Categories

സാമ്പത്തിക വളര്‍ച്ചയ്ക്ക് കേന്ദ്രസംസ്ഥാന സര്‍ക്കാരുകള്‍ ഒരുമിക്കണം: പ്രധാനമന്ത്രി

ന്യൂദല്‍ഹി: സാമ്പത്തിക മാന്ദ്യം ഗൗരവമേറിയ വിഷയമെന്നു പ്രധാനമന്ത്രി ഡോ.മന്‍മോഹന്‍ സിങ്. രാജ്യത്തിന്റെ സാമ്പത്തിക വളര്‍ച്ചയ്ക്ക് സംസ്ഥാന സര്‍ക്കാരുകളും കേന്ദ്ര സര്‍ക്കാരും ഒരുമിച്ച് പ്രവര്‍ത്തിക്കണമെന്നും പ്രധാനമന്ത്രി ആവശ്യപ്പെട്ടു.

12ാമതു പഞ്ചവത്സര പദ്ധതി തയ്യാറാക്കുമ്പോള്‍ ആഗോള സാമ്പത്തികാവസ്ഥയും പരിഗണിക്കണം. സമഗ്രവികസനമാണ് സര്‍ക്കാര്‍ ലക്ഷ്യമിടുന്നത്. കഴിഞ്ഞ ഏഴു വര്‍ഷമായി യു.പി.എ സര്‍ക്കാരിന് 8.5% വാര്‍ഷിക വളര്‍ച്ച കൈവരിക്കാന്‍ കഴിഞ്ഞതായി അദ്ദേഹം ചൂണ്ടിക്കാട്ടി.

പുരോഗതി കൈവരിക്കാന്‍ രാജ്യം നിഷേധാത്മക സമീപനം ഉപേക്ഷിക്കണം. വികസന കാര്യത്തില്‍ പ്രതിപക്ഷം സഹകരിക്കണം. 56-ാമത് ദേശീയ വികസന സമിതി യോഗത്തില്‍ സംസാരിക്കുകയായിരുന്നു പ്രധാനമന്ത്രി.

സംസ്ഥാനങ്ങളില്‍ നിന്നുള്ള പ്രതിനിധിമാര്‍ക്കു പുറമെ ധനമന്ത്രി പ്രണബ് മുഖര്‍ജി, ആസൂത്രണ കമ്മിഷന്‍ ഉപാധ്യക്ഷന്‍ മോണ്ടെക്ക് സിങ് അലുവാലിയ തുടങ്ങിയവരും യോഗത്തില്‍ പങ്കെടുത്തു.

2 Responses to “സാമ്പത്തിക വളര്‍ച്ചയ്ക്ക് കേന്ദ്രസംസ്ഥാന സര്‍ക്കാരുകള്‍ ഒരുമിക്കണം: പ്രധാനമന്ത്രി”

  1. Manojkumar.R

    സാമ്പത്തിക വളര്‍ച്ച എന്ന് പ്രധാന മന്ത്രി ഉദേശിക്കുന്നത് ആര്‍ക്കു എന്ന് കൂടി വിശദീകരിച്ചാല്‍ കൊള്ളാം!
    യഥാര്‍ത്ഥത്തില്‍ സാമ്പത്തിക മന്ദ്യമല്ല ഇവിടത്തെ പ്രശ്നം!കോടിക്കണക്കിനു രൂപ ഖജനാവില്‍ നിന്നും പുറത്തേക്കു ഒഴുക്കനാകുന്ന തരത്തിലുള്ള വികസനങ്ങള്‍ ആസൂത്രണം ചെയ്യപ്പെടുകയും അവയുടെ നല്ലൊരു പങ്കു ഭരിക്കുന്നവര്‍ വീതിചെടുക്കുകയും ചെയ്യുന്ന തരത്തില്‍ ഇവിടെ സാമ്പത്തിക രംഗം ഉണ്ടായിരുന്നിട്ടും കാര്യമായി മാന്ദ്യം നമുക്ക് അനുഭവപ്പെടാതിരുന്നത് മുന്‍പ് പ്രധാന മന്ത്രി എന്നത് പാവ എന്നതിന്റെ പര്യായ പദം അല്ലയിരുന്നതുകൊണ്ടാണ്‌ എന്ന് ഡോ. സിംഗ് മനസ്സിലാക്കുന്നത് നല്ലതാണ്. കേന്ദ്ര സര്‍ക്കാരും സംസ്ഥാന സര്‍ക്കാരുകളും ഒന്നിച്ചു പൊതു ഖജനാവ് കൊള്ളയടിക്കണമെന്നു ഇത്ര നിര്‍ലജ്ജം പറയാന്‍ താങ്കള്‍ക്കല്ലാതെ മറ്റ്ആര്‍ക്കാണ് കഴിയുക?

  2. ശുംഭന്‍

    രാജ്യത്തിന്റെ സാമ്പത്തിക വളര്‍ച്ചയ്ക്ക് സംസ്ഥാന സര്‍ക്കാരുകളും കേന്ദ്ര സര്‍ക്കാരും ഒരുമിച്ച് പ്രവര്‍ത്തിക്കണമെന്ന പ്രധാന മന്ത്രിയുടെ പ്രസ്താവന സ്വാഗതാര്‍ഹാമാണ്. പക്ഷെ “ഒരേ ഒരിന്ത്യ ഒരൊറ്റ ജനത” എന്ന മഹനീയ ലക്‌ഷ്യം കൈവരിക്കണമെങ്കില്‍, ഇന്ന് വിവിധ സംസ്ഥാനങ്ങളില്‍ നിലവിലുള്ള ജനദ്രോഹപരമായ പല നികുതികളും വെട്ടിച്ചുരുക്കി ഏകീകരിക്കണം. ഡല്‍ഹിയിലുള്ള ഒരു പൌരനു കിട്ടുന്ന ആനുകൂല്യങ്ങള്‍ കര്‍ണാടകയിലുള്ള ഒരു പൌരനു കിട്ടാന്‍ അര്‍ഹത ഇല്ലാതതെന്ത്? ഇന്ത്യയിലെ ഏറ്റവും കുറഞ്ഞ നിരക്കില്‍ ഡല്‍ഹിക്കാരന്‍ പെട്രോള്‍ വാങ്ങി കഴിഞ്ഞു കൂടുമ്പോള്‍, ഒരു ലിറ്ററിന് പത്തുരൂപയോളം കൂടുതല്‍ കൊടുത്തു കര്‍ണാടകയില്‍ ജനം വശം കെടുന്നു. അവരെന്താ ഇന്ത്യാക്കാരല്ലേ? ദേശീയ ഐക്യം നിലനില്‍ക്കാനും ജങ്ങളില്‍ ദേശീയ ബോധം വളരാനും വികസന ലക്‌ഷ്യം കൈവരിക്കാനും ആത്മാര്‍ഥമായി പ്രധാനമന്ത്രി ആഗ്രഹിക്കുന്നുണ്ടെങ്കില്‍, ഇന്ത്യ ഒട്ടാകെ ഒരേ നികുതി എന്ന സമ്പ്രദായം നടപ്പിലാക്കാനുള്ള നിയമ നിര്‍മാണം ഉടന്‍ നടത്തുകയാണ് ചെയ്യേണ്ടത്. എന്നാല്‍ അത്യാഗ്രഹികളും കയ്യിട്ടുവാരികളുമായ സംസ്ഥാന നേതാക്കന്മാര്‍ ഇത് സമ്മതിക്കുമോ എന്നതാണ് പ്രതിബന്ധം,

LEAVE YOUR COMMENTS

Press ctrl+g to toggle between English and Malayalam.