Categories

വിമതരുടേത് കര്‍ണാടക പോലീസിനേക്കാള്‍ വലിയ ക്രൂരത: മഅദനി

ബംഗളൂരു: പാര്‍ട്ടി വിമതരുടെ പ്രവര്‍ത്തനം കര്‍ണ്ണാടക പോലീസിനേക്കാള്‍ വലിയ ക്രൂരതയാണെന്ന് പി.ഡി.പി ചെയര്‍മാന്‍ അബ്ദുന്നാസിര്‍ മഅദനി. തന്നെ ജയിലിലടച്ച് രണ്ടാഴ്ച തികയും മുമ്പ് പാര്‍ട്ടിയില്‍ വിമത പ്രവര്‍ത്തനം തുടങ്ങി ഇവര്‍ പ്രവര്‍ത്തകരെ വേദനിപ്പിക്കുകയായിരുന്നു. ഇത് വ്യാജ മൊഴികളുടെ അടിസ്ഥാനത്തില്‍ തന്നെ അറസ്റ്റ് ചെയ്ത് തുറുങ്കിലടച്ച കര്‍ണാടക പോലീസിന്റെ പ്രവര്‍ത്തനത്തെക്കാളും വലിയ ക്രൂരതയാണന്നും പരപ്പന അഗ്രഹാര ജയിലില്‍നിന്ന് അഡ്വ. കാഞ്ഞിരമറ്റം സിറാജ് മുഖേന നല്‍കിയ പത്രക്കുറിപ്പില്‍ മഅദനി പറഞ്ഞു.

താന്‍ ജയിലിലായ ഉടന്‍ ‘മഅദനിയില്ലാത്ത’ പാര്‍ട്ടിയുണ്ടാക്കി സ്വന്തം ഭാവി സുരക്ഷിതരാക്കാന്‍ ശ്രമിച്ചവര്‍ പാര്‍ട്ടി പ്രവര്‍ത്തകരില്‍ ആരെയെങ്കിലും കൂടെ നിര്‍ത്താനുള്ള അവസാനത്തെ അടവായാണ് മഅദനിയുടെ മോചനത്തിനായി സമരം നടത്തുമെന്ന് പറയുന്നത്. ഇവരുടെ സമരത്തിലൂടെ മോചിതനാകുന്നതിനേക്കാള്‍ ഭേദം ജയിലില്‍ അന്ത്യം സംഭവിക്കുന്നതാണെന്നും അദ്ദേഹം പറഞ്ഞു.

മറ്റ് പാര്‍ട്ടികളില്‍ ലയിച്ച് മുന്നണി പ്രവേശം സാധ്യമാക്കാനാണ് ചിലര്‍ വിമത പ്രവര്‍ത്തനം തുടങ്ങിയത്. ജയിലിലടക്കപ്പെട്ട് രണ്ടാഴ്ച കഴിയും മുമ്പേ പാര്‍ട്ടിയില്‍ ഉള്‍പ്പാര്‍ട്ടി ജനാധിപത്യം നഷ്ടമായത് എങ്ങനെയെന്ന് മനസ്സിലാകുന്നില്ല. ‘മഅദനിയില്ലാത്ത പി.ഡി.പി’ എന്ന ആശയവുമായി പ്രവര്‍ത്തകരെ തെറ്റിദ്ധരിപ്പിക്കാന്‍ ശ്രമിച്ച ഒന്നുരണ്ട് പേരൊഴികെ മുഴുവന്‍ പാര്‍ട്ടി നേതാക്കളെയും ഒരുമിച്ചുകൊണ്ടുപോകണമെന്നാണ് പാര്‍ട്ടി ചെയര്‍മാന്‍ എന്ന നിലയിലുള്ള ആഗ്രഹമെന്നും മഅദനി വ്യക്തമാക്കി.

പാര്‍ശ്വവത്കരിക്കപ്പെട്ടവരുടെ കൂടെ നില്‍ക്കുക എന്ന പ്രഖ്യാപിത നയത്തില്‍നിന്ന് വ്യതിചലിക്കാതെ പാര്‍ട്ടിയെ മുന്നോട്ട് നയിക്കാന്‍ കഴിയുന്ന ഏതൊരാളിനെയും ചെയര്‍മാനാക്കാന്‍ പൂര്‍ണ സമ്മതമാണ്. നിലവിലെ സാഹചര്യത്തില്‍ പാര്‍ട്ടി സെന്‍ട്രല്‍ ആക്ഷന്‍ കമ്മിറ്റി അഴിച്ചുപണിയുന്നതിനെക്കുറിച്ചും വിമതര്‍ക്കെതിരെ നടപടിയെടുക്കുന്നതിനെക്കുറിച്ചും അഭിപ്രായം അറിയുന്നതിന് സംസ്ഥാനത്തെ മുഴുവന്‍ നിയോജക മണ്ഡലങ്ങളില്‍ നിന്നുള്ള ഭാരവാഹികളുടെ സ്‌പെഷല്‍ പ്രതിനിധി കണ്‍വെന്‍ഷന്‍ ഞായറാഴ്ച രാവിലെ 10ന് എറണാകുളം സാസ് ടവറില്‍ വിളിച്ചതായും മഅദനി അറിയിച്ചു.

LEAVE YOUR COMMENTS

Press ctrl+g to toggle between English and Malayalam.