kerala-local-election കോഴിക്കോട്: സംസ്ഥാനത്തെ നിയമസഭാ തിരഞ്ഞെടുപ്പിനുള്ള പരസ്യപ്രചാരണം അവസാനിച്ചു. കൊട്ടിക്കലാശത്തിനിടെ വിവിധയിടങ്ങളില്‍ സംഘര്‍ഷമുണ്ടായി. മലപ്പുറം പെരിന്തല്‍ മണ്ണയില്‍ എല്‍.ഡി.എഫ്-യു.ഡി.എഫ് പ്രവര്‍ത്തകര്‍ തമ്മില്‍ ഏറ്റുമുട്ടലുണ്ടായി. കല്ലും വടികളുമായി പരസ്പരം സംഘടിച്ചെത്തിയ പ്രവര്‍ത്തകര്‍ ചേരിതിരിഞ്ഞ് ഏറ്റുമുട്ടുകയായിരുന്നു. പോലീസിന് നേരെയും ആക്രമണമുണ്ടായി.

കൊട്ടിക്കലാശത്തിനിടെ ചിലര്‍ ഐസ്‌ക്രീം കപ്പ് ഉയര്‍ത്തിക്കാണിച്ചതോടെ ഒരു വിഭാഗം പ്രകോപിതരാവുകയായിരുന്നു. സംഘര്‍ഷത്തില്‍ 15ഓളം പോലീസുകാര്‍ക്ക് പരിക്കേറ്റു. മാധ്യമപ്രവര്‍ത്തകര്‍ക്കും പരിക്കുണ്ട്.

Subscribe Us:

കോഴിക്കോട് കുന്ദമംഗലത്ത് യു.ഡി.എഫ്-ബി.ജെ.പി പ്രവര്‍ത്തകര്‍ തമ്മില്‍ സംഘര്‍ഷമുണ്ടായി. ബി.ജെ.പി ഓഫീസിന് നേരെ ആക്രമണമുണ്ടായി. എസ്.ഐ ശശീന്ദ്രന് പരിക്കേറ്റു.

വെള്ളയില്‍ കടപ്പുറത്ത് യു.ഡി.എഫ്-എല്‍.ഡി.എഫ് പ്രവര്‍ത്തകര്‍ തമ്മില്‍ ഉന്തും തള്ളുമുണ്ടായി. നാല് പേര്‍ക്ക് പരിക്കേറ്റു. തിരുവനന്തപുരത്ത് പൂന്തുറയില്‍ എല്‍.ഡി.എഫ്-യു.ഡി.എഫ് സംഘര്‍ഷത്തില്‍ എല്‍.ഡി.എഫ് സ്ഥാനാര്‍ഥി വി.സുരേന്ദ്രന്‍ പിള്ളക്ക് പരിക്കേറ്റു. വി.സുരേന്ദ്രന്‍ പിള്ള പ്രസംഗിച്ചുകൊണ്ടിരിക്കെ സമയം അവസാനിച്ചുവെന്ന് ആരോപിച്ച് യു.ഡി.എഫ് രംഗത്തെത്തുകയായിരുന്നു. പ്രസംഗം കഴിഞ്ഞ് താഴെയിറങ്ങിയ സുരേന്ദ്രന്‍പിള്ളയെ യു.ഡി.എഫ് പ്രവര്‍ത്തകര്‍ കയ്യേറ്റം ചെയ്യുകയായിരുന്നു.

കായംകുളം പാര്‍ക്ക് മൈതാനിയില്‍ എല്‍.ഡി.എഫ്-യു.ഡി.എഫ് സംഘര്‍ഷത്തില്‍ നാല് പേര്‍ക്ക് പരിക്കേറ്റിട്ടുണ്ട്. കയ്പമംഗലം,കരുനാഗപ്പള്ളി എന്നിവിടങ്ങളിലും സംഘര്‍ഷമുണ്ടായി.