Categories

തിരക്കും ഉന്തും തള്ളും ; കെജ്‌രിവാളിന്റെ ജനതാ ദര്‍ബാര്‍ പരിപാടി അലങ്കോലപ്പെട്ടു

kejriwal-new-2

ന്യൂദല്‍ഹി: ജനങ്ങളുടെ പരാതി നേരിട്ട് കേള്‍ക്കാനായി മുഖ്യമന്ത്രി ##അരവിന്ദ് കെജ്‌രിവാളും മന്ത്രിമാരും ഇന്ന് നടത്തിയ ജനസമ്പര്‍ക്ക പരിപാടി പിരിച്ചുവിട്ടു.

പരാതിയുമായി എത്തിയ ജനങ്ങളുടെ തിരക്ക് നിയന്ത്രണാതീതമായതുകാരണമാണ് പരിപാടി സര്‍ക്കാര്‍ താത്ക്കാലികമായി അവസാനിപ്പിച്ചത്.

തിരക്കിനൊത്ത് സൗകര്യമില്ലാതിരുന്നതാണ് പരിപാടി അലങ്കോലമാകാന്‍ കാരണം. ദല്‍ഹി സെക്രട്ടേറിയറ്റായിരുന്നു ജനസമ്പര്‍ക്ക വേദി. തിരക്കിനെത്തുടന്ന് കെജ്‌രിവാളിന് പരിപാടി ഇടയ്ക്ക് അവസാനിപ്പിക്കേണ്ടി വരികയായിരുന്നു.

പരാതി കേള്‍ക്കാന്‍ മന്ത്രിമാരെത്തി അല്‍പ്പ സമയം കഴിഞ്ഞപ്പോള്‍ തന്നെ വന്‍ജനത്തിരക്കായി. ബാരിക്കേഡുകള്‍ തീര്‍ത്ത് ജനത്തെ നിയന്ത്രിക്കാന്‍ പോലീസും സുരക്ഷാ ഉദ്യോഗസ്ഥരും ശ്രമിച്ചിട്ടും പരാജയപ്പെട്ടു.

സംഗതി നിയന്ത്രണവിധേയമായതോടെ സുരക്ഷാ ഉദ്യോഗസ്ഥര്‍ അരവിന്ദ് കെജ് രിവാളിനെ ദര്‍ബാര്‍ വേദിയില്‍ നിന്നും മാറ്റി.

ഇത്രയും ആളുകള്‍ എത്തുമെന്ന് പ്രതീക്ഷിച്ചിരുന്നില്ലെന്നും താന്‍ വിട്ടു നിന്നില്ലെങ്കില്‍ തിക്കും തിരക്കുമുണ്ടായി ജനങ്ങള്‍ക്ക് അപകടമുണ്ടാകുമായിരുന്നുവെന്നും കെജ്‌രിവാള്‍ പിന്നീട് പ്രതികരിച്ചു.

സംഘാടനത്തില്‍ പിഴവുണ്ടായെന്നും അതിന് എല്ലാവരോടും മാപ്പ് ചോദിക്കുന്നതായും പറഞ്ഞ് കെജ് രിവാള്‍ മടങ്ങിപ്പോയി.

ഏകദേശം 50,000 ത്തോളം ജനങ്ങള്‍ പരിപാടിക്കെത്തിയെന്നാണ് പോലീസ് കണക്ക്.

മറ്റ് മന്ത്രിമാര്‍ക്കൊപ്പം മുഖ്യമന്ത്രിയും ജനങ്ങളുടെ പരാതി കേള്‍ക്കുന്ന രീതിയിലായിരുന്നു പരിപാടി സംഘടിപ്പിച്ചത്. എല്ലാ ശനിയാഴ്ചകളിലും ദല്‍ഹി സെക്രട്ടേറിയറ്റില്‍ രാവിലെ ഒമ്പതര മുതല്‍ 11 മണി വരെയാണ് ജനസമ്പര്‍ക്ക പരിപാടി.

ദല്‍ഹി സെക്രട്ടറിയേറ്റിന്റെ വി.ഐ.പി ഗേറ്റ് ഉള്‍പ്പെടെ ജനങ്ങള്‍ക്ക് ഇന്ന് തുറന്ന് കൊടുക്കേണ്ടി വന്നിരുന്നു.

Tagged with: