Administrator
Administrator
വേങ്ങരയില്‍ ലീഗ് സംഘര്‍ഷം; കെ അജിതയെ തിരിച്ചയച്ചു
Administrator
Saturday 9th April 2011 7:11pm

k-ajitha in vengera വേങ്ങര: ഐസ്‌ക്രീം കേസില്‍ ആരോപണ വിധേയനായ പി.കെ കുഞ്ഞാലിക്കുട്ടിക്കെതിരെ വേങ്ങരയില്‍ തിരഞ്ഞെടുപ്പ് പ്രചരണത്തിനെത്തിയ അന്വേഷി പ്രസിഡന്റ് കെ. അജിതയെ മുസ്‌ലിം ലീഗ് പ്രവര്‍ത്തകര്‍ തടഞ്ഞു. വേങ്ങര ടൗണില്‍ പ്രസംഗത്തിനായി ഒരുക്കിയ വേദിയിലേക്ക് സംഘടിച്ചെത്തിയ ലീഗ് പ്രവര്‍ത്തകര്‍ അജിതയെ പ്രസംഗിക്കാന്‍ അനുവദിക്കില്ലെന്ന് പ്രഖ്യാപിക്കുകയായിരുന്നു.

കുഞ്ഞാലിക്കുട്ടിക്കെതിരെ പ്രസംഗിക്കാന്‍ ആരെയും അനുവദിക്കില്ലെന്ന പ്രഖ്യാപനവുമായാണ് നിരവധി ലീഗ് പ്രവര്‍ത്തകര്‍ വാഹനത്തില്‍ സംഘടിച്ചെത്തിയത്. സംഘര്‍ഷാന്തരീക്ഷമുണ്ടായതോടെ പോലീസ് ഇടപെടുകയും അജിതയെ സ്ഥലത്ത് നിന്ന് മാറ്റുകയുമായിരുന്നു. പിന്നീട് മലപ്പുറം പ്രസ്‌ഫോറത്തില്‍ അജിത മാധ്യമപ്രവര്‍ത്തകരുമായി സംസാരിക്കുമ്പോള്‍ ലീഗ് പ്രവര്‍ത്തകര്‍ പ്രകടനമായെത്തിയത് സംഘര്‍ഷാന്തരീക്ഷം സൃഷ്ടിച്ചു.

അതേസമയം മുന്‍കൂര്‍ അനുമതിയെടുക്കാത്തതിനാല്‍ അജിതക്ക് വേങ്ങരയില്‍ പ്രസംഗിക്കാന്‍ കഴിയില്ലെന്ന് പോലീസ് അറിയിച്ചു. എന്നാല്‍ മൈക്ക് പെര്‍മിഷനുള്ള പ്രചാരണവാഹനത്തില്‍ പ്രസംഗിക്കുന്നതിന് മുന്‍കൂര്‍ അനുമതി ആവശ്യമില്ലെന്ന് അജിത വ്യക്തമാക്കി. അജിതയുടെ നേതൃത്വത്തില്‍ പ്രവര്‍ത്തിക്കുന്ന സ്ത്രീവേദിയുടെ ആഭിമുഖ്യത്തിലാണ് വേങ്ങരയില്‍ കുഞ്ഞാലിക്കുട്ടിക്കെതിരെ പ്രചാരണം സംഘടിപ്പിച്ചത്.

2006ല്‍ നിയമസഭാ തിരഞ്ഞെടുപ്പില്‍ കുറ്റിപ്പുറത്തും കുഞ്ഞാലിക്കുട്ടിക്കെതിരെ സ്ത്രീവേദി പ്രചാരണത്തിയപ്പോള്‍ ലീഗ് പ്രവര്‍ത്തകര്‍ സംഘര്‍ഷമുണ്ടാക്കിയിരുന്നു. അന്ന് അജിത പ്രസംഗിക്കുന്ന വേദി ലീഗ് പ്രവര്‍ത്തകര്‍ കയ്യേറുകയായിരുന്നു.

Advertisement