Categories
boby-chemmannur  
EBS

അഴീക്കോട്: ചില മറുവാക്കുകള്‍…

കഴിഞ്ഞ അന്‍പത് വര്‍ഷക്കാലം മലയാളികളുടെ ഹൃദയത്തില്‍ ജീവിക്കുകയായിരുന്നു സുകുമാര്‍ അഴീക്കോട്. സാഹിത്യ, രാഷ്ട്രീയ വിമര്‍ശനം, പ്രഭാഷണം, സാംസ്‌കാരിക ഇടപെടല്‍ തുടങ്ങി അഴീക്കോട് ഇക്കാലയളവില്‍ ചെയ്തുകൂട്ടിയതെന്തെന്ന് ഒറ്റവാചകത്തില്‍ പറയാന്‍ കഴിയില്ല. അദ്ദേഹത്തിന്റെ  നിശിത വിമര്‍ശനം പലരെയും പൊള്ളിച്ചിട്ടുണ്ട്. ‘അമ്പു കൊള്ളാത്തവരില്ല കുരുക്കളില്‍’ എന്ന മട്ടില്‍ ഒരു കാലത്ത് അഴീക്കോടിന്റെ വിമര്‍ശനശരം ഏറ്റു വാങ്ങാത്ത നേതാക്കളേ ഇല്ല എന്ന അവസ്ഥയായിരുന്നു കേരളീയ സമൂഹത്തില്‍!. അദ്ദേഹത്തിന്റെ വിമര്‍ശന കൂരമ്പേറ്റവരല്ലായിരുന്നു തിരിച്ച് അദ്ദേഹത്തെ വിമര്‍ശിക്കാനുണ്ടായിരുന്നതെന്നത് കൗതുകകരമാണ്. എന്നാല്‍ ഇപ്പുറത്ത് മറ്റൊരു വിഭാഗം അഴീക്കോടിനെ നിരൂപിക്കുകയും വിമര്‍ശിക്കുകയും ചെയ്തു. അഴീക്കോടിന്റെ മരണത്തിന് ശേഷവും അവര്‍ അത് തുടരുന്നു…

സമൂഹത്തിലെ പ്രധാന വ്യക്തികള്‍ മരിച്ചാല്‍ അവരെ പുകഴ്ത്തി മാത്രം പ്രതികരണങ്ങള്‍ നല്‍കുക എന്ന നടപ്പ് മാധ്യമ രീതി മാറി നടക്കാന്‍ ‘ഡൂള്‍ ന്യൂസ്’ ശ്രമിക്കുകയാണ്. വ്യക്തികള്‍ മരിച്ചാലും അവരെ വിമര്‍ശനവിധേയമായി വിലയിരുത്തുന്നതില്‍ തെറ്റില്ല എന്ന് ഞങ്ങള്‍ കരുതുന്നു. അതിനാല്‍ ഈ അഭിപ്രായങ്ങള്‍ കൂടി ഇവിടെ രേഖപ്പെടുത്തട്ടെ.

വി.എസ് അനില്‍കുമാര്‍- എഴുത്തുകാരന്‍

സുകുമാര്‍ അഴീക്കോട് നല്ല അവസരവാദിയായിരുന്നു. എം.ടിയുടെ കാലം എന്ന നോവലിലെ സേതു എന്ന കഥാപാത്രത്തെപ്പോലെയാണ് അദ്ദേഹം. സേതുവിന് എപ്പോഴും ഒരാളോട് മാത്രമേ ഇഷ്ടമുണ്ടായിരുന്നുള്ളൂ. അത് സേതുവിനോട് തന്നെയാണ്.

ധീരമായും മുഖം നോക്കാതെയും സ്വന്തം അഭിപ്രായങ്ങള്‍ വിളിച്ചുപറയുന്ന ഒരു സാംസ്‌കാരിക നായകന്‍ എന്ന നിലയിലാണ് ആളുകള്‍ അഴീക്കോടിനെ കാണുന്നത്. വാസ്തവത്തില്‍ ഇതൊരു തെറ്റിദ്ധാരണയാണ്. വളരെ സുരക്ഷിതമായി കൃത്യമായ പിന്തുണകള്‍ ലഭ്യമാക്കിയതിനുശേഷം മാത്രമേ അദ്ദേഹം തന്റെ ‘ധീരമായ’ അഭിപ്രായങ്ങള്‍ പറയാറുള്ളൂ. വി.എസിനെതിരെ അദ്ദേഹം പ്രസ്താവനയിറക്കിയത് പിണറായി പക്ഷത്തിന്റെ പിന്തുണ ഉറപ്പാക്കിയശേഷമാണ്.

ചാര്‍ളി ചാപഌന്റെ ലൈംലൈറ്റിലെ കഥാപാത്രത്തെ പോലെയായിരുന്നു അഴീക്കോട്. എല്ലാ കാര്യങ്ങളിലും കേന്ദ്രബിന്ദുവാകാന്‍ ശ്രമിക്കുകയും അതിന് അപ്പുറത്തേക്ക് യാതൊരുവിധ താത്പര്യവുമല്ലാത്ത ഒരാളായിരിക്കുകയും ചെയ്യുക. അഴീക്കോടും ഏതാണ്ടിതുപോലെ ആയിരുന്നു. അടിസ്ഥാനപരമായി ഭീരുത്വത്തിന്റെ ഒരംശം അദ്ദേഹത്തില്‍ ഉണ്ടായിരുന്നു.

അഭിപ്രായങ്ങള്‍ പറയാന്‍ എപ്പോഴും തയ്യാറായ ഒരു ശബ്ദം കേരളത്തില്‍ ഇല്ലാതായിരിക്കുന്നു. അതാണ് ഡോ. സുകുമാര്‍ അഴീക്കോടിന്റെ വിയോഗത്തോടെ സംഭവിച്ചിരിക്കുന്നത്.

അഡ്വക്കറ്റ് എ. ജയശങ്കര്‍- മാധ്യമ നിരൂപകന്‍

സുകുമാര്‍ അഴീക്കോട് യഥാര്‍ത്ഥത്തില്‍ കുട്ടികൃഷ്ണമാരാര്‍ക്കും ജോസഫ് മുണ്ടശ്ശേരിക്കും ശേഷം മലയാളത്തില്‍ ഉണ്ടായിട്ടുള്ള ഏറ്റവും മികച്ച സാഹിത്യ നിരൂപകനും പ്രഭാഷകനുമാണെന്നതില്‍ സംശയമില്ല. സാഹിത്യ നിരൂപകന്‍, പ്രഭാഷകന്‍, അധ്യാപകന്‍ എന്നീ മൂന്ന് മേഖലകളിലും അഴീക്കോട് പ്രശസ്തനായിരുന്നു. കവിതാ നിരൂപണത്തില്‍ അദ്ദേഹം തന്റെ വൈദഗ്ധ്യം വ്യക്തമായി തന്നെ തെളിയിച്ചിട്ടുണ്ട്.

അദ്ദേഹം ഒരു ഗാന്ധിയനും വാഗ്ഭടാനന്ദന്റെ ശിഷ്യനുമായിരുന്നു. അദ്ദേഹം സാഹിത്യകാരനായിരുന്നു, രാഷ്ട്രീയപ്പാര്‍ട്ടികളുമായി അടുപ്പം പുലര്‍ത്തിയ ആളുമായിരുന്നു. കുറേകാലം അദ്ദേഹം കോണ്‍ഗ്രസ്സുകാരനായിരുന്നു. കോണ്‍ഗ്രസ്സിന് ഉണ്ടെന്ന് അദ്ദേഹം വിശ്വസിച്ചിരുന്ന മുല്യങ്ങള്‍ ഇല്ലെന്ന് മനസ്സിലായപ്പോള്‍ അദ്ദേഹം കോണ്‍ഗ്രസ്സില്‍ നിന്ന് പോന്നു.

പിന്നീട് ഇടതുപക്ഷ പാര്‍ട്ടികളുമായി അടുപ്പം പുലര്‍ത്തിയ അദ്ദേഹം അവര്‍ക്കു വേണ്ടി എഴുതുകയും പ്രസംഗിക്കുകയും ചെയ്തു. അശോകന്‍ ചെരുവില്‍, കെ.ഇ.എന്‍ തുടങ്ങിയവര്‍ അദ്ദേഹത്തെ ആ സമയത്ത് എടുത്തു പൊക്കി കൊണ്ടുനടന്നു. പിന്നെ അഴീക്കോട് ദേശാഭിമാനിയില്‍ കോളം എഴുതാന്‍ തുടങ്ങി. പിണറായിയെ പ്രോസിക്യൂട്ട് ചെയ്യാന്‍ ഗവര്‍ണ്ണര്‍ അനുമതി കൊടുത്തപ്പോള്‍ ഗവര്‍ണ്ണര്‍ക്ക് ഭരണഘടന അറിയുമോ എന്ന് ചോദിച്ചു അഴീക്കോട്. ഈ ചോദിച്ച അഴീക്കോടിന് ഭരണഘടനയില്‍ എന്തറിയാം എന്നത് ആരും ചോദിച്ചില്ല.

വിജയന്‍ മാഷെ പോലെ കൃത്യമായ നിലപാട് സുകുമാര്‍ അഴീക്കോടിന് ഉണ്ടായിരുന്നില്ല. പല കാര്യങ്ങളിലും പല സന്ദര്‍ഭങ്ങളിലും അദ്ദേഹം ഒരിക്കല്‍ പറഞ്ഞ നിലപാടുകളില്‍ നിന്നും മാറുന്നത് നമ്മള്‍ കണ്ടതാണ്. കാറും കവറും കവറിന്റെ കനവും നോക്കി ആര്‍ക്കെതിരെയും അഭിപ്രായം പറയുന്നയാളാണ് അഴീക്കോട് എന്ന് വെള്ളാപ്പള്ളി നടേശന്‍ അഭിപ്രായപ്പെട്ടിട്ടുള്ളത് ഇടയ്ക്ക് ഞാന്‍ തന്നെ എടുത്തുപറയുകയും ചെയ്തിരുന്നു.

ഒ.എന്‍.വി കുറുപ്പിനെപ്പോലുള്ള നിലനില്‍പ്പിനും അവരുടേതായ രാഷ്ട്രീയ ലാഭങ്ങള്‍ക്കും വേണ്ടി തഞ്ചം നോക്കി നില്‍ക്കുന്ന മലയാളത്തിലെ രാഷ്ട്രീയക്കാരെപോലെ മിക്കപ്പോഴും അഴീക്കോട് പെരുമാറി. എങ്കിലും ഇതിനെല്ലാമപ്പുറത്ത് വൈജ്ഞാനിക സാഹിത്യ രംഗത്ത് അദ്ദേഹം വലിയ അറിവുള്ള മനുഷ്യനായിരുന്നു.

എം.എ റഹ്മാന്‍-എഴുത്തുകാരന്‍

ഒരു വിഷയത്തില്‍ എങ്ങിനെ പ്രതികരിക്കാനം, എങ്ങിനെ ഒരു വിഷയം കൈകാര്യം ചെയ്യാം എന്ന് അഴീക്കോട് മാഷ് നമുക്ക് കാണിച്ചു തന്നു. വ്യക്തിപരമായി എന്റെ ജീവിതത്തില്‍ ഞാന്‍ വളരെയധികം നിരീക്ഷിച്ച വ്യക്തിയാണ് അഴിക്കോട്. അദ്ദേഹം ഒരു പ്രശ്‌നം എങ്ങിനെ കൈകാര്യം ചെയ്യുന്നുവെന്ന് മനസ്സിലാക്കിയത്, എന്‍ഡോസള്‍ഫാന്‍ വിഷയത്തിലും മറ്റു സമരങ്ങളുടെയുമൊക്കെ പ്രതിസന്ധി ഘട്ടങ്ങളില്‍ എന്നെ സഹായിച്ചിട്ടുണ്ട്.

എംഫില്ലിന് കാലിക്കറ്റ് യൂണിവേഴ്‌സിറ്റിയില്‍ എനിക്ക് അഡ്മിഷന്‍ തരാത്തതുമായി ബന്ധപ്പെട്ട് ഞാന്‍ ഒരിടത്തും ഒരു പരാതിയും കേസും അദ്ദേഹത്തിനെതിരെ കൊടുത്തിട്ടില്ല. കാരണം എനിക്ക് പ്രവേശനം നിഷേധിച്ചത് എന്നെ ബാധിച്ചിരുന്നില്ല. എന്തുകൊണ്ട് എനിക്ക് അഡ്മിഷന്‍ നല്‍കിയില്ല എന്നു ചോദിക്കുക മാത്രമാണ് ഞാന്‍ ചെയ്തത്. അതെങ്കിലും ചോദിച്ചില്ലെങ്കില്‍ പിന്നെന്തു ജനാധിപത്യമാണ്?

ആ പ്രശ്‌നം തികച്ചു പോസറ്റീവ് ആയാണ് ഞാനെടുത്തത്. അനീതികളോട് പോരാടാന്‍ ആ പ്രശ്‌നം എന്നെ സഹായിച്ചു. അദ്ദേഹം അന്ന് അങ്ങിനെ പെരുമാറി എനിക്ക് അവസരം നിഷേധിച്ചെങ്കിലും ഞാന്‍ എന്റെ ജീവിതം പടുത്തുയര്‍ത്തി. മുഖ്യധാരയില്‍ ലഭിക്കുന്ന എല്ലാ സുഖസൗകര്യങ്ങളും അദ്ദേഹം അനുഭവിച്ചു. പാര്‍ശ്വവല്‍ക്കരിക്കപ്പെട്ട ജനങ്ങള്‍ക്കിടയിലും നേതാക്കന്മാരുണ്ട്. വന്‍വൃക്ഷങ്ങളുടെ ഇടയില്‍ നിന്ന് വളര്‍ന്ന് വരുന്ന ചെറിയ മരങ്ങളെ കണ്ടിട്ടില്ലേ?

സുനില്‍ പി. ഇളയിടം-വിമര്‍ശകന്‍

നവോത്ഥാനന്തരം രൂപപ്പെട്ടു വന്ന ജീവിത ബോധത്തിന്റെ നമ്മുടെ കാലഘട്ടത്തിലെ ഏറ്റവും ഉയര്‍ന്നതും ഒരുപക്ഷേ അവസാനത്തേതുമായ അടയാളമായിട്ടായിരിക്കും അഴീക്കോട് മാഷിനെ കാലം വിലയിരുത്തുക. അഴീക്കോട് മാഷ് ഒരു ആള്‍ അല്ല. ഒരു കാലഘട്ടം ഉയര്‍ത്തിയ ജീവിത വീക്ഷണത്തിന്റെ ആദര്‍ശത്തിന്റെ ഒരു ബോധത്തിന്റെ രൂപമായിരുന്നു. അഴീക്കോട് അറിയപ്പെട്ട ഒരു ആള്‍ ആണ്. അദ്ദേഹം ജീവിച്ചു വന്ന ഒരു കാലം രൂപപ്പെടുത്തിയ ഒരാളായിട്ടാണ് എനിക്ക് തോന്നുന്നത്. അതിന്റെ ആകെത്തുകയായതു കൊണ്ടാണ് അദ്ദേഹത്തിന് പ്രഭാഷകനായും വിമര്‍ശകനായും അധ്യാപകനായും ജീവിക്കാന്‍ സാധിച്ചത്. അത് ഇപ്പോഴത്തെ ജീവിതത്തിന്റെ അടയാളങ്ങളല്ല. നവോത്ഥാനന്തരം രൂപപ്പെട്ട ജീവിതത്തിന്റേതാണ്.

രണ്ടാമതായിട്ട് നമ്മുടെ ഭാഷ കണ്ട ഏറ്റവും വലിയ പ്രഭാഷകനായിരുന്നു അഴീക്കോട്. നമുക്ക് വേറെയും വലിയ പ്രഭാഷകരുണ്ടായിട്ടുണ്ട്. തെരുവിന്റെ അങ്ങേ അറ്റത്തു നില്‍ക്കുന്ന തൊഴിലാളിക്കും വലിയ പണ്ഡിതനും ദാര്‍ശനികനും കവിക്കുമൊക്കെ മനസ്സിലാകുന്ന ഭാഷണമായിരുന്നു അഴീക്കോടിന്റേത്. അതിന്റെ അര്‍ത്ഥം മറ്റുള്ളവര്‍ മോശമാണെന്നല്ല. വിജയന്‍ മാഷ് ഒരു ധൈഷണിക പ്രഭാഷകനായിരുന്നു. സാനു മാഷുടേത് വളരെ ധ്വന്യാത്മവും ധ്വനി സാന്ദ്രവുമായ പ്രഭാഷണവുമാണ്. അഴീക്കോട് മാഷിന്റെ പ്രഭാഷണം സര്‍വ്വതല സ്പര്‍ശിയായിരുന്നു.

