Categories

ഫേസ്ബുക്ക് നിങ്ങളെ ചതിക്കുന്നു


ലോഗ് ഔട്ട് ചെയ്ത കംപ്യൂട്ടറില്‍ നിന്നു പോലും ഫേസ്ബുക്ക് വിവരങ്ങള്‍ ചോര്‍ത്തുന്നു, അമേരിക്കയില്‍ പ്രതിഷേധം ശക്തം

ഫേസ്ബുക്ക് ഉപയോക്താക്കളുടെ ശ്രദ്ധക്ക്. ഫേസ്ബുക്ക് നിങ്ങളെ ചതിക്കുകയാണ്. നിങ്ങളുടെ പേഴ്‌സണല്‍ കംപ്യൂട്ടറിലുള്ള രഹസ്യവും പരസ്യവുമായ എല്ലാ വിവരങ്ങളും ഇപ്പോള്‍ ഫേസ്ബുക്ക് ചോര്‍ത്തിയിട്ടുണ്ടാകാം. സൈന്‍ ഔട്ട് (sign out) ചെയ്ത് ഫേസ്ബുക്ക് ഉപയോഗം നിര്‍ത്തിയാലും ഉപയോക്താവിന്റെ കംപ്യൂട്ടറിലെ പ്രവര്‍ത്തനങ്ങള്‍ തങ്ങള്‍ നിരീക്ഷിക്കാറുണ്ടെന്നും കംപ്യൂട്ടറിലെ വിവരങ്ങള്‍ ചോര്‍ത്താറുണ്ടെന്നും ഫേസ്ബുക്ക് ഔദ്യോഗികമായി സ്ഥിരീകരിച്ചിരിക്കുകയാണ്!

ഉപയോക്താക്കളുടെ സ്വകാര്യതയിലേക്ക് കടക്കാറില്ലെന്ന ഫേസ്ബുക്ക് അധികൃതരുടെ അവകാശവാദം തെറ്റാണെന്ന് ആസ്‌ത്രേലിയക്കാരനായ ഐ.ടി.ശാസ്ത്രഞ്ജന്‍ നിക് ക്രൂബിലോവിക് മുന്‍പ് വ്യക്തമാക്കിയിരുന്നു. ഫേസ്ബുക്ക് ഉപയോഗിച്ച് സിസ്റ്റം സൈന്‍ ഔട്ട് ചെയ്താല്‍ സിസ്റ്റത്തില്‍ നിന്ന് കുക്കീസുകള്‍ മുഖേനെ വിവരങ്ങള്‍ യാതൊരു തടസ്സവുമില്ലാതെ പുറത്തേക്ക് ഒഴുകിക്കൊണ്ടിരിക്കുന്നുണ്ടെന്ന് നിക് തന്റെ പഠനത്തിന്റെ അടിസ്ഥാനത്തില്‍ പറഞ്ഞിരുന്നു. നിക്കിന്റെ വെളിപ്പെടുത്തലുകള്‍ സമ്മതിക്കുന്ന സ്ഥിരീകരണമാണ് ഫേസ്ബുക്ക് ഇപ്പോള്‍ നടത്തിയിരിക്കുന്നത്.

ഫേസ്ബുക്ക് ഒരിക്കല്‍ തുറന്നവര്‍ പിന്നീട് ഏതൊക്കെ വെബ്‌സൈറ്റുകളാണ് സന്ദര്‍ശിക്കാറുള്ളതെന്ന് അറിയാന്‍ അവരെ പിന്തുടരാറുണ്ടെന്നും ലോകത്താകമാനമുള്ള 75 കോടി ഉപയോക്താക്കളിലും ഇത് ചെയ്യാറുണ്ടെന്നുമാണ് ഫേസ്ബുക്ക് വക്താവ് വ്യക്തമാക്കിയത്. ഏത് സിസ്റ്റത്തില്‍ നിന്നാണോ ഫേസ്ബുക്ക് ഉപയോഗിച്ചത് ആ സിസ്റ്റത്തില്‍ നിന്ന് പിന്നീട് നടത്തുന്ന മുഴുവന്‍ പ്രവര്‍ത്തനങ്ങളും ചോര്‍ത്തപ്പെടുകയാണ്. ഫേസ്ബുക്കില്‍ നല്‍കിയ വിവരങ്ങളും അതിനായി ഉപയോഗിച്ച കംപ്യൂട്ടറിലെ മുഴുവന്‍ വിവരങ്ങളും അപ്പോള്‍ തന്നെ ഫേസ്ബുക്കിന്റെ പ്രധാന സെര്‍വറിലേക്ക് എത്തുന്നുണ്ട്. പരസ്യ വരുമാനത്തിനും ലാഭത്തോടെയുള്ള പ്രവര്‍ത്തനങ്ങള്‍ക്കുമാണ് ഈ വിവരങ്ങള്‍ ഉപയോഗിക്കുന്നതെന്നാണ് ഫേസ്ബുക്ക് അധികൃതരുടെ വിശദീകരണം.

