന്ന് വ്യാജനാണെന്നാണ്.  അതായത് നിങ്ങളുടെ കയ്യില്‍ നൂറുരൂപയുണ്ടെങ്കില്‍ അതില്‍ 28 രൂപയുമായി ഇന്ത്യന്‍ സര്‍ക്കാരിനോ നമ്മുടെ സമ്പദ്വ്യവസ്ഥയ്ക്കോ യാതൊരു ബന്ധവുമില്ലെന്ന് അര്‍ത്ഥം.

ഇത് ഭയാനകമാണെങ്കില്‍ അതിലും പേടിപ്പെടുത്തുന്നതും വിചിത്രവുമാണ് റിസര്‍വ്വ് ബാങ്ക് ഈ ആരോപണങ്ങളെ ചെറുക്കാന്‍ ഉപയോഗിക്കുന്ന ഒടി വിദ്യ.  അല്പം സങ്കീര്‍ണ്ണമാണ്, പക്ഷേ ഒന്നിരുത്തി വായിച്ചാല്‍ ആര്‍ക്കും പൊള്ളത്തരം മനസ്സിലാകുന്ന ഒരു നാലാംതരം കണ്‍കെട്ട്.

1934-ലെ റിസര്‍വ്വ് ബാങ്ക് ഓഫ് ഇന്ത്യ നിയമമനുസരിച്ച് നമ്മുടെ രാജ്യത്തെ കറന്‍സി മാനേജ്മെന്റ് റിസര്‍വ്വ് ബാങ്കില്‍ നിക്ഷിപ്തമാണ്.  നോട്ടുകള്‍ പുറത്തിറക്കേണ്ടതും പ്രചരണത്തിലുള്ളവ പരിശോധിച്ച് ഉപയോഗയോഗ്യമായവ കാലാകാലം നിലനിര്‍ത്തി ബാക്കിയുള്ളവ പരിശോധിച്ച് നശിപ്പിക്കേണ്ടതും റിസര്‍വ്വ് ബാങ്ക് തന്നെ.

ഈ പരിശോധനയിലാണ് ബാങ്ക് അധികൃതര്‍ കള്ളനോട്ടുകള്‍ കണ്ടുപിടിക്കുന്നത്.
2008-2009ല്‍ മുന്‍വര്‍ഷത്തേക്കാള്‍ 103 ശതമാനം വര്‍ദ്ധനവ്, കണ്ടുപിടിക്കപ്പെട്ട കള്ളനോട്ടുകളുടെ എണ്ണത്തിലുണ്ടായെന്ന് റിസര്‍വ്വ് ബാങ്ക് അധികൃതര്‍ സമ്മതിക്കുന്നു. മൂല്യത്തിലാകട്ടെ വര്‍ദ്ധന 180 ശതമാനമാണ്.  കവിഞ്ഞ 10 വര്‍ഷങ്ങള്‍ക്കിടയില്‍ പത്തിരട്ടി വര്‍ദ്ധനയുണ്ടായിട്ടുണ്ട് കള്ളനോട്ടു വ്യാപനത്തില്‍.

എന്നിട്ടും റിസര്‍വ് ബാങ്ക് അധികൃതര്‍ ഇത് അവഗണിക്കാവുന്ന അളവില്‍ മാത്രമേയുള്ളുവെന്ന് അവകാശപ്പെടുന്നത് എങ്ങനെ?
രാജ്യത്ത് ഇന്ന് പ്രചാരത്തിലുളളത് മൊത്തം 49,000 ദശലക്ഷം കറന്‍സിയാണ്. അതിന്റെ 0.0008 ശതമാനം (ദശലക്ഷത്തില്‍ എട്ട്) മാത്രമാണ് കണ്ടുപിടിക്കപ്പെട്ട കള്ളനോട്ടിന്റെ അളവ് എന്നാണ് റിസര്‍ബാങ്കിന്റെ നിലപാട്.

