justice-cs-rajanകൊച്ചി: ശ്രീപത്മനാഭസ്വാമി ക്ഷേത്രത്തില്‍ നിന്ന് കണ്ടെടുത്ത സ്വര്‍ണ്ണങ്ങളും മറ്റ് ആഭരണങ്ങളും നിധിയല്ലെന്ന് സുപ്രീം കോടതി നിയോഗിച്ച അന്വേഷണ സംഘത്തില്‍പ്പെട്ട ജസ്റ്റിസ് സി.എസ് രാജന്‍ പറഞ്ഞു. ആരും അറിയാതെ കിടക്കുന്ന സ്വത്തുക്കളെയാണ് നിധിയെന്ന് പറയുന്നത്. എന്നാല്‍ ഇവിടെ സ്വത്തുള്ള കാര്യം എല്ലാവര്‍ക്കും അറിയാമായിരുന്നു. അത് എണ്ണിക്കണക്കാക്കാന്‍ മാത്രമാണ് കോടതി പറഞ്ഞത്.

കാലങ്ങളായി സ്വാമിക്ക് രാജാക്കന്‍മാര്‍ സമര്‍പ്പിച്ച കാണിക്കകളാണിവ. ഇത് സ്വാമിക്ക് അര്‍ഹതപ്പെട്ടതാണ്. രാജാക്കാന്‍മാര്‍ എല്ലാ ദിവസവും സ്വാമിയെ തൊഴാന്‍ വരുമ്പോള്‍ സ്വര്‍ണ്ണാഭരണം കാണിക്ക സമര്‍പ്പിക്കാറുണ്ട്. 600 കൊല്ലത്തോളം കാലം ഇങ്ങിനെ നിക്ഷേപിച്ച സ്വര്‍ണ്ണമാണിത്. നരസിംഹമൂര്‍ത്തിയുടെയും പത്മനാഭസ്വാമിയുടെയും ആഭരണങ്ങളാണവ.

കല്ലറി തുറന്നപ്പോള്‍ കണ്ട കാഴ്ച അവിസ്മരണീയമായിരുന്നു. കണ്ണഞ്ചിപ്പിക്കുന്ന അനുഭവമായിരുന്നു അത്. ഇത് ദൈവനിയോഗമായാണ് ഞാന്‍ കാണുന്നത്. വാക്കുകള്‍ക്കതീതമായ അനുഭവമായിരുന്നു അത്. സ്വര്‍ണ്ണമാലയും വളയുമൊക്കെ കണ്ട് പരിചയിച്ചവര്‍ക്ക് 45 ക്യാരറ്റ് സ്വര്‍ണ്ണത്തിന്റെ വലിയ ശേഖരം കണ്ടപ്പോള്‍ അത് അനിര്‍വ്വചനീയമായ അനുഭവമായിരുന്നു.

ഇതു സംബന്ധിച്ച റിപ്പോര്‍ട്ട് സുപ്രീം കോടതിക്ക് സമര്‍പ്പിക്കും. ഒരു കല്ലറ കൂടി ഇനി തുറന്ന് പരിശോധിക്കേണ്ടതുണ്ട്. ഈ നിലവറയുടെ താഴ് തുറക്കാന്‍ പ്രയാസമുള്ളതാണ്. എട്ടിന് ചേരുന്ന യോഗത്തില്‍ ഇതു സംബന്ധിച്ച് തീരുമാനമെടുക്കും. നിലവറ തുറക്കാന്‍ സമയമെടുക്കുകയാണെങ്കില്‍ സുപ്രീം കോടതിത്ത് ഇടക്കാല റിപ്പോര്‍ട്ട് സമര്‍പ്പിക്കുമെന്നും അദ്ദേഹം പറഞ്ഞു.