തത്വമസിയില്‍ അദ്ദേഹം ഭാരതീയ യജ്ഞ യാഗ പാരമ്പര്യത്തിനെതിരെ ഉപനിഷത്ത് പാരമ്പര്യത്തെ ഉയര്‍ത്തിപ്പിടിച്ചു. 1980-90 കളില്‍ ശാസ്ത്ര സാങ്കേതിക കണ്ടു പിടുത്തങ്ങളുടെ, അതിഭൗതികതയുടെ വ്യാഖ്യാനത്തോടെ കപടമായ മതാത്മകതയെ കേരളത്തിലും ഇന്ത്യയിലും അവതരിപ്പിക്കപ്പെടുകയുണ്ടായി. ഈയൊരു കാലഘട്ടത്തിലാണ് തത്വമസി രചിക്കപ്പെടുന്നത്. തത്വമസി വളരെ ഉള്‍ക്കാഴ്ചയുള്ള മൗലികമായ ഒരു കൃതിയാണെന്ന് എനിക്ക് അഭിപ്രായമില്ല. അതിലെ ആശയങ്ങള്‍ പലയിടത്തും കാണാന്‍ പറ്റും. വിവേകാനന്ദനെപ്പോലുള്ളവരെല്ലാം അത് പറഞ്ഞിട്ടുണ്ട്. പക്ഷേ ആ കാലഘട്ടത്തില്‍ അതിന് ചരിത്രപരമായ പ്രാധാന്യം ഉണ്ടായിരുന്നു. അതുപോലെ ഇന്ത്യന്‍ പാരമ്പര്യത്തെ വിമര്‍ശിച്ചപ്പോള്‍ അടിമുടി വര്‍ഗ്ഗീയതെക്കെതിരെ അദ്ദേഹം ഉറച്ചു നിന്നു. സെക്കുലറിസ്റ്റുകളും മറ്റും ഈ നിലപാട് എടുത്തിട്ടുണ്ട്. പക്ഷേ മതത്തിനകത്തും പുറത്തും നിന്നു കൊണ്ട് ഇത്തരത്തിലുള്ള ഒരു വിമര്‍ശനം നടത്താന്‍ അദ്ദേഹം ശ്രമിച്ചു.

വിമര്‍ശകന്‍ എന്ന നിലയില്‍ അദ്ദേഹം ഉണ്ടാക്കിയ കോളിളക്കങ്ങള്‍ ആ കാലഘട്ടത്തില്‍ ചില ചലനങ്ങള്‍ ഉണ്ടാക്കിയിട്ടുണ്ട്. പക്ഷേ അത് കാലത്തെ അതിജീവിക്കുന്നതോ ചിരസ്ഥായി ആയ കോളിളക്കവുമൊന്നുമല്ല. തന്റെ കാലത്ത് ഉണ്ടായ സമരങ്ങളിലും ചര്‍ച്ചകളിലും സജീവമായി അദ്ദേഹവും പങ്കെടുത്തു എന്നു മാത്രമെ കരുതേണ്ടതുള്ളൂ.പിന്നെ കുമാരനാശാനൊക്കെ പറയുന്നത് പോലെ ‘കോപ്പിടും നൃപതി പോലെയും കളിപ്പാട്ടം…..പോലെ’- എന്നു പറയുന്നതു പോലെ അദ്ദേഹത്തില്‍ ശിശു ഉണ്ടായിരുന്നു. ചില ദുശ്ശാഠ്യങ്ങളും മുന്‍വിധികളും അദ്ദേഹം വെച്ചു പുലര്‍ത്തിയിരുന്നു. ഒരാളോട് അനിഷ്ടം തോന്നിയാല്‍ അത് തുറന്നു പറയുകയും പിന്നീട് അത് ക്ഷമിക്കുകയും ചെയ്യാന്‍ അദ്ദേഹത്തിന് സാധിക്കുമായിരുന്നു. അത് ഒരു അവസരവാദമാണെന്ന് എനിക്ക് തോന്നുന്നില്ല. അതെല്ലാം ശരിയായിരുന്നു എന്നല്ല ഞാന്‍ പറയുന്നത്. അത് അദ്ദേഹത്തിന്റെ പ്രകൃതത്തിന്റെ ഭാഗമായിരുന്നു.

Malayalam News
Kerala News in English

17 Responses to “അഴീക്കോട്: ചില മറുവാക്കുകള്‍…”

  1. babu

    വി എസ് അനില്‍കുമാറിന്റെ ഏനക്കെട് മനസ്സിലാക്കാന്‍ വല്ലിയ പുത്തിയൊന്നും ആവിശ്യമില്ല ! അനില്‍ കുമാറെന്ന ഈ മഹാ സംഭവവും ജയശങ്കരന്‍ എന്നും രാജേശ്വരിയെന്നും അറിയപ്പെടുന്ന രണ്ടും കെട്ട ജീവിയും തീപ്പെട്ടാല്‍ ഒരു കൊടിച്ചി പട്ടി പോലും തിരിഞ്ഞു നോക്കില്ല എന്ന ധാരണ എങ്കിലും ഇവര്‍ക്ക് ഉണ്ടാകുന്നത് നല്ലത് !. ,.ഈയൊരു വേളയില്‍ ഫൂമി മലയാളത്തില്‍ അഭിപ്രായം രേഘപ്പെടുത്താന്‍ ഈ രണ്ടു എന്‍ഡോസല്ഫാനെയും ഒഴിച് മറ്റാരെയും കിട്ടിയില്ലേ ….എന്റെ ….ഡൂല്‍ നുസുകാരെ…..

  2. p.a.rethan

    ഈ അനില്‍ കുമാരന്‍ എം എന്‍ വിജയന്‍റെ മകനാണ് എന്ന് അടിക്കുറിപ്പ്.

  3. Ramanathan Annavi

    അദ്ദേഹത്തിന്റെ സകല നിലപാടുകളോടും യോജിപ്പുണ്ടായിരുന്ന ഒരാളല്ല ഞാന്‍. നിരൂപണത്തിന് അദ്ദേഹവും വിധേയനാവേണ്ടത് തന്നെ. പക്ഷേ, റബ്ബറിന്റെ നട്ടെല്ലുമായി സാഹിത്യ തറവാട്ടിലെ ചില മാടമ്പിമാര്‍ വര്‍ത്തമാന കാല കേരളത്തിലെ സാഹിത്യ-രാഷ്ട്രീയ ഗുണ്ടകള്‍…ക്കും, ക്വട്ടെഷന്കാര്‍ക്കും സപ്താഷ്ടകാലങ്ങളില്‍ സിന്താബാദ്‌ കീര്‍ത്തനം പാടിനടന്ന പലേ അവസരങ്ങളിലും, അവരൊക്കെ തന്നെ ഉണരേണ്ടിയിരുന്ന ഘട്ടങ്ങളില്‍ ഉറക്കം നടിച്ചിരുന്നപ്പോഴും, ടി മന:സാക്ഷി ഉണരുന്നത് കാണാന്‍ അഴീക്കോടിലേക്ക് നോക്കേണ്ടി വന്നിട്ടുണ്ട് കേരളത്തിന്‌. ആയതിന്റെ പേരിലും, ഏകദേശം ആറേഴു ദശാബ്ദങ്ങള്‍ ഈ മലയാളത്തില്‍ ഭാഷയുടെയും മൂല്യങ്ങളുടെയും പേരില്‍ അദ്ദേഹം നടത്തിയ പടയോട്ടങ്ങളുടെ പേരിലും മലയാളി വല്ലാത്ത കടക്കാരന്‍ തെന്നെയാണ് – അദ്ദേഹത്തോട്. അത് മറന്നുപോയാല്‍ നന്ദികേടാവും! എല്ലാവര്‍ക്കും വെള്ളാപ്പള്ളിയാകാന്‍ പറ്റില്ലല്ലോ!