ആഗസ്റ് 27 ന് പ്രസിദ്ധീകരിച്ച 2008-09 സാമ്പത്തിക വര്‍ഷത്തെ റിപ്പോര്‍ട്ടിലാണ് വിചിത്രമായ ഈ വാദം കണക്കിന്റെ മറിമായത്തിലേയ്ക്ക് കടക്കാതെ തന്നെ പ്രഥമദൃഷ്ട്യാ ഈ വാദം തെറ്റാണെന്ന് വാദിക്കാനാകും. വാര്‍ഷിക റിപ്പോര്‍ട്ടനുസരിച്ച് 2008-09 സാമ്പത്തിക വര്‍ഷം കണ്ടുപിടിക്കപ്പെട്ട കള്ള നോട്ടുകളുടെ എണ്ണം 3,98,111 ആണ്.  മൂല്യം 15.6 കോടി രൂപ. പക്ഷേ ഇത് റിസര്‍വ് ബാങ്ക് ഓപീസുകളിലും മറ്റ് ബാങ്കുകളിലും മാത്രം കണ്ടു പിടിക്കപ്പെടുന്ന കള്ളനോട്ടുകളുടെ കണക്കാണ്.

രാജ്യത്ത് കള്ളനോട്ടുകള്‍ പ്രധാനമായും പിടിക്കുന്ന പോലീസും മറ്റ് ഏജന്‍സികളും പിടിക്കുകയും കേസാക്കുകയും ചെയ്തവ പോലും ഈ കണക്കുകളില്‍ റിസര്‍വ് ബാങ്ക് ഉള്‍പ്പെടുത്തിയിട്ടില്ല.  രാജ്യത്തിന്റെ മുഴുവന്‍ കറന്‍സി മാനേജ്മെന്റിന് നിയോഗിക്കപ്പെട്ടവര്‍ക്ക് തങ്ങള്‍ പിടിക്കുന്നതുമാത്രമാണോ കള്ളനോട്ട്?
എന്നു മാത്രമല്ല രാജ്യത്തു പ്രചാരത്തിലുളള കറന്‍സിയുടെ വെറും 0.0008 ശതമാനം മാത്രമാണ് കള്ളനോട്ടെന്ന പ്രസ്താവം മറ്റൊരു കള്ളക്കണക്കിനെക്കൂടി അടിസ്ഥാനപ്പെടുത്തിയാണ്.

ഇന്ത്യയുടെ സാമ്പത്തിക സ്ഥിതി അപകടപ്പെടുത്താന്‍ കള്ളനോട്ട് അടിച്ചിറക്കുന്ന പാകിസ്ഥാന്‍കാരന്‍ എന്തായാലും അഞ്ചു രൂപയുടേയും പത്തുരൂപയുടേയും കള്ള നോട്ട് അടിക്കുകയില്ല.  അവന്‍ തീര്‍ച്ചയായും നുറുരൂപമുതല്‍ ആയിരത്തിന്റെ വരെ നോട്ടുകളായിരിക്കും അടിക്കുക.  ഇതുവരെയുളള പിടക്കപ്പെട്ട കേസ്സുകള്‍ ഈ അനുമാനം ശരിവയ്ക്കുന്നതുമാണ്.  റിസര്‍വ്വ് ബാങ്ക് പ്രചരണത്തിനു നല്‍കിയിട്ടള്ള മൊത്തം നോട്ടുകളുടെ വെറും നാലു ശതമാനം മാത്രമാണ് ആയിരത്തിന്റെ കറന്‍സികള്‍.

അഞ്ഞൂറു രൂപയുടേതാകട്ടെ 13 ശതമാനവും നൂറുരൂപയുടേത് 28 ശതമാനവുമാണ്.  സ്ഥിതി ഇതായിരിക്കെ നാല് ശതമാനം മാത്രം വരുന്ന ആയിരം രൂപയിലും 13 ശതമാനം വരുന്ന അഞ്ഞൂറുരൂപയിലും മാത്രം പിടിക്കപ്പെടുന്ന കള്ളനോട്ടുകള്‍, അഞ്ചും പത്തും രൂപയുടെ കറന്‍സികള്‍ വരെ ഉല്‍പ്പെടുന്ന 49,000 ദശലക്ഷം മൊത്തം കറന്‍സിയുടെ ശതമാനമാക്കി അവതരിപ്പിച്ച് വിഷയത്തിന്റെ ഗൌരവം കുറച്ചുകാണിക്കുന്നത് ആരെ സഹായിക്കാനാണ്.  (റിസര്‍വ്വ് ബാങ്കിന്റെ വാര്‍ഷിക റിപ്പോര്‍ട്ടിലും ഇക്കഴിഞ്ഞ ജൂലൈയില്‍ പുറത്തിറക്കിയ വിശദീകരണക്കുറിപ്പിലും ആര്‍ ബി ഐ ഡപ്യൂട്ടി ഡയറക്ടര്‍ ഉഷാ തോറോട്ടിന്റെ അധ്യക്ഷതയിലുളള ഉന്നതതല സമിതിയുടെ റിപ്പോര്‍ട്ടിലുമാണ് ഈ വിചിത്രവാദഗതി.)

