ചിറ്റൂര്‍: കെ.കൃഷ്ണന്‍കുട്ടി വിഭാഗത്തെ യു.ഡി.എഫില്‍ നിന്ന് പുറത്താക്കണമെന്ന് കോണ്‍ഗ്രസ് നേതാവും ചിറ്റൂരിലെ സ്ഥാനാര്‍ത്ഥിയുമായ കെ.അച്ച്യുതന്‍. തിരഞ്ഞെടുപ്പ് സമയത്ത് ചിറ്റൂരില്‍ യു.ഡി.എഫിനെ പരാജയപ്പെടുത്താന്‍ കൃഷ്ണന്‍കുട്ടിയും കൂട്ടരും ശ്രമിച്ചുവെന്നും അച്ച്യുതന്‍ ആരോപിച്ചിട്ടുണ്ട്.

കൃഷ്ണന്‍കുട്ടി വിഭാഗത്തെ യു.ഡി.എഫ് യോഗങ്ങളില്‍ പങ്കെടുപ്പിക്കരുതെന്നാവശ്യപ്പെട്ട് കത്തയക്കുമെന്ന് അച്ച്യുതന്‍ വ്യക്തമാക്കിയിട്ടുണ്ട്. പാലക്കാട്, നെന്‍മാറ, മണ്ണാര്‍ക്കാട് എന്നീ മണ്ഡലങ്ങളില്‍ യു.ഡി.എഫ് സ്ഥാനാര്‍ത്ഥികളെ തോല്‍പ്പിക്കാന്‍ സോഷ്യലിസ്റ്റ് ജനത പ്രവര്‍ത്തിച്ചുവെന്നും അച്ച്യുതന്‍ ആരോപിച്ചു. എന്നാല്‍ വീരേന്ദ്രകുമാറിനോട് എതിര്‍പ്പില്ലെന്നും അദ്ദേഹം വ്യക്തമാക്കി.

സോഷ്യലിസ്റ്റ് ജനതയ്ക്ക് നല്‍കാമെന്നേറ്റ ചിറ്റൂര്‍ സീറ്റ് യു.ഡി.എഫിന് നല്‍കിയതോടെയാണ് പ്രശ്‌നങ്ങള്‍ തുടങ്ങിയത്. തുടര്‍ന്ന് അച്ച്യുതനും കൃഷ്ണന്‍കുട്ടിയും തമ്മില്‍ കടുത്ത വാക്‌പോരാട്ടം നടന്നിരുന്നു. മുന്നണിയിലെത്തുമ്പോഴുണ്ടായിരുന്ന ധാരണ യു.ഡി.എഫ് തെറ്റിച്ചുവെന്നും കെ അച്ച്യുതനുവേണ്ടി പ്രചാരണരംഗത്തുണ്ടാവില്ലെന്നും കൃഷ്ണന്‍കുട്ടി വ്യക്തമാക്കിയിരുന്നു.