  4. prabhakaran

    തന്റെ ‘ധീരമായ’ അഭിപ്രായങ്ങള്‍ വിളിച്ചു പറയാന്‍ അഴീക്കോട്‌ മാഷ് മരിക്കാന്‍ കാത്തുനിന്ന വിജയന്‍ മകന്‍ അനില്‍ കുമാറിന്നു സ്തുതി ! അഴിക്കൊട് ജീവിച്ചിരിക്കുമ്പോള്‍ ആണ് ഇത് പറഞ്ഞിരുന്നെങ്കില്‍ അനില്‍ ‘മോന്റെ ‘ വള്ളി ട്രൌസര്‍ (നിക്കര്‍ കുപ്പായം ) കീറി കേരളത്തിന്റെ ചുവരില്‍ ഒട്ടിച്ചേനെ അദ്ദേഹം !

  5. Navas

    മരണം ഒരാളെക്കുറിച്ച് സ്തുതിഗീതം പാടാന്‍ മാത്രമല്ല , അയാളുടെ ജീവിതത്തിലെ ശരിതെറ്റ്കളെ അപഗ്രഥിക്കാന്‍ കൂടിയാകണം . മരണം കര്‍മ്മിയെ ഇല്ലാതാക്കുന്നുവെങ്കിലും അയാളുടെ കര്‍മ്മം ഇവിടെ തന്നെയുണ്ട്. വേറിട്ട ഒരു അനുഭവം,

  6. വീ കെ സതീശന്‍

    അഴീക്കോട് നിര്‍വഹിച്ച സാംസ്കാരിക -സാമൂഹിക ദൌത്യം പൂര്‍ണമായും തള്ളിക്കലയാതിരിക്കുമ്പോള്‍ തന്നെ,ഫാസിസത്തിനും മത വര്‍ഗീയതക്കെതിരെയും ശബ്ദമുയര്‍ത്തിയ responsibility അംഗീകരിക്കുമ്പോള്‍ തന്നെ ആത്മരതിയോള്‍ പോന്ന അദ്ദേഹത്തിന്റെ പ്രഭാഷകന്‍ എന്നാ നിലക്കുള്ള ആത്മവിശ്വാസം അതിനെ പരിപാലിക്കുന്ന ആരാധക വൃന്ദം സൃഷ്ടിക്കുന്ന ഓളങ്ങളില്‍ ആടിയുലയുന്ന അവസരവാദത്തോളം പോന്ന നിലപാട് രാഹിത്യമായി മാറി പലപ്പോഴും .അദ്ദേഹത്തിന്റെ ഏറെ പരാമര്‍ശിക്കപ്പെടുന്ന നിര്‍ഭയത്വം ജീവിത നൈരാശ്യം സൃഷ്ടിച്ച by -product
    ആണെന്ന് കണ്ടെത്താന്‍ സൂക്ഷ നിരീക്ഷണം വേണ്ട .
    ഞാത്തിയിട്ട അനേകം നിലപാട്ഞാണ്കളില്‍ നന്നായി കളിച്ച മികച്ച ഞാണിന്മേല്‍ കളികാരനായിരുന്നു അഴീകോട്

  7. My name is red

    ഒരു വാരാന്ത്യ പരിപാടിയിലൂടെ തനിക്കിഷ്ടമില്ലാത്തവര്‍ക്കെതിരെ എന്തു പുലഭ്യവും വിളിച്ചു പറയുന്ന രാജേശ്വരി എന്ന രണ്ടും കെട്ടവന്‍റെ അഭിപ്രായം വിലകല്‍പ്പിക്കുന്നില്ല.

  8. shashidharan

    അഴീക്കോട്‌ വിമര്ഷിക്കപെടെണ്ട ആളല്ല എന്ന് ആരും പറഞ്ഞിട്ടില്ല ! അദ്ദേഹം ജീവിച്ചിരിക്കുമ്പോള്‍ തന്നെ വി എസ് അനില്‍കുമാറിന്റെയും ജയശങ്കരിന്റെയും സാംസ്‌കാരിക നായകനായ ശ്രീ ശ്രീ ക്രൈം നന്ദകുമാര്‍ അവര്‍കള്‍ തന്നെ ഒരു വിമര്‍ശന ഗ്രന്ഥം ഇറക്കിയിരുന്നു ! പിന്നെയും രണ്ടു മൂന്നു പുസ്തകങ്ങളും ,വിമര്‍ശന ഉപന്യസനങ്ങളും ,നിരവധി ചാനല്‍ അന്തി ചര്‍ച്ചകളും, പ്രസംഗങ്ങളും അദ്ദേഹം ജീവിച്ചിരിക്കുമ്പോള്‍ തന്നെ അദ്ദേഹത്തിനെതിരെ ഉയര്‍ന്നു വന്നിട്ടുണ്ട് , അതൊക്കെ ജനങ്ങള്‍ അപ്പോള്‍ തന്നെ വിലയിരുത്തിയിട്ടുമുണ്ട് , ബാബറി മസ്ജിദ് തകര്‍ക്കപെട്ടപ്പോള്‍ അദ്ദേഹം ഭാരതിയ സംസ്കാരത്തെ കുറിച്ച് നടത്തിയ ദിവസങ്ങള്‍ നീണ്ടു നില്‍ക്കുന്ന പ്രൌഡ ഗംഭീരമായ പ്രസംഗ പരമ്പര ചരിത്രത്തില്‍ എഴുതി ചേര്‍ക്കപ്പെട്ട ഒന്നാണ് . തങ്ങളുടെ മുന്‍ വയിരാഗ്യങ്ങള്‍ തീര്‍ക്കാന്‍ ചിലര്‍ നടത്തുന്ന ഞാണിന്മേല്‍ കളി മാത്രമാണ് ഇപ്പോഴതെത് എന്ന് പറയാതെ വയ്യ .

  9. babu

    വി എസ് അനില്‍ കുമാറും ,ജയശങ്കരനും അടങ്ങുന്ന ചിലര്‍ നടത്തുന്നത് ,മറു വാക്കോ ,മാധ്യമ നിരുപണമോ,എഴുത്തോ , വിമര്‍ശനമോ ഒന്നുമല്ല ,കൃത്യമായി എഴുതി തയ്യാറാക്കിയ അജണ്ട ഒന്ന് മാത്രമാണത് ! ദുഷ്ട്ടതയും കടുത്ത വ്യക്തി വിദ്വേഷങ്ങളും മാത്രം മനസ്സില്‍ കൊണ്ട് നടക്കുന്ന ഇവര്‍ കിട്ടുന്ന അവസരങ്ങളില്‍ തങ്ങളുടെ ഉള്ളിലെ വിഷംപുറത്തു കളഞ്ഞു ആത്മ സംതൃപ്തി അടയുന്നു ! ടി പദ്മനാഭന്‍ ,എം മുകുന്ദന്‍ ,എം എ ബേബി ,പിണറായി വിജയന്‍ ,കെ ഈ എന്‍ ..എന്നിവര്‍ ആണ് ഈ മഹാ പ്രതിഭകളുടെ ശത്രു പട്ടികയിലെ മുന്‍ നിര !ഇവര്‍ക്കെതിരെ തരം കിട്ടുന്നിടതൊക്കെ കേറി കൊട്ടുക എന്നതാണ് ഈ ‘പര പുച്ച ” ജീവികളുടെ പ്രധാന വിനോദവും ! കഷ്ട്ടം …

  10. suresh

    മരണവും എം എൻ വിജയൻ ഫാനുകളും–
    ————————————————–

    എം എൻ വിജയൻ ഫാനുകൾക്ക് ഇപ്പോൾ ബോധം ഉദിച്ചിരിക്കുന്നു.ഒരാൾ മരിച്ചു കഴിയുമ്പോൾ അദ്ദേഹം ജീവിച്ചിരുന്ന സമയത്തെ നിലപാടുകളെ വിമർശനാത്മകമായി കാണുന്നതിൽ ഇപ്പോൾ അവർ തെറ്റു കാണുന്നില്ല..അതിനായി വെള്ളമടിച്ച് മരിച്ച് അയ്യപ്പന്റേയും വെള്ളമടിച്ച കറങ്ങി താഴെ വീണു മരിച്ച ജോണിന്റെയും മരണങ്ങളെ അവർ മഹത്‌വൽക്കരിക്കും.അസുഖമായി കിടന്ന വിജയൻ മാഷിനെ നിർബന്ധിച്ച് പത്ര സമ്മേളനത്തിനു കൊണ്ടു പോയി രണ്ടാം നില വരെ നടത്തി കയറ്റി.സംസാരിച്ചു കൊണ്ടിരുന്നപ്പോൾ മരണം കടന്നു വന്നു.അതോടെ അവർക്ക് ആ മരണം “മനോഹരമായി” മാറി.എം എൻ വിജയന്റെ മരണത്തെപ്പ്പോലും അവർ മാർക്കറ്റ് ചെയ്തു.അവർക്ക് വേണ്ടത് ഒരു ബലിയാടിനെയും “ടൂളി’നെയും ആയിരുന്നു.അവക്ക് അതായിരുന്നു വിജയൻ മാഷ്.