ചില സുപ്രധാന വ്യക്തികളുടെ വിവരങ്ങള്‍ തങ്ങള്‍ നേരിട്ട് കുക്കീസുകളെ (Cookies) നിക്ഷേപിക്കാറുണ്ടെന്നും ഫേസ്ബുക്ക് വക്താവ് വെളിപ്പെടുത്തി. ഇതുവഴി അവരുടെ പ്രവര്‍ത്തനത്തെ സൂക്ഷമമായി നിരീക്ഷിക്കുവാനും വിലയിരുത്താനും സാധിക്കും. എന്നാല്‍, ഭൂരിപക്ഷം ആളുകളുടെയും വിവരങ്ങള്‍ ശേഖരിക്കാറില്ലെന്നും എപ്പോള്‍ വേണമെങ്കിലും ഇത്തരം കുക്കീസുകളെ ഉപയോഗിച്ച് ലോകത്തെ ഏത് കംപ്യൂട്ടറിലേക്കും നുഴഞ്ഞു കയറാന്‍ തങ്ങള്‍ക്ക് സാധിക്കുമെന്നും ഫേസ്ബുക്ക് വക്താവ് കൂട്ടിച്ചേര്‍ത്തു.

ലോകത്താകമാനം ഫേസ്ബുക്ക് ഉപയോഗിക്കുന്ന 75 കോടി ജനങ്ങളെയും വെബ് ലോകത്തെ ആകമാനവും ഈ വാര്‍ത്ത ഞെട്ടിച്ചിരിക്കുകയാണ്. ഇന്ത്യയില്‍ ഫേസ്ബുക്കില്‍ ഊളിയിടുന്നത് 3,35,87,640 പേരാണ്. സ്വകാര്യമായിരിക്കും എന്നു കരുതി ഫേസ്ബുക്കിലേക്ക് നല്‍കിയ വിവരങ്ങളും ഇതിന് ഉപയോഗിച്ച തങ്ങളുടെ പേഴ്‌സണല്‍ കംപ്യൂട്ടറിലെ വിവരങ്ങളും എല്ലാം ചോര്‍ത്തപ്പെടുന്നു എന്നത് ഉപയോക്താക്കളില്‍ ആശങ്ക പരത്തുകയാണ്. ഇതിനെതിരെ വന്‍ പ്രതിഷേധം അമേരിക്കയില്‍ ഉയര്‍ന്നു വരികയാണ്. പ്രതിഷേധം ശക്തമായ സാഹചര്യത്തില്‍ സുരക്ഷാ മാനദണ്ഡങ്ങളില്‍ കാര്യമായ മാറ്റങ്ങള്‍ ഉടനടി ഉണ്ടാകുമെന്ന് ഫേസ്ബുക്ക് മേധാവി മാര്‍ക് സക്കര്‍ബര്‍ഗ് പ്രഖ്യാപിച്ചിട്ടുണ്ട്.

അതേസമയം, ഫേസ്ബുക്ക് തങ്ങളുടെ സ്വകാര്യതകള്‍ കവര്‍ന്നെടുക്കുന്നെന്ന് ആരോപിച്ച് അമേരിക്കന്‍ ജനപ്രതിനിധി സഭയിലെ റിപ്പബ്ലിക്കന്‍, ഡെമോക്രാറ്റിക് പാര്‍ട്ടികളിലെ രണ്ട് അംഗങ്ങള്‍ പരാതി നല്‍കി. മസാച്യുസെറ്റ്‌സില്‍ നിന്നുള്ള ഡെമോക്രാറ്റിക് ജനപ്രതിനിധി സഭാംഗം എഡ് മാര്‍കിയും ടെക്‌സസില്‍ നിന്നുള്ള റിപ്പബ്ലിക്കന്‍ പാര്‍ട്ടി അംഗം ജോ ബാര്‍ട്ടനുമാണ് ഫേസ്ബുക്കിനെതിരെ രംഗത്തെത്തിയത്. ഫേസ്ബുക്കിലെ പുതിയ പരിഷ്‌കാരങ്ങല്‍ ലോകത്തെ പ്രമുഖ വ്യക്തികളുടെ സ്വകാര്യതകളിലേക്കുള്ള കൈകടത്തലാണെന്ന് സെനറ്റ് അംഗമായ മാര്‍ക്ക് ലെവിസ് ആരോപിച്ചു. ഇക്കാര്യം സെനറ്റില്‍ ഉന്നയിക്കുമെന്നും അദ്ദേഹം വ്യക്തമാക്കി.