ഉയര്‍ന്ന മൂല്യമുളള കള്ളനോട്ടുകള്‍ മാത്രം പിടിക്കപ്പെടുന്ന സാഹചര്യത്തില്‍ കണ്ടുപിടിക്കപ്പെട്ട കള്ള നോട്ടുകള്‍ ആ മൂല്യത്തിന്റെ പ്രചാരത്തിലുള നോട്ടുകളുടെ മൊത്തം മൂല്യത്തിന്റെ എത്ര ശതമാനം വരും എന്നുനോക്കുന്നതല്ലേ യുക്തിസഹം?

സ്വന്തം ഉത്തരവാദിത്വത്തില്‍ നിന്ന് റിസര്‍വ്വ് ബാങ്ക് അധികൃതര്‍ കൈകഴുകുന്നുവെന്നും ഇത് രാജ്യത്തെ സമ്പദ്വ്യവസ്ഥയെ തകര്‍ക്കുമെന്ന് മുന്നറിയിപ്പ് നല്‍കുകയും ചെയ്യുന്നത് പുറത്തുനിന്നുളളവരല്ല, മറിച്ച് റിസര്‍വ് ബാങ്ക് ജീവനക്കാരുടെ സംഘടനയായ ഓള്‍ ഇന്ത്യ റിസര്‍വ് ബാങ്ക് എംപ്ളോയീസ് അസോസിയേഷന്‍ ആണ്.

2008 ഡിസംബര്‍ നാലിന് അസോസിയേഷന്‍ റിസര്‍വ്  ബാങ്ക് ഗവര്‍ണ്ണര്‍ക്ക് സമര്‍പ്പിച്ച ഹര്‍ജിയില്‍ ബാങ്കിംഗ് മോഖലകളിലെ പോരായ്മകള്‍ ഓരോന്നായി എടുത്തുപറയുന്നുണ്ട്.  അതിനുശേഷം അവര്‍ ചൂണ്ടിക്കാണിക്കുന്നത് “രാജ്യത്ത് ഉത്പാദിക്കപ്പെടുന്ന ഓരോ കറന്‍സി നോട്ടിന്റേയും ഉത്തരവാദിത്വമുളള റിസര്‍വ് ബാങ്കിന്റെ നടത്തിപ്പ് കാര്യക്ഷമല്ലെന്നും പിഴവുകള്‍ നിറഞ്ഞതാണെന്നും ബോധ്യം വന്നാല്‍ ഈ സംവിധാനത്തെ കീഴ്മേല്‍ മറിക്കാന്‍ അത് ദേശദ്രോഹശക്തികല്‍ക്ക് കൂടുതല്‍ കരുത്തു പകരും” എന്നാണ്.

കഴിഞ്ഞ കുറേ വര്‍ഷങ്ങളായി തങ്ങള്‍ ഈ പ്രശ്നങ്ങള്‍ അധികാരികളുടെ ശ്രദ്ധയില്‍പ്പെടുത്താന്‍ ശ്രമിക്കുന്നുണ്ടെന്നും എന്നാല്‍ റിസര്‍വ് ബാങ്ക് നിഷേധനയം തുടരുകയാണെന്നും ഇതിന്റെ തിക്തഫലം അനുഭവിക്കുക നാട്ടിലെ സാധാരണക്കാരായിരിക്കുമെന്നും അസോസിയേഷന്‍ ജനറല്‍ സെക്രട്ടറി സമീര്‍ ഘോഷ് ഒപ്പിട്ട രേഖ പറയുന്നു.