    ഇപ്പോൾ അവർക്ക് സുകുമാർ അഴീക്കോടിനെ ചീത്ത വീളിക്കണം.അതിനു കാരണം സുകുമാർ അഴീക്കോട് എം എൻ വിജയനെ വിമർശിച്ചിട്ടുണ്ട് എന്നതാണു.പോരാത്തതിനു സി പി ഐ എം അടക്കമുള്ള ഇടതുപക്ഷത്തോട് അഴീക്കൊട് ക്രിയാത്മകമായ സൌഹൃദവും പുലർത്തി. അത് ഈ വിജയൻ ഫാനുകൾക്ക് എങ്ങനെ ദഹിക്കും?

    എം എൻ വിജയൻ മരിച്ചു കഴിഞ്ഞപ്പോൾ പിണറായി വിജയൻ അദ്ദേഹത്തിന്റെ വീക്ഷണത്തിൽ സത്യസന്ധമായ ഒരു നീ‍രീക്ഷണം നടത്തി.”വിജയൻ മാഷ നല്ല ഒരു അധ്യാപകനായിരുന്നു “ എന്ന് ..അന്ന് ഈ വിജയൻ ഫാനുകൾ പിണറായിയെ കടിച്ചു കീറി കൊന്നില്ല എന്നേ ഉള്ളൂ..അവരെ സംബന്ധിച്ചിടത്തൊളം റിട്ടയർ ചെയ്തതിനു ശേഷം മാത്രം രാഷ്ട്രീയവുമായി ബന്ധപ്പെട്ട വിജയൻ മാഷാണു കേരളത്തെ ‘കമ്യൂണിസം’ പഠിപ്പിച്ചത്!.അത്തരക്കാർക്ക് ഇപ്പോൾ വീണ്ടു വിചാരം ഉണ്ടാകുന്നത് എന്ത് കൊണ്ടും നല്ലത് തന്നെ…..! ഞാൻ സ്വാഗതം ചെയ്യുന്നു.

    എങ്കിലും വിജയൻ മാഷ് എന്ന “ആൾദൈവ”ത്തെ ഇപ്പോൾ വിമർശിച്ചാലും “ഇരിയെടാ” എന്ന പറഞ്ഞ് ഇക്കൂട്ടർ ഓടി വരും..!ഇവർ ഫാസിസത്തിനെതിരെ തൊള്ള തുറക്കുമെങ്കിലും ഇവർക്ക് നേരെ വരുന്ന ഒരു വിമർശനങ്ങളേയും സ്വീകരിക്കാൻ മനസ്സുള്ളവരല്ല.സിപിഐ എം നേതാക്കളെ വ്യക്തിപരമായി അധിക്ഷേപിക്കുന്ന “പാഠം” വാരിക ഇറങ്ങിയപ്പോൾ ആരും കാണിക്കാത്ത അസഹിഷ്ണൂതയാണു ഇവർ ഇപ്പോൾ കാണിയ്ക്കുന്നത്.ഫേസ്‌ബുക്കിൽ ഉള്ള വിജയൻ ഫാനുകളുടെ കഴിഞ്ഞ രണ്ടു ദിവസത്തെ പ്രതികരണങ്ങൾ കണ്ടാൽ അത് മനസ്സിലാവും ! by sunil

  11. BAIJUMERIKUNNU

    എനിക്ക് അഴീകോട് മാഷിനെ ഇഷ്ട്ടമല്ലായിരുന്നു ,സത്യത്തില്‍ സാംസ്കാരീക രംഗത്തെ ഒരു ഫാസിസ്റ്റ് ആയിരുന്നു അദ്ദേഹം, സ്വന്തം കാര്യം സിന്ദാബാദ് എന്നതിലപ്പുറം മറ്റൊന്നും അദ്ധേഹത്തെ നയിചിരുന്നില്ല എന്ന് പലപ്പോഴും തോനിയിട്ടുമുണ്ട്,
    തനിക്കെതിരെ ഉള്ള വിമര്‍ശനങ്ങളെ വൈരനിര്യാതന ബുദ്ധിയോടുകൂടി മാത്രമേ അദ്ദേഹം നോക്കി കാണാന്‍ ശ്രമികാരുണ്ടായിരുന്നുള്ളൂ ,
    ഞാന്‍ മാത്രം ശെരി എനിക്ക് ശേഷം പ്രളയം ഇതായിരുന്നു മാഷുടെ ചിന്താ രീതി ,ജനശ്രധയുടെ അളവുകോല്‍ ഇത്രയേറെ മനസിലാക്കിയ ഒരു ആള്‍ കേരളത്തില്‍ വേറെ ഉണ്ടായിട്ടില്ലെന്ന് തോനുന്നു ,
    പണ്ട് അദ്ദേഹം എസ് എഫ് ഐ ക്കെതിരെ നടത്തിയ ഒരു പ്രശസ്തമായ പ്രയോഗം ഉണ്ട് ഒരു ഭ്രാന്തന്‍ പട്ടിയെയും ,ഒരു എസ് എഫ് ഐ കാരനേയും ഒരുമിച്ചു കണ്ടാല്‍ ആദ്യം എസ് എഫ് ഐ കാരനെ അടിക്കണമെന്നും ശേഷം പട്ടിയെ അടിച്ചാല്‍ മതിയെന്നും ആയിരുന്നു അത് , ആ ഒരു പ്രസ്താവന എന്നില്‍ ഉണ്ടാക്കിയ വലിയ സങ്കര്‍ഷങ്ങള്‍ ആയിരികാമോ പിന്നീട് എപ്പോഴും മാഷുടെ ഓരോ പ്രയോഗങ്ങളും സൂക്ഷ്മമായി നിരീക്ഷികാന്‍ എന്നെ പ്രേരിപ്പിച്ചത് എന്നും എനിക്കറിയില്ല .

    എന്തായാലും മാസ്റെര്‍ വിട വാങ്ങിയിരിക്കുന്നു , ഈ കാലമത്രയും എന്റെ സൌഹൃദ ഭാഷണങ്ങളില്‍ ഞാന്‍ പറഞ്ഞത് മാറ്റി പറയുവാന്‍ എന്‍റെ മനസ്സ് അനുവധികാത്തത് കൊണ്ടാണ് എന്‍റെ അനുശോചനം പോലും നിങ്ങളില്‍ ചിലപ്പോള്‍ അസ്വസ്ഥതകള്‍ ഉണ്ടാക്കുന്നത്‌…

  12. murali

    ഞാന്‍ മാത്രം ശെരി എനിക്ക് ശേഷം പ്രളയം ഇതായിരുന്നു മാഷുടെ ചിന്താ രീതി….
    വേറെ ചില മാഷന്മാരുടെയും ചിന്ത രീതിയും ഇത് തന്നെയായിരുന്നു എന്ന് മനസിലാക്കുക … . എം എന്‍ വിജയന്‍ എന്ന മാഷും ,വി എസ് അച്യുതാനന്തന്‍ എന്ന നേതാവും ഈ ചിന്തയുടെ മൂര്‍ത്തി രൂപങ്ങള്‍ ആണ് . അതിനെ അന്ധമായി ഏറ്റുപിടിക്കാന്‍ ചിന്താശേഷി പണയം വെച്ച കുറെ ഫാന്‍സുകളും … !

