Administrator
Administrator
കേരള ടൂറിസം വീഡിയോ മോഷണമെന്ന് ആരോപണം
Administrator
Friday 15th October 2010 2:45pm

കേരള ടൂറിസം പ്രചാരണത്തിനായി 12 കോടി ചെലവഴിച്ച് നിര്‍മ്മിച്ച ‘യുവര്‍ മുമന്റ്‌സ് ഈസ് വെയിറ്റിങ്’ എന്ന വീഡിയോ വിവാദത്തിലേക്ക്. മെക്‌സിക്കന്‍ ടൂറിസം ഡിപ്പാര്‍ട്ട്‌മെന്റ് പുറത്തിറക്കിയ പരസ്യ ചിത്രത്തോട് സാമ്യമുള്ളതാണ് വീഡിയോയെന്നാണ് ആരോപണം.

മെക്‌സിക്കന്‍ ടൂറിസത്തിന് വേണ്ടി സിനിമാ സംവിധായകനായ ഡീഗോ പെര്‍ണിയ തയ്യാറാക്കിയ ‘എസ്‌ട്രെല്ലാസ് ഡെല്‍ ബൈസെന്റെനാരിയോ’ എന്ന വീഡിയോയുമായി കേരളാ ടൂറിസം വീഡിയോയ്ക്ക് സാദൃശ്യം ഉണ്ടെന്നാണ് ആരോപണം. സ്റ്റാര്‍ക്ക് കമ്യൂണിക്കേഷന് വേണ്ടി ‘സൂസൂ’ ഫെയിം പ്രകാശ് വര്‍മയാണ് കേരള ടൂറിസത്തിന് വേണ്ടി വീഡിയോ സംവിധാനം ചെയ്തത്.

ലണ്ടനിലെ സാച്ചി ഗാലറിയില്‍ നടന്‍ മോഹന്‍ലാലടക്കം പല ഉന്നതരുടെയും സാന്നിധ്യത്തിലാണ് വീഡിയോ പ്രകാശനം ചെയ്തത്.

മെക്‌സിക്കോ സന്ദര്‍ശിക്കാന്‍ അതീവ സുന്ദരിയായ ഒരു സ്ത്രീ വരുന്നതാണ് ഡീഗോ പെര്‍ണിയയുടെ വീഡിയോയിലെ പ്രമേയം. മൂന്ന് മിനിറ്റും ഒരു സെക്കന്റുമാണ് എസ്‌ട്രെല്ലാസ് ഡെല്‍ ബൈസെന്റെനാരിയോയുടെ ദൈര്‍ഘ്യം. കേരളം സന്ദര്‍ശിക്കാന്‍ ഒരു സുന്ദരി വരുന്നതാണ് പ്രകാശ് വര്‍മയുടെ വീഡിയോയുടെ സ്‌റ്റോറി ബോര്‍ഡ്. ദൈര്‍ഘ്യമാകട്ടെ മൂന്ന് മിനിറ്റും.

കഥകളി നടന്റെ ഭാവവാഹാദികളാണ് കേരളം സന്ദര്‍ശിക്കാന്‍ എത്തുന്ന യുവതിയെ ആകര്‍ഷിക്കുന്നതെങ്കില്‍ മെക്‌സിക്കന്‍ തനത് കലാകാരന്റെ ഭാവവാഹാദികള്‍ ഡീഗോ പെര്‍ണിയയുടെ യുവതിയെ ആകര്‍ഷണവലയത്തിലാക്കുന്നു. നാടന്‍ കലാരൂപങ്ങളായ തെയ്യവും മറ്റും നമ്മുടെ മോഡലിനെ ആവേശിക്കുമ്പോള്‍ മെക്‌സിക്കന്‍ തനത് കലാരൂപങ്ങള്‍ പെര്‍ണിയയുടെ നായികയെ മാസ്മരികവലയത്തിലാക്കുന്നു.

വീഡിയോയുടെ അവസാനം കുറുക്കനെ മെരുക്കുകയും കുറുക്കനില്‍ ചാഞ്ഞുകൊണ്ട് പ്രകൃതിയുമായി താദാത്മ്യം പ്രാപിക്കുകയുമാണ് മെക്‌സിക്കന്‍ വീഡിയോയിലുള്ളത്. കേരള ടൂറിസത്തിന്റെ വീഡിയോയില്‍ കുതിരയ്ക്ക് പകരം ആനയാണ്. ആനയില്‍ ചാഞ്ഞുകിടന്നുകൊണ്ട് കേരള ടൂറിസം വീഡിയോയിലെ നായിക പ്രകൃതിയില്‍ ലയിക്കുന്നു.

രണ്ട് വീഡിയോയിലെയും രംഗങ്ങള്‍ സ്ലോ മോഷനിലാണ് ദൃശ്യമാകുക. ഉപയോഗിച്ചിരിക്കുന്ന ക്യാമറാ ടെക്‌നിക്കിനും വളരെ സാമ്യതയുണ്ട്. വിവാദത്തെക്കുറിച്ച് ടൂറിസം അധികൃതര്‍ ഇതുവരെ പ്രതികരിച്ചിട്ടില്ല.

Advertisement