തിരുവനന്തപുരം: സാമ്പത്തിക സംവരണം നടപ്പാക്കണമെന്ന് താന്‍ പറഞ്ഞതായുള്ള വാര്‍ത്തകള്‍ നിഷേധിച്ച് മന്ത്രി കടകംപള്ളി സുരേന്ദ്രന്‍. താന്‍ പറഞ്ഞത് മുന്നോക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്കും സംവരണം ഏര്‍പ്പെടുത്തണമെന്നാണ് പാര്‍ട്ടി നിലാപാടെന്നായിരുന്നെന്ന് സുരേന്ദ്രന്‍ പറഞ്ഞു.


Also read ‘ഇതൊക്കെയെന്ത്’; 67 പന്തില്‍ 200; ട്വന്റി-20യില്‍ ഇരട്ടശതകവുമായി യുവതാരം 


സി.പി.ഐ.എമ്മിന്റെ സംവരണ വിഷയത്തിലെ നിലപാട് സുവ്യക്തമാണെന്നും പാര്‍ട്ടി സംസ്ഥാന കമ്മിറ്റിയംഗമന്നെ നിലയില്‍ ആ നിലപാടുകളെക്കുറിച്ച് വ്യക്തമായ ബോധ്യത്തോടെയാണ് താന്‍ സംസാരിച്ചതെന്നും മന്ത്രി ഫേസ്ബുക്ക് പോസ്റ്റിലൂടെ വിശദീകരിച്ചു.
പിന്നാക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്ക് സംവരണത്തില്‍ മുന്‍ഗണന നല്‍കണമെന്നും, അത്തരക്കാരുടെ അഭാവത്തില്‍ പിന്നാക്ക സമുദായത്തിലെ തന്നെ സാമ്പത്തികമായി മുന്നോക്കം നില്‍ക്കുന്നവരെ ആ സമുദായ സംവരണത്തിന് പരിഗണിക്കണമെന്നുമുള്ളതാണ് പാര്‍ട്ടി നിലപാട്. സാമുദായിക സംവരണം അട്ടിമറിക്കപ്പെടരുത്. എന്നാല്‍ മുന്നോക്ക സമുദായങ്ങളില്‍ സാമ്പത്തികമായി പിന്നാക്കം നില്‍ക്കുന്നവരുണ്ടെന്നും അദ്ദേഹം പറഞ്ഞു.


Dont miss ഉമേഷ്ബാബുവിനെ പരിപാടിയില്‍ പങ്കെടുക്കരുതെന്ന് സി.പി.ഐ.എം നേതൃത്വത്തിന്റെ തിട്ടൂരം പയ്യന്നൂരില്‍ യുക്തിവാദി സംഘത്തിന്റെ പരിപാടി ഒഴിവാക്കി


മുന്നോക്ക സമുദായങ്ങളില്‍ സാമ്പത്തികമായി പിന്നാക്കം നില്‍ക്കുന്ന ഇത്തരക്കാര്‍ക്ക് ചെറിയ ശതമാനം സംവരണം നല്‍കണമെന്നത് പാര്‍ട്ടി നയമാണെന്നും ഇത് ആവര്‍ത്തിക്കുക മാത്രമാണ് താന്‍ ചെയ്തതെന്നും സുരേന്ദ്രന്‍ പറഞ്ഞു.
പോസ്റ്റിന്റെ പൂര്‍ണ്ണ രൂപം:

‘ശ്രീപുഷ്പക ബ്രാഹ്മണ സംഘത്തിന്റെ പരിപാടിയില്‍ പ്രസംഗിക്കവേ ഞാന്‍ പറഞ്ഞത് ‘മുന്നോക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്ക് സംവരണം നല്‍കണമെന്നത് എന്റെ പാര്‍ട്ടിയുടെ നിലപാടാണെന്നാണ്. ‘ സി.പി. ഐ.എമ്മിന്റെ സംവരണ വിഷയത്തിലെ നിലപാട് സുവ്യക്തമാണ്. പാര്‍ട്ടി സംസ്ഥാന കമ്മിറ്റിയംഗമെന്ന നിലയില്‍ ആ നിലപാടുകളെ കുറിച്ച് വ്യക്തമായ ബോധ്യത്തോടെയാണ് സംസാരിച്ചത്.

പിന്നാക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്ക് സംവരണത്തില്‍ മുന്‍ഗണന നല്‍കണമെന്നും, അത്തരക്കാരുടെ അഭാവത്തില്‍ പിന്നാക്ക സമുദായത്തിലെ തന്നെ സാമ്പത്തികമായി മുന്നോക്കം നില്‍ക്കുന്നവരെ ആ സമുദായ സംവരണത്തിന് പരിഗണിക്കണമെന്നുമുള്ളതാണ് പാര്‍ട്ടി നിലപാട്. സാമുദായിക സംവരണം അട്ടിമറിക്കപ്പെടരുത്. എന്നാല്‍ മുന്നോക്ക സമുദായങ്ങളില്‍ സാമ്പത്തികമായി പിന്നാക്കം നില്‍ക്കുന്നവരുണ്ട്.

കഷ്ടത അനുഭവിക്കുന്നവരുണ്ട്. അവര്‍ക്ക് ചെറിയ ശതമാനം സംവരണം നല്‍കണമെന്നതും കൂടി ചേര്‍ന്നതാണ് സി പി ഐ എം അംഗീകരിച്ച നയം. ഈ നയം ആവര്‍ത്തിക്കുക മാത്രമാണ് ഞാന്‍ ചെയ്തത്. അതിനെ ദുര്‍വാഖ്യാനം ചെയ്യുകയും, കുപ്രചാരണം നടത്തുകയും ചെയ്യുന്നവര്‍ക്ക് പല ലക്ഷ്യങ്ങളും ഉണ്ടാകും. അത്തരക്കാര്‍ക്ക് വേണ്ടിയല്ല ഈ വിശദീകരണം. തെറ്റിദ്ധരിക്കപ്പെടാതിരിക്കേണ്ട ജനവിഭാഗത്തിന് വേണ്ടിയാണ്. ജാതി-മത വേര്‍തിരിവ് ഉണ്ടാക്കി നേട്ടം കൊയ്യാനിറങ്ങുന്നവരെ, ദുര്‍വാഖ്യാനം ചമയ്ക്കുന്നവരെ ജനങ്ങള്‍ തിരിച്ചറിയുന്നുണ്ട്.

കഴക്കൂട്ടം മണ്ഡലത്തില്‍ സംഘപരിവാറിന്റെ ദുഷ്പ്രചാരണങ്ങളെയും, കടന്നാക്രമണങ്ങളെയും ചെറുത്ത് തോല്‍പ്പിച്ച് എന്നെയും, ഇടതുപക്ഷ പ്രസ്ഥാനത്തെയും വിജയിപ്പിച്ചത് അതിന്റെ തെളിവാണ്. ഗീബല്‍സിയന്‍ നുണ പ്രചാരണം കൊണ്ട് തകര്‍ക്കാനുള്ള നീക്കം ജാതി-മത വര്‍ഗീയതയുടെ കുട പിടിക്കുന്നവരുടേതാണ്. അത് അവജ്ഞയോടെ ഇന്നാട്ടിലെ പ്രബുദ്ധരായ ജനങ്ങള്‍ തളളികളയുമെന്ന് ഉറപ്പുണ്ട്.’