ഒരിക്കള്‍ ഫേസ്ബുക്ക് ലോഗിന്‍ ചെയ്യുന്നതോടെ ഓരോരുത്തരുടെയും പേഴ്‌സണല്‍ കംപ്യൂട്ടറിലുള്ള കുക്കീസുകളുമായി ഫേസ്ബുക്കിന്റെ സെര്‍വര്‍ ബന്ധം സ്ഥാപിക്കുന്നു. പിന്നീട് സിസ്റ്റം സൈന്‍ ഔട്ട് ചെയ്താലും സിസ്റ്റത്തില്‍ നിന്ന് കുക്കീസുകള്‍ മുഖേനെ വിവരങ്ങള്‍ വിവരങ്ങള്‍ യാതൊരു തടസ്സവുമില്ലാതെ ഫേസ്ബുക്ക് സെര്‍വര്‍ ചോര്‍ത്തുകയാണ്. ഓരോ ഉപയോക്താവിന്റെയും ഐ.പി.അഡ്രസ്സും പേഴ്‌സണല്‍ കംപ്യൂട്ടറിലെ സുപ്രധാന വിവരങ്ങളും ഇങ്ങനെ ഫേസ്ബുക്ക് കവര്‍ന്നെടുക്കുന്നുണ്ട്.

ഇതിന് പരിഹാരമായി നിക് ക്രൂബിലോവിക് നിര്‍ദേശിച്ചിരിക്കുന്നത് സിസ്റ്റത്തില്‍ നിന്ന് ബ്രൗസിംഗ് ഹിസ്റ്ററി നീക്കുകയെന്നതാണ്.

6 Responses to “ഫേസ്ബുക്ക് നിങ്ങളെ ചതിക്കുന്നു”

  1. reenaphilipm

    സാമ്രാജ്യത്വം അവസാന ആയുധങ്ങളും പുറത്തെടുത്തു തുടങ്ങി

  2. J.S. ERNAKULAM.

    ഏതു കുതിരക്കും ഒരു കടിഞ്ഞാണ്‍ ഉണ്ടാകും,
    കുതിര ഇന്ത്യ ക്കാരെ പോലുള്ളവരുടെ അടുത്തും,
    കടിഞ്ഞാണ്‍ കുത്തുക കമ്പനികളുടെ കയ്യിലും.

  3. സുനില്‍

    കുന്തം… ആരാ ഈ ന്യൂസ്‌ എഴുതിയത്.. കുക്കീസ്‌ എങ്ങനെയാണ് പ്രവര്‍ത്തിക്കുന്നതെന്ന് അറിയില്ലെ?

  4. സുജിത്

    വെറുതെ സാധാരണ ഇന്റർനെറ്റ് -ഫേസ്ബുക്ക് ഉപയോക്താക്കളെ പറഞ്ഞു പേടിപ്പിയ്ക്കല്ലേ.. മസാല ചേർക്കാം പക്ഷേ അത് യഥാർത്ഥ്യവുമായി അല്പമെങ്കിലും ബന്ധമുള്ളതാകണ്ടേ? കമ്പ്യൂട്ടറിലുള്ള മുഴുവൻ വിവരങ്ങളും ഫേസ്ബുക്ക് ചോർത്തിയെടുക്കും എന്നൊക്കെ എഴുതിപ്പിടിപ്പിച്ച ലേഖകനെ സമ്മതിയ്ക്കണം. പേഴ്സണൽ കമ്പ്യൂട്ടറിലെ ബ്രൌസിംഗുമായി ബന്ധപ്പെട്ട ചില വിവരങ്ങൾ അല്ലാതെ കുക്കീസ് വഴി എന്ത് ആണു ചോർത്താൻ കഴിയുക? കുക്കീസ് ട്രാക്കിംഗ് ഫേസ്ബുക്ക് മാത്രമല്ല ചെയ്യുന്നത് ഗൂഗിളും എ ഓ എല്ലും യാഹുവും ഒക്കെ ഇത് ഒരു രീതിയിലല്ലെങ്കിൽ മറ്റൊരു രീതിയിൽ നടത്തുന്നു.

  5. ranjuthomask

    എന്റമ്മോ!! എന്തൊരു ഭാവന.. ആദ്യത്തെ കമന്റ്‌ വായിച്ചു ചിരിച്ചു മടുത്തു.. സാമ്രാജ്യത്വം അവസാന ആയുധങ്ങളും പുറത്തെടുത്തു തുടങ്ങി.. ഹ ഹ ഹ.. എന്തെങ്കിലും കേട്ട ഉടനെ ലോകം അവസാനിച്ചു . ഹി ഹി ഹി.

  6. POKKER

    നമുക്കിന്നു രഹസ്യമുന്ടെന്നു കരുതുന്നത് മൌഡ്യം. സോഫ്റ്റ്‌വെയര്‍ ഉം satellite ഉം വന്നതോടെ എല്ലാം പരസ്യം. ദേശം തന്നെ നഗ്നമാക്കപ്പെടുകയും അടിമകലക്കപ്പെടുകയും ചെയ്യുമ്പോള്‍ ഇതിലൊന്നും വലിയ വിശേഷമില്ല. അവര്‍ ആരെ പിന്തുടര്‍ന്നാലും ആവശ്യവും സന്ദര്‍ഭവും നോക്കി മാത്രമേ ഉപയോഗിക്കോ. എല്ലാം സുതാര്യം എന്ന് സമാധാനിക്കൂ. പി കെ പി

LEAVE YOUR COMMENTS

Press ctrl+g to toggle between English and Malayalam.