കുമ്പള: കാസര്‍ക്കോട് കുമ്പളയില്‍ 20 ഓളം നാടോടിക്കുട്ടികളെ ലൈംഗിക പീഡനത്തിന് വിധേയമാക്കിയ സംഭവത്തില്‍ മുഖ്യപ്രതി പിടിയില്‍. കുമ്പള കുണ്ടങ്കരയടുക്കയില്‍ ഗുജിരിക്കട നടത്തുന്ന നരസിംഹ നായ്ക്ക്കാണ് പോലീസ് അറസ്റ്റിലായത്. നീലേശ്വരത്ത് വെച്ചാണ് അറസ്റ്റ് നടന്നത്.

കുമ്പളയിലെ കന്നഡ മീഡിയം സ്‌കൂളിലെ 20 ഓളം വിദ്യാര്‍ത്ഥിനികളാണ് പീഡനത്തിന് വിധേയരായത്. സ്‌കൂളിന് സമീപം ഗുജിരിക്കടയും അതോടൊപ്പം മഡ്ക്ക ചൂതാട്ടവും നടത്തിവരുന്ന നരസിംഹനായ്ക്ക് ഓരോ കുട്ടികള്‍ക്കും 100 രൂപയും മിഠായിയും നല്‍കിയാണ് മാസങ്ങളായി പീഡിപ്പിച്ച് വന്നതെന്ന് പോലീസ് പറഞ്ഞു. കുട്ടികളുടെ കൈവശം 100ന്റെ നോട്ടുകള്‍ കണ്ടതിനെ തുടര്‍ന്ന് അധ്യാപികമാര്‍ അന്വേഷിച്ചപ്പോഴാണ് ഗുജിരിക്കട നടത്തുന്ന നരസിംഹ നായ്ക്കാണ് പണം തന്നതെന്ന് കുട്ടികള്‍ പറഞ്ഞത്. കൂടുതല്‍ അന്വേഷിച്ചപ്പോഴാണ് പീഢനവിവരം പുറത്ത് വന്നത്. അധികൃതര്‍ കാസര്‍കോട് ചൈല്‍ഡ്‌ലൈന്‍ പ്രവര്‍ത്തകരെ വിവരമറിയിച്ചതിനെ തുടര്‍ന്ന് ഇവരെത്തി കുട്ടികളില്‍ നിന്നും വിശദമായ മൊഴിയെടുത്തു.

ചൈല്‍ഡ് ലൈന്‍ പ്രവര്‍ത്തകര്‍ അന്വേഷണം നടത്തുകയും എസ്.പിക്കും കലക്ടര്‍ക്കും പരാതി നല്‍കുകയും ചെയ്തു. അതിനിടെ കഴിഞ്ഞ ഒന്നരവര്‍ഷമായി പീഡനം നടക്കുന്നുണ്ടെന്നാണ് റിപ്പോര്‍ട്ട്. ലോട്ടറി വില്‍പ്പനക്കാരനെതിരേ നിരവധിതവണ പരാതിയുയുര്‍ന്നിട്ടും സ്‌കൂള്‍ അധികൃതര്‍ ഒന്നും ചെയ്തില്ലെന്ന ആക്ഷേപം ഉയര്‍ന്നിട്ടുണ്ട്.