കോഴിക്കോട്: ഗെയില്‍ വാതക പൈപ്പ് ലൈന്‍ പദ്ധതിക്കെതിരെ നടത്തുന്ന സമരത്തില്‍ ചര്‍ച്ചക്ക് തയ്യാറെന്ന് സര്‍ക്കാര്‍. പ്രശ്‌നം ചര്‍ച്ച ചെയ്യാന്‍ സര്‍ക്കാര്‍ സര്‍വകക്ഷിയോഗം വിളിച്ചു. തിങ്കളാഴ്ച വൈകിട്ട് നാലിന് കോഴിക്കോട് കലക്ടറേറ്റിലായിരിക്കും യോഗം.

സമരസമിതി നേതാക്കളെയും പങ്കെടുപ്പിക്കും. വ്യവസായ മന്ത്രിയാണു യോഗം വിളിക്കാന്‍ നിര്‍ദേശം നല്‍കിയത്. അതേസമയം ചര്‍ച്ചയില്‍ പങ്കെടുക്കുന്ന കാര്യത്തില്‍ സമരസമിതി തീരുമാനം അറിയിച്ചിട്ടില്ല.

സമരസമിതിയുമായി ചര്‍ച്ചയില്ലെന്ന നിലപാടിലായിരുന്നു കലക്ടര്‍ യു.വി.ജോസ്. സംഘര്‍ഷങ്ങളെക്കുറിച്ച് സര്‍ക്കാര്‍ റിപ്പോര്‍ട്ട് തേടിയിട്ടില്ല. സ്ഥലം സന്ദര്‍ശിക്കാനോ വിലയിരുത്താനോ സര്‍ക്കാര്‍ നിര്‍ദേശമില്ലെന്നും കലക്ടര്‍ പറഞ്ഞിരുന്നു.

സമരമാര്‍ക്കെതിരെ വലിയ ആക്രമണമായിരുന്നു പൊലീസിന്റെ ഭാഗത്തുനിന്നും ഉണ്ടായത്. മണിക്കൂറുകളോളമാണ് പൊലീസും സമരക്കാരും എരഞ്ഞിമാവില്‍ കഴിഞ്ഞ ദിവസം ഏറ്റുമുട്ടിയത്.


Dont Miss സൗബിന്റെ വിവാഹനിശ്ചയം കഴിഞ്ഞു; വധു കോഴിക്കോട്ടുകാരി


സംഘര്‍ഷങ്ങളുടെ പേരില്‍ വീടിനുള്ളില്‍ അതിക്രമിച്ചു കടന്ന് നിരപരാധികളെ കസ്റ്റഡിയിലെടുത്തതായി ആക്ഷേപമുയര്‍ന്നിരുന്നു. മുക്കത്തെ പൊലീസ് നടപടിക്കെതിരെ ശക്തമായ പ്രതിഷേധമായിരുന്നു ഉയര്‍ന്നത്. ജനകീയ സമരങ്ങളെ പൊലീസിനെ ഉപയോഗിച്ച് അടിച്ചമര്‍ത്തുന്നത് ഇടതുപക്ഷ സര്‍ക്കാരിന് ചേര്‍ന്ന നയമല്ലെന്ന് ഭരണ പരിഷ്‌കാര കമ്മിഷന്‍ അധ്യക്ഷന്‍ വി.എസ്.അച്യുതാനന്ദന്‍ കഴിഞ്ഞ ദിവസം വ്യക്തമാക്കിയിരുന്നു.

സര്‍ക്കാര്‍ ജനങ്ങളുടെ ആശങ്ക പരിഹരിച്ച് അവരെ വിശ്വാസത്തിലെടുക്കണമെന്ന് മുതിര്‍ന്ന കോണ്‍ഗ്രസ് നേതാവ് എ.കെ.ആന്റണിയും പറഞ്ഞിരുന്നു. എന്നാല്‍ മുക്കത്തെ സമരം തെറ്റിദ്ധാരണ മൂലമാണെന്നും പ്രശ്‌നങ്ങളുണ്ടാക്കുന്നത് തല്‍പര കക്ഷികളാണെന്നും സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കിയിരുന്നു.

അതിനിടെ, സംഘര്‍ഷം തുടരുന്ന മുക്കത്ത് യുഡിഎഫ് നേതാക്കള്‍ സന്ദര്‍ശനം നടത്തി. മുന്‍ കെ.പി.സി.സി പ്രസിഡന്റ് വി.എം.സുധീരന്‍, മുസ്‌ലിം ലീഗ് അഖിലേന്ത്യ ജനറല്‍ സെക്രട്ടറി പി.കെ.കുഞ്ഞാലിക്കുട്ടി എം.പി എന്നിവരുടെ നേതൃത്വത്തിലായിരുന്നു സന്ദര്‍ശനം. സമരം ഏറ്റെടുക്കുമെന്നും സമരത്തിന് എല്ലാവിധ പിന്തുണയും നല്‍കുമെന്നും യു.ഡി.എഫ് വ്യക്തമാക്കിയിരുന്നു.

സമരങ്ങളെ അടിച്ചമര്‍ത്തുന്നത് കമ്യൂണിസ്റ്റു നയമല്ലെന്നും പിണറായി വിജയന്‍ പെരുമാറുന്നത് ഏകാധിപതിയെപ്പോലെയെന്നും സുധീരന്‍ ആരോപിച്ചിരുന്നു.