കോഴിക്കോട്: ഇടത് പക്ഷ ഏകോപന സമിതി സംസ്ഥാന ജനറല്‍ സെക്രട്ടറി സ്ഥാനത്ത് നിന്ന് എം.ആര്‍. മുരളിയെ നീക്കി. ഇന്നലെ ഷൊര്‍ണ്ണൂരില്‍ ചേര്‍ന്ന സംസ്ഥാന കമ്മിറ്റിയുടെതാണ് തീരുമാനം. എം.ആര്‍ മുരളിയെ നീക്കുന്നതിനെതിരെ രൂക്ഷമായ എതിര്‍പ്പാണ് യോഗത്തില്‍ ഉയര്‍ന്നത്. അതേസമയം എം.ആര്‍. മുരളിയെ നീക്കിയതല്ലെന്നും ഷൊര്‍ണ്ണൂര്‍ മുനിസിപ്പല്‍ ചെയര്‍മാന്‍ എന്ന നിലയില്‍ തിരക്കുള്ളതിനാല്‍ മാറി നില്‍ക്കുകയാണെന്നുമാണ് ഔദ്യോഗിക ഭാഷ്യം.

ഇടത് പക്ഷ ഏകോപന സമിയുടെ യു.ഡി.എഫ് ബന്ധത്തെച്ചൊല്ലി സംഘടനക്കകത്തുയര്‍ന്ന രൂക്ഷമായ അഭിപ്രായ വ്യത്യസമാണ് എം.ആര്‍ മുരളിയെ നീക്കുന്നതിലേക്ക് നയിച്ചത്. ഷൊര്‍ണ്ണൂര്‍ മുനിസിപ്പാലിറ്റിയില്‍ മുരളി വിഭാഗം യു.ഡി.എഫുമായി ചേര്‍ന്ന് അധികാരം പങ്കിട്ടതിനെതിരെ നേരത്തെ തന്നെ സംഘടനക്കുള്ളില്‍ വിമര്‍ശനമുയര്‍ന്നിരുന്നു. കുന്നംകുളം സംസ്ഥാന കണ്‍വെന്‍ഷനില്‍ തന്നെ മുരളിയെ നീക്കുവാന്‍ ശ്രമം നടന്നിരുന്നുവെങ്കിലും മുരളി അനുകൂലികളുടെ ചെറുത്ത് നില്‍പ്പിനെ തുടര്‍ന്ന് നടക്കാതെ പോവുകയായിരുന്നു.

ഇന്നലത്തെ യോഗത്തില്‍ എം.ആര്‍. മുരളിയെ നീക്കുന്നതിനെതിരെ മലപ്പുറത്തെ മോഹന്‍കുമാറിന്റെ നേതൃത്വത്തിലുള്ള സംഘവും കുന്ദംകുളം വിഭാഗവും നിലപാട് സ്വീകരിച്ചിരുന്നു. എന്നാല്‍ ഇതിനെതിരെ ടി.പി ചന്ദ്ര ശേഖരന്റെ നേതൃത്വത്തില്‍ ഒരു വിഭാഗം ശക്തമായി രംഗത്ത് വരികയായിരുന്നു.

നിയമസഭാ തിരഞ്ഞെടുപ്പില്‍ യു.ഡി.എഫ് പിന്തുണയോടെ മത്സരിക്കണമെന്നാണ് എം.ആര്‍ മുരളിയുടെ നേതൃത്വത്തിലുള്ള ഷൊര്‍ണ്ണൂര്‍ വിഭാഗത്തിന്റെയും കെ.എം ഷാജഹാന്റെ നേതൃത്വത്തിലുള്ള തിരുവനന്തപുരം വിഭാഗത്തിന്റെയും ആവശ്യം.

യു.ഡി.എഫും എല്‍.ഡി.ഫുമായി ഇടത്പക്ഷ ഏകോപന സമിതിക്ക് തിരഞ്ഞെടുപ്പ് ബന്ധമുണ്ടാകില്ലെന്ന് കഴിഞ്ഞ ദിവസം വടകരയില്‍ നടന്ന പൊതുയോഗത്തില്‍ ടി.പി ചന്ദ്രശേഖരന്‍ വ്യക്തമാക്കിയിരുന്നു. യു.ഡി.എഫ് നിരുപാധികം പിന്തുണ നല്‍കുകയാണെങ്കില്‍ പാര്‍ട്ടി സ്ഥാനാര്‍ഥിയെ പിന്‍വലിക്കുമെന്നും ടി.പി ചന്ദ്രശേഖരന്‍ അണികള്‍ക്ക് ഉറപ്പ് നല്‍കി. കഴിഞ്ഞ ഒമ്പതര വര്‍ഷക്കാലം വി.എസിനെ എതിര്‍ക്കുകയാണ് സി.പി.ഐ.എം ചെയ്തത്. ഒരു മുതിര്‍ന്ന കമ്മ്യൂണിസ്റ്റ് നേതാവിനെക്കുറിച്ച് ഒരിക്കലും പറയാന്‍ പാടില്ലാത്തത് അദ്ദേഹത്തെക്കുറിച്ച് അവര്‍ പറഞ്ഞു. ഇപ്പോള്‍ വി.എസിനെ ഉയര്‍ത്തിക്കൊണ്ട് വരുന്നത് അവര്‍ക്ക് അധികാരത്തില്‍ തിരിച്ചെത്താനാണ്. വി.എസിന്റെ രാഷ്ട്രീയം എല്‍.ഡി.എഫിനും യു.ഡി.എഫിനും ഒരുപോലെ എതിരാണെന്നും അദ്ദേഹം വ്യക്തമാക്കിയിരുന്നു.

ഇടതുപക്ഷ ഏകോപന സമിതിയുടെ പുതിയ പ്രസിഡന്റായി ഡോ. ആസാദിനെയും ജനറല്‍ സെക്രട്ടറിയായി ടി.പി ചന്ദ്രശേഖരനെയും തിരഞ്ഞെടുത്തിട്ടുണ്ട്.