മഡ്രിഡ്: സ്പാനിഷ് ലീഗില്‍ ബാര്‍സിലോനയ്ക്ക് വേണ്ടി തുടര്‍ച്ചയായി 17-ാം മല്‍സരത്തിലും ഗോളടിച്ച് മെസ്സി വീണ്ടും ചരിത്രം സൃഷ്ടിക്കുന്നു.

17 കളിയില്‍ മെസ്സിയുടെ 27-ാം ഗോളാണിത്. ലീഗില്‍ മെസ്സിയുടെ സീസണിലെ ഗോള്‍ നേട്ടം ഇതോടെ 40 ആയി. [innerad]

1930ല്‍ തുടര്‍ച്ചയായി 16 കളിയില്‍ ഗോളടിച്ച പോളണ്ടുകാരന്‍ തിയഡോര്‍ പെവ്‌റ്റെറെക്കിന്റെ റെക്കോര്‍ഡാണ് മെസ്സി ഇതോടെ മറികടന്നത്. തിയഡോറിന്റെ ഗോള്‍ നേട്ടം 16 കളിയില്‍ 22 ആയിരുന്നു.

ഡിപോര്‍ട്ടിവോ ലാ കൊറൂണയ്‌ക്കെതിരെ പകരക്കാരനായി ഇറങ്ങി 88-ാം മിനിറ്റിലായിരുന്നു മെസ്സിയുടെ ഗോള്‍. ബാര്‍സ 2-0നു ജയിച്ചു. ആദ്യ ഗോള്‍ അലക്‌സിസ് സാഞ്ചസിന്റെ വകയായിരുന്നു.

പോയിന്റ് നിലയില്‍ താഴേത്തട്ടിലുള്ള ഡിപോര്‍ട്ടിവോയ്‌ക്കെതിരെ മെസ്സിക്കു പുറമേ അഞ്ച് സ്പാനിഷ് ഇന്റര്‍ നാഷനല്‍ താരങ്ങളെയും പുറത്തിരുത്തിയാണ് ബാര്‍സ കളി തുടങ്ങിയത്.  ഈ വിജയത്തോടെ ബാര്‍സ ഒന്നാം സ്ഥാനത്തു 14 പോയിന്റ് മുന്നിലെത്തി.