  13. RAJAN K

    ഇവിടെ ചില കമന്റര്‍മര്‍ക്ക് രോഷം അടക്കാനാകുന്നില്ല. വിഷയത്തെ വ്യക്തിപരമായി കാണുന്നതുകൊണ്ടാണത്. വി എസ് അനില്‍കുമാറിനെയും ജയശങ്കറിനെയും തെറി വിളിക്കുന്നവര്‍ക്ക് അത് ചെയ്യാം. കമന്റര്‍മാര്‍ ഓര്‍ക്കേണ്ട ഒരു കാര്യമുണ്ട്. പ്രൊഫസര്‍ വിജയന്‍ മരിച്ച സമയത്ത് അഴീക്കോട് എന്ന ഗാന്ധിയന്‍ തുടങ്ങിവെച്ച വിവാദമുണ്ടായിരുന്നു. ഒടുവില്‍ വി എസ് അനില്‍കുമാര്‍ ഉള്‍പ്പെടെ കുടുംബാംഗങ്ങള്‍ക്ക് പത്രക്കുറിപ്പിറക്കേണ്ടി വന്നു ആ വിവാദമവസാനിപ്പിക്കാന്‍. അഴീക്കോടിനോട് ചില കാര്യങ്ങളില്‍ ബഹുമാനമുള്ളതുകൊണ്ട് എന്നെ വല്ലാതെ ആ സംഭവം വേദനിപ്പിച്ചു. എം എന്‍ വിജയനോട് വ്യക്തിപരമായോ മറ്റോ ഒരു ബന്ധവും എനിക്കില്ല എന്നറിയിക്കട്ടെ. അഴീക്കോട് അന്ന് പ്രതികരച്ച പോലെ അനില്‍കുമാര്‍ പ്രതികരിക്കാത്തത് അദ്ദേഹത്തിന്റെ മാന്യതയായി കാണുന്നു. അനില്‍കുമാര്‍ പറഞ്ഞത് സത്യമാണ്. അഴീക്കോട് എന്നും ഭീരുവായിരുന്നു. അത് അദ്ദേഹത്തിന്റെ ഓരോ ചലത്തിലും ഉണ്ടായിരുന്നതായി എനിക്ക് തോന്നിയിട്ടുണ്ട്.

    എം എന്‍ വിജയന്‍ റിട്ടയര്‍മെന്റിന് ശേഷം മാത്രമല്ല രാഷ്ട്രീയ-സാംസ്‌കാരിക രംഗത്ത് ഇടപെടല്‍ നടത്തിയത്. അത് കാണാതെ ഒരാളെ വിമര്‍ശിക്കരുത്. പിണറായി വിജയന് നല്ല അധ്യാപകനാകാം വിജയന്‍ മാഷ്. പക്ഷെ അത് മാത്രമാകാന്‍ തരമില്ല. കണ്ണൂരുകാരനായത് കൊണ്ടെനിക്ക് അത് നന്നായറിയാം.

    എം എന്‍ വിജയന്റെ പുസ്തകങ്ങള്‍ വായിച്ചവര്‍ക്കറിയാം അദ്ദേഹത്തിന്റെ ലാളിത്യവും ഉള്‍ക്കാഴ്ച തരുന്നതുമായ രചനകളെ പറ്റി. അഴീക്കോടിനെയും വിജയനെയും താരതമ്യം ചെയ്താല്‍ ആരായിരിക്കും അവശേഷിക്കുകയെന്നത് കാലം തെളിയിക്കും. വിമര്‍ശിക്കുന്നവര്‍ രണ്ട് പേരെയും വായിച്ചാല്‍ കൊള്ളാം. കാര്യങ്ങള്‍ കുറേക്കൂടി വ്യക്തമാകും.

    എം എന്‍ വിജയന്‍ ഒരു മാര്‍ക്‌സിസ്റ്റാണെന്നൊന്നും എനിക്കഭിപ്രായമില്ല. പക്ഷെ അദ്ദേഹത്തിന്റെയടുത്തേക്ക് കടന്നു ചെല്ലുന്നത് ഒരു കുട്ടിയായാലും വലിയ മനുഷ്യരായാലും രണ്ട് പേരെയും ഒരു പോലെ മാനിക്കും സ്വീകരിക്കും. അഴീക്കോട് അങ്ങനെയായിരുന്നില്ല. ഒ എന്‍ വി, സുഗതകുമാരി തുടങ്ങിയവരും ഇക്കാര്യത്തില്‍ അഴീക്കോടിനൊപ്പമാകാം.

    അഴീക്കോടിന്റെ പ്രസംഗവും ഇടപെടലുകളും ചിരസ്ഥായിയല്ല എന്നു പറയുന്നത് അദ്ദേഹത്തെ പിന്തുടരുന്ന സുനില്‍ പി ഇളയിടമാണ്. ഇളയിടം ഒരിക്കലും എം എന്‍ വിജയന്റേത് ഇത്തരത്തിലാണെന്ന് പറയില്ല. അദ്ദേഹം പറയുന്ന മറ്റൊരു കാര്യം തത്വമസി മൗലികമായ ഒരു കൃതിയല്ല എന്ന്. എം പി വീരേന്ദ്രകുമാര്‍ കുറേക്കാലം തുറന്നു പഞ്ഞതും ഇക്കാര്യമാണ്. വീരേന്ദ്രകുമാര്‍ മറ്റൊന്ന് കൂടി പറഞ്ഞിട്ടുണ്ട്- അത് മാക്‌സ്മുള്ളറെ അഴീക്കോട് കോപ്പിയടിച്ചതാണെന്ന്. വാസ്തവത്തില്‍ മാക്‌സ്മുള്ളര്‍ തന്നെ കടംകൊണ്ട ഒരു കൃതിയാണത്. തത്വമസി അറിയുന്നത് കൊണ്ട് യഥാര്‍ത്ഥ രചയിതാവിന് വിഷമം തീരെയുണ്ടാകില്ല.

    ആമാശയ സാംസ്‌കാരിക പ്രവര്‍ത്തകര്‍ക്കും കുഴലൂത്തുകാര്‍ക്കും ഡൂള്‍ന്യൂസിന്റെ പ്രവൃത്തി ഏകപക്ഷീയമായെന്ന് തോന്നാം. ഇവര്‍ ചെയ്തത് തീര്‍ത്തും ശരിയാണ്. മരണത്തോടെ ഒരാള്‍ ഇല്ലാതാകുന്നില്ല. അവരെ തലനാരിഴ കീറി പഠിക്കേണ്ടതുണ്ട്. അഭിനന്ദനങ്ങള്‍………

  14. murali

    അനില്‍കുമാരനും ,ജയശങ്കരനും വേണ്ടി വക്കാലത്തുമായി വരുന്ന കമന്റര്‍മാര്‍ ഓര്‍ക്കേണ്ട ഒന്നിലധികം കാര്യങ്ങള്‍ ….
    # വിജയന്‍ മാഷിനെ മരണ ശേഷം അഴീക്കോട് വിവാദമുണ്ടാക്കി എന്നത് തെറ്റാണ്. അസുഖബാധിതന്‍നും തീരെ അവശനും ആയ വിജയന്‍ മാഷിനെ ഒരു ബില്‍ടിങ്ങിന്റെ രണ്ടാം നിലയിലേക്ക് കോണിപ്പടിയിലൂടെ വലിച്ചു കേറ്റി പത്രസമ്മേളനത്തിനു കൊണ്ടുപോയ പ്രൊ.സുധീഷ്‌ അടക്കമുള്ള “പാഠം” പ്രവര്‍ത്തകരെ ആണ് അന്ന് അദ്ദേഹം വിമര്‍ശിച്ചത്.
    #വിജയൻ മാഷെപ്പറ്റി പിണറായി പറഞ്ഞത് മാന്യമായി നൽകാവുന്ന ഒരു ഉപചാരം മാത്രമാണു. അതിൽ പിണറായിയെ അഭിനന്ദിക്കുക. വിജയന്മാഷുടെ ബൌദ്ധിക സരണി ഇനി ഒന്നു പരിശോധിച്ചു നോക്കുക. അപ്പോൾ പിണറായി എത്ര മിതത്വം പാലിച്ചു എന്നു കാണാം.. (ഒരു പാര്‍ട്ടിയുടെ മുഖപ്പത്രത്തിന്റെ പത്രാധിപര്‍ ആയി ജോലി നോക്കവേ, ആ പാര്‍ട്ടിയെ നിശിതമായി വിമര്‍ശിക്കുന്ന മറ്റൊരു പ്രസിദ്ധീകരണത്തിന്റെ ചുമതലക്കാരന്‍ കൂടി ആവുക” എന്നത് എന്തൊരു വൈരുദ്ധ്യമാര്‍ന്ന സംഗതിയാണ് എന്ന് ആലോചിച്ചുനോക്കൂ. വിജയന്‍ മാഷിന് വിരുദ്ധാഭിപ്രായങ്ങള്‍ പറയാന്‍ ഉണ്ടെങ്കില്‍ പത്രാധിപസ്ഥാനം രാജിവെച്ചിട്ടാവാമായിരുന്നുവല്ലോ.)
    #എം എന്‍ വിജയന്‍ റിട്ടയര്‍മെന്റിന് ശേഷം മാത്രമല്ല രാഷ്ട്രീയ-സാംസ്‌കാരിക രംഗത്ത് ഇടപെടല്‍ നടത്തിയത്.എന്നത് ഈ നൂറ്റാണ്ടിലെ ഏറ്റവും നല്ല ഫലിതം ആയിരിക്കും !ബ്രണ്ണന്‍ കോളേജില്‍ റിട്ടയര്‍മെന്റ് വരെ ജോലിചെയ്ത അദ്ദേഹം അവിടുത്തെ ഒരു അധ്യാപക സംഘടനയില്‍ പോലും മെമ്പര്ഷിപ്പ് എടുക്കണോ പ്രവര്‍ത്തനങ്ങളില്‍ പങ്കളിയകണോ തയ്യാറായില്ലഎന്നതാണ് യാഥാര്തിയം ! ( തലേശ്ശെരിയിലെ ഒരു പഴയ കാല തിരഞ്ഞെടുപ്പില്‍ കമ്മ്യൂണിസ്റ്റ്‌ പാര്‍ട്ടിയുടെ സ്ഥാനര്തിക്ക് ഒരു പ്രചാരണ ബോര്‍ഡോ ബാനാരോ ഇല്ലാത്തതു കണ്ടു തന്റെ കയ്യില്‍ ഇരുന്ന ശമ്പളം മുഴുവന്‍ എടുത്ത് ഉടന്‍ ബോര്‍ഡുകളും മറ്റും ഉണ്ടാക്കി തലേശ്ശെരിയിലെ മുക്കിലും മൂലയിലും കെട്ടി പൊക്കിയ ഒരു എളിയ സംസ്കൃത പണ്ഡിതന്‍ ഉണ്ടായിരുന്നു ആ സമയത്ത് വിജയന്‍ മാഷുടെ കൂടെ ബ്രണ്ണന്‍ കോളേജില്‍ ,പ്രൊഫ്‌ എം എസ് മേനോന്‍ മാഷ് എന്നാണ് ആ കമ്മ്യൂണിസ്റ്റ്‌കാരന്റെ പേര് !) തലശ്ശേരിയിലെ കണ്ണൂരിലെ സാഹചര്യങ്ങള്‍ കൊണ്ട് മാത്രം റിട്ടയര്‍മെന്റിന് ശേഷം കുറച്ചു കാലം ഇടതു സഹയാത്രികന്‍ ആയ വ്യക്തി ആണ് എം എന്‍ വിജയന്‍ എന്നതാണ് ശരി .
    #മലയാളത്തിന്റെ സാഹിത്യ-സാമൂഹ്യ-രാഷ്ട്രീയ മണ്ഡലങ്ങളില്‍ പലരും പറയാന്‍ മടിച്ചു നില്‍ക്കുന്ന അപ്രിയസത്യങ്ങളെ നിര്‍ഭയമായി വിളിച്ചു പറഞ്ഞ ആളാണ് അഴീക്കോട് മാഷ്‌. അദ്ധേഹത്തിന്റെ അഭിപ്രായങ്ങളോട്/വിമര്‍ശനങ്ങളോട് കാര്യ കാരണങ്ങളുടെ അടിസ്ഥാനത്തില്‍ യോജിക്കുകയോ വിയോജിക്കുകയോ ആകാം. എന്നാല്‍ സാഹിത്യ-സാംസ്കാരിക മേഘലകളിലെ സംഭാവനകളെ പാടെ അവഗണിച്ചാവരുത് ഇത്തരത്തില്‍ ഉള്ള വ്യക്തിപരമായ പ്രസ്താവനകള്‍. പ്രത്യേകിച്ച് ഈ ദിവസത്തില്‍ എങ്കിലും. അഴീക്കോടിനാല്‍ വിമര്ശിക്കപ്പെടാത്തവര്‍ എണ്ണത്തില്‍ വളരെ കുറവായിരുന്നു. മലയാള കാവ്യ സാഹിത്യത്തില്‍ ഉയര്‍ന്ന പ്രഭാവത്തില്‍ നിന്നിരുന്ന മഹാകവി ജി. ശങ്കരക്കുറുപ്പിനെ (ശങ്കരക്കുറുപ്പ് വിമര്‍ശിക്കപ്പെടുന്നു) വിമര്‍ശിച്ചപ്പോള്‍ അതിനെ ഖണ്ഡിക്കാന്‍ പോലും ആവാതെ ജി. നിസ്സഹായനാവുകയായിരുന്നു എന്നത് അദ്ദേഹത്തിന്റെ വിമര്‍ശന പാടവത്തിന്റെ തെളിവാണ്. കരുണാകരനും, വി.എസും, മോഹന്‍ലാലും എല്ലാം അവരവരുടെ മേഘലയില്‍ നിറഞ്ഞുനിന്നിരുന്ന സമയത്ത് തന്നെയാണ് അഴീക്കോടിനാല്‍ വിമര്‍ശിക്കപ്പെട്ടത്. അതെല്ലാം കഴമ്പില്ലാത്ത വെറും വിമര്‍ശനങ്ങള്‍ ആയിരുന്നുമില്ല. നല്ലൊരു സ്വയം വിമര്‍ശനകനും ആയിരുന്നുവല്ലോ അദ്ദേഹം. അദ്ദേഹത്തിന്റെ ഭാഗത്ത് നിന്നും ചിന്തിച്ചാല്‍ അതെല്ലാം പൂര്‍ണമായ ശരികളും ആയിരിക്കും. അഭിപ്രായ സ്വാതന്ത്ര്യത്തെ മാനിക്കാം, സ്വീകരിക്കണം എന്നില്ല. മരണം ആരെയും മഹത്വവല്‍ക്കരിക്കും എന്നൊന്നും കരുതുന്നില്ല. അങ്ങനെ ചെയ്യുകയുമരുത്‌… എന്നാല്‍ അഴീക്കോട് മാഷിന്റെ മഹത്ത്വത്തെ മരിപ്പിക്കാന്‍ ഈ മരണത്തിനും ആവില്ല.. !
    # മരണത്തോടെ ഒരാള്‍ ഇല്ലാതാകുന്നില്ല. അവരെ തലനാരിഴ കീറി പഠിക്കേണ്ടതുണ്ട്…. ഇതിനു ഏറ്റവും ബാധകമാക്കെണ്ടത് എം എന്‍ വിജയന്‍ മാഷിനെയാണ് .. അദ്ദേഹം കേരളീയ ഇടതുപക്ഷത്തിനു ചെയ്ത സംഭാവനകള്‍ എന്താണ്? ,ഇനിയും തെളിയിക്കപ്പെടാതെ കിടക്കുന്ന ‘ചാര’ ആരോപണങ്ങളുടെ നിജസ്ഥിതി , പരിഷത്ത് ,പു ക സ എന്നി സംഘടനകള്‍ ഇല്ലാതാക്കാന്‍ നടത്തിയ ശ്രമങ്ങള്‍ ആര്‍ക്കു വേണ്ടി ? ജനകീയ അസൂത്രന്തിനെതിരെ നടത്തിയ ആരോപണങ്ങള്‍ ,പറശ്ശിനി കടവിലെ വെള്ളം മുഴുവന്‍ ഊറ്റാനും ആഗ്രമത്തെ ഇല്ലാതാക്കാനും വേണ്ടിയാണു വാട്ടര്‍ തീം പാര്‍ക്ക് എന്നാ പ്രചാരണം ആര്‍ക്കു വേണ്ടി ….? തുടങ്ങി, കേരളത്തിലെ ജനത ഇന്നും ഉത്തരം തേടുന്ന നിരവധി എം എന്‍ വിജയന്റെതയ ആരോപണങ്ങള്‍ …

