Categories

പ്രക്ഷോഭങ്ങള്‍ വിലക്കിക്കൊണ്ട് ഈജിപ്തില്‍ പുതിയ നിയമം: പ്രതിഷേധം ശക്തം

egypt-map

കെയ്‌റോ: ഭരണകൂടത്തിനെതിരായ സമരങ്ങളും പ്രക്ഷോഭങ്ങളും തടയാന്‍ ലക്ഷ്യമിട്ടു കൊണ്ട് പ്രതിഷേധ പ്രകടനങ്ങളും യോഗങ്ങളും നിയന്ത്രിക്കുന്ന പുതിയ നിയമത്തിന് ഈജിപ്ത് ഇടക്കാല പ്രസിഡന്റ് അദ്‌ലി മന്‍സൂര്‍ അംഗീകാരം നല്‍കി.

രാജ്യത്ത് മൂന്ന് മാസത്തോളം നിലനിന്ന അടിയന്തരാവസ്ഥ പിന്‍വലിച്ച് പത്ത് ദിവസത്തിനകമാണ് കര്‍ക്കശമായ ഉപാധികളുള്ള നിയമം നിലവില്‍ വന്നത്. പ്രതിഷേധ പ്രകടനങ്ങളും മറ്റും സംഘടിപ്പിക്കുന്നവര്‍ ദിവസങ്ങള്‍ക്ക് മുമ്പ് പൊലീസില്‍ നിന്നും അനുമതി വാങ്ങണമെന്നതുള്‍പ്പെടെ നിരവധി ഉപാധികളാണ് നിയമത്തില്‍ പറഞ്ഞിരിക്കുന്നത്.

പത്തില്‍ കൂടുതല്‍ ആളുകള്‍ കൂടിയിരിക്കുന്നതിന് പ്രത്യേക അനുമതി വാങ്ങണം. അനുമതിയില്ലാതെ സമ്മേളിക്കുന്നവര്‍ക്കെതിരെ ഉപാധികളില്ലാതെ നടപടിയെടുക്കാന്‍ സൈന്യത്തിന് അധികാരം നല്‍കുന്നുണ്ട്. കനത്ത പിഴ ചുമത്താനും വ്യവസ്ഥയുണ്ട്.

പ്രതിഷേധിക്കാനുള്ള അവകാശം നിഷേധിക്കുന്നതാണ് പുതിയ നിയമമെന്നാണ് രാജ്യത്തെ മനുഷ്യാവകാശസംഘടനകള്‍ പ്രതികരിച്ചു. സമാധാനപരമായ പ്രതിഷേധങ്ങളെ ഈ നിയമം ക്രിമിനല്‍വല്‍ക്കരിക്കുന്നു.

ഇത് രാജ്യത്തെ മുബാറക് കാലത്തേയ്ക്ക് തിരിച്ചു കൊണ്ടുപോകുകയാണെന്ന് അറബ് മനുഷ്യാവകാശ ശൃംഖല ഡയറക്ടര്‍ ജമാല്‍ ഈദ് പറഞ്ഞു. ഏതുതരം പ്രതിഷേധവും നിരോധിക്കാന്‍ പൊലീസിന് പൂര്‍ണസ്വാതന്ത്ര്യം നല്‍കുന്നതാണ് പുതിയ നിയമമെന്ന് ഹ്യൂമന്‍ റൈറ്റ്‌സ് വാച്ച് കുറ്റപ്പെടുത്തി.

എന്നാല്‍ രാജ്യത്തിന്റെ സുരക്ഷയും സുസ്ഥിരതയും ഉറപ്പ് വരുത്തുന്നതിന് വേണ്ടിയാണ് പുതിയ നിയമമെന്ന് സര്‍ക്കാര്‍ വൃത്തങ്ങള്‍ പറഞ്ഞു.

കഴിഞ്ഞ രണ്ടര വര്‍ഷത്തിനിടയില്‍ രണ്ട് ഭരണകൂടങ്ങളെ താഴെയിറക്കിയ തെരുവുപ്രക്ഷോഭങ്ങള്‍ രാജ്യത്തെ പ്രധാന രാഷ്ട്രീയ ആയുധമായാണ് കണക്കാക്കുന്നത്.

Tagged with: