Administrator
Administrator
‘അമൃത’യില്‍ നമ്മുടെ സഹോദരങ്ങള്‍ വെയിലു കൊള്ളുകയാണ്
Administrator
Thursday 8th December 2011 6:56pm

വേതന വര്‍ധനവും മികച്ച തൊഴില്‍ സാഹചര്യങ്ങളും ആവശ്യപ്പെട്ട് രാജ്യത്തിന്റെ വിവിധ ഭാഗങ്ങളില്‍ നഴ്‌സുമാര്‍ സമരം ചെയ്യുന്നതിനെക്കുറിച്ച് വായിക്കുമ്പോള്‍ മലയാളികളില്‍ ഭൂരിപക്ഷവും നമ്മുടെ മക്കളും അതുപോലെ നരകയാതനകള്‍ തൊഴിലിടങ്ങളില്‍ അനുഭവിക്കുന്ന കാര്യം തിരിച്ചറിഞ്ഞിട്ടുണ്ടാവില്ല. ഒന്നര വര്‍ഷം മുന്‍പ് ദല്‍ഹിയില്‍ മലയാളി നഴ്‌സുമാരുടെ സമരത്തില്‍ തുടങ്ങി, പിന്നീട് പല ഇടവേളകളിലായി ബോംബെയിലും കൊല്‍ക്കത്തയിലുമെല്ലാം നഴ്‌സുമാര്‍ സമരത്തിനിറങ്ങി. ഇവരില്ലാതെ ആതുരാലയങ്ങളില്‍ ഒന്നും നടക്കില്ല എന്ന യാഥാര്‍ത്ഥ്യത്തില്‍ സമരങ്ങള്‍ വിജയിച്ചു. ഇതുവരെ ഇവരുടെ കഷ്ടപ്പാടുകളിലേക്ക് ഫോക്കസ് കണ്ടെത്താത്ത മാധ്യമങ്ങള്‍ സമരങ്ങള്‍ ലൈവാക്കാന്‍ തുടങ്ങിയത്, തന്റെ സര്‍ട്ടിഫിക്കറ്റുകള്‍ തിരികെ നല്‍കാത്ത മാനേജ്‌മെന്റിന്റെ നടപടിയില്‍ മനംനൊന്ത് മുംബൈയില്‍ മലയാളി നഴ്‌സ് ആത്മഹത്യ ചെയ്തതോടെയാണ്. ഏഷ്യന്‍ ഹാര്‍ട്ട് ആശുപത്രിക്കു മുമ്പില്‍ പടര്‍ന്ന ബീനാ ബേബി എന്ന ആ പെണ്‍കുട്ടിയുടെ രക്തം പകര്‍ന്ന ധൈര്യവും ഊര്‍ജ്ജവുമാണ് പലയിടങ്ങളിലും തങ്ങളെ ചൂഷണം ചെയ്യുന്ന മാനേജ്‌മെന്റുകള്‍ക്കെതിരെ രംഗത്തിറങ്ങാന്‍ നഴ്‌സുമാരെ പ്രേരിപ്പിച്ചത്.

കൊച്ചിയില്‍ മാതാ അമൃതാനന്ദമയിയുടെ ട്രസ്റ്റിന്റെ കീഴില്‍ പ്രവര്‍ത്തിക്കുന്ന അമൃത ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സിലെ വിദ്യാര്‍ത്ഥികള്‍ നടത്തുന്ന സമരം മാസങ്ങളായി രാജ്യത്തിന്റെ വിവധ ഭാഗങ്ങളില്‍ തുടര്‍ന്ന് വരുന്ന സമരത്തിന്റെ ഭാഗമാണ്. ഈ സമരം ദിവസങ്ങള്‍ പിന്നിട്ടിട്ടും മാനേജ്‌മെന്റിന്റെ ഭാഗത്തു നിന്നും പ്രതികരണമൊന്നും ഉണ്ടായിട്ടില്ല. തങ്ങളുടെ യൂണിയന്‍ ഭാരവാഹികളെ പുറത്താക്കിയത് അന്വേഷിക്കുന്നതിനായി നോട്ടീസ് നല്‍കാനെത്തിയ യുണൈറ്റഡ് നഴ്‌സസ് അസോസിയേഷന്‍ ഭാരവാഹികളെ ആര്‍.എസ്.എസ് പ്രവര്‍ത്തകരെ വിട്ട് തല്ലിച്ചതച്ചോടെയാണ സമരം തുടങ്ങിയത്.

കേരളത്തിലെ പ്രശസ്തമായ അമൃത മെഡിക്കല്‍ ഇന്‍സ്റ്റിറ്റിയൂട്ട് ബലമായും മര്‍ദ്ദന മുറകളിലൂടെയുമാണ് സമരക്കാരെ നേരിട്ടത്. ഇതോടെ തങ്ങളുടെ ആവശ്യങ്ങള്‍ പൂര്‍ണ്ണമായും അംഗീകരിക്കാതെ സമരത്തില്‍ നിന്നും പിന്‍മാറില്ലെന്ന് ഉറപ്പിച്ചിരിക്കുകയാണ് ഈ തൊഴിലാളികള്‍. രാജ്യത്ത് ഏറ്റവും കൂടുതല്‍ വിദേശ ഫണ്ട് പറ്റുന്ന സ്ഥാപനങ്ങളിലൊന്നാണ് തൊഴിലാളികളെ അടിമകളെ പോലെ പണിയെടുപ്പിക്കുന്നത്. മനസ്സാക്ഷിയുള്ളവര്‍ ഈ സമരത്തെ പിന്തുണക്കുക.

Malayalam News
Kerala News in English

Advertisement