    ഇതൊന്നും ഒരു പക്ഷെ യഥാര്‍ത്ഥ ഇടതുപക്ഷ ആശയ ബു .ജികള്‍ക്കോ,ഡൂല്‍ ന്യൂസ്‌ നടത്തിപ്പുകര്‍ക്കോ ഓർമ്മയുണ്ടോ എന്നറിയില്ല. ഓർക്കാൻ നിങ്ങൾ ഇഷ്ടപ്പെടാൻ ഇടയില്ലാത്തതുകോണ്ട് ഓർമ്മകൾ നിങ്ങളിലേയ്ക്ക് കടന്നുവരാനും ഇടയില്ല. പക്ഷെ ഞങ്ങൾക്ക് കഴിഞ്ഞതൊന്നും അത്രയ്ക്കങ്ങോട്ട് മറക്കാൻ കഴിയില്ല. കാരണം നിങ്ങൾ ഞങ്ങൾക്കു വാമൊഴിയായും വരമൊഴിയാലും പറഞ്ഞുതന്ന ആ കെട്ടുകഥകളുണ്ടല്ലോ; നിങ്ങൾ ഒരേതൂവൽപക്ഷികളായ പലരാൽ പലവിധത്തിൽ വിരചിതമായതായിരുന്നു ആ കഥകളൊക്കെ. എങ്കിലും എല്ലാവരുടെയും ലക്ഷ്യം ഒന്നാകയാൽ, പലപ്പോഴും അവ നിങ്ങൾ പരസ്പരപൂരിതമാക്കി “അനുവാചകരെ”കോൾമയിർകൊള്ളിച്ചതാണ്. ഓരോ ദിവസവും തുടർച്ചയായി വരുന്ന കഥകൾക്കായി തുടരൻ ക്രൈം ത്രില്ലറുകൾ വായിക്കുവാനുള്ള സസ്പെൻസോടെ ജനം കാത്തിരുന്ന ആ കാലം ആർക്കാണ് പെട്ടെന്ന് മറക്കാനാകുക?
    നിങ്ങൾ ഒരു വലിയ കെട്ടുകഥയാണ് പറഞ്ഞുകൊണ്ടിരിക്കുന്നതെന്ന ബോധം പലപ്പോഴും നമുക്ക് നഷ്ടപ്പെട്ടുപോകുന്നത്ര വിദഗ്ദ്ധമായാണ് നിങ്ങൾ അവ പറഞ്ഞുകൊണ്ടിരുന്നത്. പലപ്പോഴും ഈ നുണക്കഥയുടെ മാനസികലയനത്തിൽ നിന്ന് മോചിതമായി സ്ഥലകാലബോധം വീണ്ടെടുക്കുവാൻ ഞങ്ങള്‍ വളരെ പാടുപെടുന്നുണ്ടായിരുന്നു. നിങ്ങൾക്കിഷ്ടപ്പെടാത്ത ജിവിച്ചിരിക്കുന്ന ചില മനുഷ്യരെയും, നിങ്ങൾ ഇഷ്ടപ്പെടാത്ത ഒരു പ്രസ്ഥാനത്തെയും കേന്ദ്രബിന്ദുവാക്കിയായിരുന്നുവല്ലോ നിങ്ങളുടെ കഥാനിർമ്മിതി.

    പ്രിയപ്പെട്ട ആശയ സാംസ്‌കാരിക പ്രവര്‍ത്തകരെ ,ഇനിയെങ്കിലും നിങ്ങള്‍ കൊട്ടിഘോഷിച്ച കഥകള്‍ തെളിയിക്കാന്‍ നട്ടെല്ലുണ്ടോ .നിങ്ങള്ക്ക് ….

  15. ശ്രീകാന്ത് കെ

    അഴീക്കോട് വിമര്‍ശനത്തിന് അതീതനല്ല പക്ഷേ വിമര്‍ശിക്കുന്നത് ആരാണ് എന്നതും പ്രസക്തമായ കാര്യമാണ് തനിക്ക് ഇഷ്ട്ടമില്ലാത്തവരെയും തന്‍റെ ആള്‍ ദൈവങ്ങളായ വി എസിനെയും, എം എന്‍ വിജയനെയും വിമര്‍ശിക്കുന്നവരെ ജാതിയും, മതവും, ഗോത്രവും, വര്‍ഗവും, കുലവും ഒക്കെ പറഞ്ഞു അധിക്ഷേപിക്കുന്ന രാജേശ്വരിയും വിജയന്‍റെ മകനെയും മാത്രമേ കിട്ടിയുള്ളൂ ടൂള്‍ ന്യൂസ്കാരെ രാജേശ്വരിമാര്‍ കുരയ്ക്കട്ടെ അഴീക്കോട് മാഷിന്‍റെ പ്രസക്തി നശിക്കില്ല

  16. sunil kumar c s

    ”സമൂഹത്തിലെ പ്രധാന വ്യക്തികള്‍ മരിച്ചാല്‍ അവരെ പുകഴ്ത്തി മാത്രം പ്രതികരണങ്ങള്‍ നല്‍കുക എന്ന നടപ്പ് മാധ്യമ രീതി മാറി നടക്കാന്‍ ‘ഡൂള്‍ ന്യൂസ്’ ശ്രമിക്കുകയാണ്. വ്യക്തികള്‍ മരിച്ചാലും അവരെ വിമര്‍ശനവിധേയമായി വിലയിരുത്തുന്നതില്‍ തെറ്റില്ല എന്ന് ഞങ്ങള്‍ കരുതുന്നു.”
    ————————————–
    എം എന്‍ വിജയന്‍ നെ കുറിച് ഇത്തരമൊരു രീതി സ്വികരിക്കാന്‍ ഡൂല്‍ ന്യൂസ്‌ തയ്യാറാകുമോ ?, വിജയന്റെ വളരെ ഹ്രസ്വമായ രാഷ്ട്രീയ സാംസ്‌കാരിക ഇടപെടലിനെ വിമര്‍ശനാത്മകമായി വിലയിരുത്തുന്ന ഒരു ചര്‍ച്ച സംഘടിപ്പിക്കാന്‍ തയ്യാറുണ്ടോ ? എം എന്‍ വിജയനെ വിമര്‍ശിക്കാന്‍ പാടില്ല എന്ന നടപ്പ് രീതി മാറ്റി ആരോഗ്യകരമായ വിമര്‍ശന സ്വയം വിമര്‍ശന വഴിയില്‍ മാറി നടക്കാന്‍ ഡൂല്‍ ന്യൂസ്‌ തയ്യാറാണോ ? ആരോപണങ്ങളും മറ്റും ഉന്നയിച്ചു കൊണ്ട് പ്രശസ്തനായ എം എന്‍ വിജയന്‍ ,അതെല്ലാം കൃത്യമായി തെളിയിക്കാനും ബാധ്യസ്ഥന്യിരുന്നു, പക്ഷെ ഇതൊന്നും ഇന്നുവരെ തെളിയിക്കപ്പെട്ടിട്ടില്ല എന്ന് മാത്രമല്ല അദ്ദേഹത്തിന്റെ മരണത്തോടെ ‘പാഠം’ എന്ന ആരോപണ മാസികക്കാര്‍ വരെ പൂട്ടി കെട്ടി സ്ഥലം വിട്ടിരിക്കുന്ന കാഴ്ചയാണ് കാണാന്‍ സാധിക്കുന്നത് .ഈയൊരു വര്‍ത്തമാനത്തില്‍ അഴീക്കോടിനെ ഭീരു എന്ന് വിളിച്ചു ആക്ഷേപിക്കുന്നവരെ കൂടി ഉള്‍പ്പെടുത്തി കൊണ്ടുള്ള ‘ എം എന്‍ വിജയന്‍ മറുവാക്ക് ‘ ചര്‍ച്ച ഡൂല്‍ നെവ്സില്‍ ഉടന്‍ പ്രതീക്ഷിക്കുന്നു !

  17. ശ്രീകാന്ത് കെ

    എം എന്‍ വിജയന്‍, വി എസ് തുടങ്ങിയ ആള്‍ ദൈവങ്ങള്‍ വിമര്‍ശിക്കപ്പെടില്ല വിമര്‍ശിച്ചാല്‍ വിമര്‍ശിച്ചവന്‍റെ കാര്യം പോക്കാ ഈ ആഘോഷകമ്മറ്റിക്കാരുടെ ഒക്കെ “ജനാതിപത്യബോധം” അപ്പോള്‍ കാണാം

LEAVE YOUR COMMENTS

Press ctrl+g to toggle between English and Malayalam.