പാര്‍ലമെന്റിന്റെ ധനകാര്യ സ്റാന്‍ഡിംഗ് കമ്മറ്റി 2008 ഡിസംബര്‍ 18 ന് സമര്‍പ്പിച്ച റിപ്പോര്‍ട്ടിലും കള്ളനോട്ട് വ്യാപനത്തിന്റെ അപകടകരമായ സ്ഥിതിയില്‍ അസന്തുഷ്ടി രേഖപ്പെടുത്തുകയും കറന്‍സി മാനേജ്മെന്റിലെ നിലവിലുളള എല്ലാ സംവിധാനങ്ങളുടേയും കാര്യക്ഷമതയും വിശ്വാസ്യതയും വീണ്ടും വിലയിരുത്തപ്പെടണമെന്ന് നിര്‍ദ്ദേശിക്കുകയും ചെയ്തിട്ടുണ്ട്.

പക്ഷേ, നിര്‍ദ്ദേശങ്ങള്‍ അത് ട്രേഡ് യൂണിയന്റേതായാലും പാര്‍ലമെന്റ് സ്റാന്‍ഡിംഗ് കമ്മറ്റിയുടേതായാലും നടപ്പാക്കേണ്ടത് റിസര്‍വ്വ് ബാങ്ക് അധികൃതരാണ്.  കണക്കുകൊണ്ട് ഓട്ടയടച്ച് ബാങ്കുകള്‍ക്കായി കാലാകാലം കുറേ നിര്‍ദ്ദേശങ്ങള്‍ പുറപ്പെടുവിക്കുന്നതില്‍ മാത്രം അഭിരമിക്കുകയാണ് ബന്ധപ്പെട്ടവര്‍.

ചുരുക്കത്തില്‍ റിസര്‍വ് ബാങ്കിന്റെ കണക്കു പുസ്തകത്തില്‍ വരവുവയ്ക്കുന്നതിലും വളരെക്കൂടുതലാണ് രാജ്യത്ത് മറ്റ് ഏജന്‍സികളാല്‍ പിടിക്കപ്പെടുന്ന കള്ളനോട്ടുകള്‍.  വിവിധ ഏജന്‍സികള്‍ പിടിച്ചെടുത്ത് നശിപ്പിക്കുന്നതിലും എത്രയോ അധികമാണ് ബാങ്കുകളും (ഇതില്‍ സ്വകാര്യ ബാങ്കുകളും പെടും) മറ്റ് അനുബന്ധ സ്ഥാപനങ്ങളും കേസിനും പൊല്ലാപ്പിനും പോകാതെ സ്വന്തം നിലയില്‍ നശിപ്പിച്ചുകളയുന്ന വ്യാജന്മാര്‍.

അതിനും എത്രയോ മുകളിലാണ് ആരാലും പിടിക്കപ്പെടാതെ നമ്മുടെ സമ്പദ് വ്യവസ്ഥയെ ഉള്ളില്‍നിന്ന് കാര്‍ന്നുതിന്നാനുളള ശേഷിയുമായി രാജ്യത്തു വിലസുന്ന കള്ളനോട്ടുകള്‍.
ഇതിന്റെ പ്രത്യാഘാതങ്ങള്‍ ഇനിയെങ്കിലും തിരിച്ചറിഞ്ഞ് കര്‍ശന നടപടികളിലേയ്ക്ക് സര്‍ക്കാര്‍ നീങ്ങിയില്ലെങ്കില്‍ അവസാന ചിരി പാകിസ്ഥാന്റെ തന്നെയായിരിക്കും.

അവരെ സംബന്ധിച്ചിടത്തോളം വര്‍ഷം തോറും ഇന്ത്യയില്‍ ഭീകരവാദം വളര്‍ത്താന്‍ മുടക്കുന്ന 1800 കോടി രൂപ ഇതോടെ അധികപ്പറ്റാകും.  സമ്പദ് വ്യവസ്ഥയുടെ അടിത്തറ ഇളകുന്ന ഒരു രാജ്യത്ത് അരാജകത്വം വളര്‍ത്താന്‍ ഇതിന്റെ മൂന്നില്‍ ഒന്നു തുക തന്നെ അധികമല്ലേ?

കടപ്പാട്: കറന്‍റ് അഫേഴ്സ്