കാസര്‍കോട്: വര്‍ഗീയ സംഘര്‍ഷങ്ങള്‍ തടയാന്‍ കാസര്‍കോട് പ്രത്യേകസേനയെ രൂപവല്‍ക്കരിക്കുന്നതിനുള്ള നിര്‍ദേശം സര്‍ക്കാര്‍ അംഗീകരിച്ചു. വര്‍ഗീയ സംഘര്‍ഷം നിയന്ത്രിക്കാനുള്ള കര്‍മപദ്ധതികളുടെ ഭാഗമായി ഡി.ഐ.ജി ശ്രീജിത്ത് സമര്‍പ്പിച്ച റിപ്പോര്‍ട്ട് സര്‍ക്കാര്‍ അംഗീകരിക്കുകയായിരുന്നു.

പതിനഞ്ചോളം സ്ഥലങ്ങളിലാകും പ്രത്യേക സേനയെ നിയോഗിക്കുക. ഇതിന്റെ ആദ്യഘട്ടമായി 900 പോലീസുകാര്‍ക്ക് പ്രത്യേക പരിശീലനം നല്‍കണമെന്നും റിപ്പോര്‍ട്ടില്‍ പറയുന്നു. മതസംഘര്‍ഷം നേരിടാന്‍ സേനയ്ക്ക് പ്രത്യേക പരിശീലനം നല്‍കും. റാപ്പിഡ് ആക്ഷന്‍ ഫോഴ്‌സിന്റെ മാതൃകയിലായിരിക്കണം സേനയെന്നും റിപ്പോര്‍ട്ടില്‍ പറയുന്നു. കാസര്‍കോട് ജില്ലയില്‍ അടിയ്ക്കടി ഉണ്ടാകുന്ന സംഘര്‍ഷങ്ങള്‍ കൃത്യമായി വിശദീകരിച്ചുകൊണ്ടായിരുന്നു ഡി.ഐ.ജിയുടെ റിപ്പോര്‍ട്ട്.

Subscribe Us:

ഈ മേഖലയില്‍ പ്രത്യേക പെട്രോളിങ്ങ് സംഘത്തെ നിയോഗിക്കാനും റിപ്പോര്‍ട്ടില്‍ ശുപാര്‍ശ ചെയ്യുന്നുണ്ട്. നാട്ടുകാര്‍ക്ക് അവശ്യഘട്ടങ്ങളില്‍ സമീപിക്കാന്‍ പ്രത്യേക കണ്‍ട്രോളിങ്ങ് റൂം തുറക്കണം. ജില്ലയിലെ പോലീസുകാരുടെ എണ്ണം വര്‍ധിപ്പിക്കണമെന്നും ഡി.ഐ.ജി നിര്‍ദേശിച്ചിട്ടുണ്ട്.

സംഘര്‍ഷങ്ങളെ രാഷ്ട്രീയസംഘര്‍ഷങ്ങളായി ലഘൂകരിച്ച് കാണരുത്. കാസര്‍കോഡ് ജില്ലയിലെ ദേശീയ പാത 17ന്റെ പടിഞ്ഞാറ് ഭാഗമാണ് സംഘര്‍ഷമേഖല. പത്ത് വര്‍ഷത്തിനുള്ളില്‍ കാസര്‍കോട്ട് 1113 കേസുകള്‍ ഉണ്ടായി. കേസുകളില്‍ ശിക്ഷിക്കപ്പെടാത്തത് അക്രമികളുടെ വീര്യം കൂട്ടുന്നുവെന്നും റിപ്പോര്‍ട്ടില്‍ പറയുന്നു.

ഇത്തരം സംഭവങ്ങളെ പെരുപ്പിച്ചുകാട്ടുന്നവര്‍ അത്തരം ചെയ്തികളില്‍ നിന്ന് പിന്മാറണം. നിസാര പ്രശ്‌നങ്ങളില്‍ സമയബന്ധിതമായി തീര്‍പ്പ് കല്‍പ്പിക്കാനും ചര്‍ച്ച ചെയ്ത് പരിഹരിക്കാനും കഴിയാത്തതാണ് പ്രശ്‌നം സംഘ ര്‍ഷാവസ്ഥയില്‍ കലാശിക്കാന്‍ കാരണമാകുന്നത് റിപ്പോര്‍ട്ടില്‍ പറയുന്നു.