Categories

ഭൂമിവിവാദം: യെദ്യൂരപ്പയെ ഉന്നംവെച്ച് കോണ്‍ഗ്രസ്

ബാംഗ്ലൂര്‍: 2G സ്‌പെക്ട്രം വിഷയത്തില്‍ ഉത്തരംമുട്ടിയ കോണ്‍ഗ്രസ് പിടിച്ചുനില്‍ക്കാനായി കര്‍ണാടക മുഖ്യമന്ത്രി ബി എസ് യദ്യൂരപ്പയെ ലക്ഷ്യമിടുന്നതായി സൂചന. സ്‌പെക്ട്രം വിവാദം ചെറുക്കാനായി ഭൂമിവിവാദത്തില്‍ കുടുങ്ങിയ യദ്യൂരപ്പയെ കരുവാക്കാന്‍ ശ്രമിക്കുന്നുണ്ടെന്നാണ് ഉന്നതവൃത്തങ്ങള്‍ സൂചിപ്പിക്കുന്നത്. അതിനിടെ ബി ജെ പി കേന്ദ്രനേതൃത്വം യെദ്യൂരപ്പയെ ദല്‍ഹിയിലേക്ക് വിളിപ്പിച്ചിട്ടുണ്ട്.

ഭൂമിവിവാദം കേന്ദ്രത്തില്‍വരെ എത്തിയതിനെത്തുടര്‍ന്ന് ഇതിനെക്കുറിച്ച് ചര്‍ച്ചചെയ്യാനാണ് യെദ്യൂരപ്പയെ വിളിപ്പിച്ചതെന്നാണ് സൂചന. കര്‍ണാടകയില്‍ നേതൃമാറ്റം ഉണ്ടാകുമെന്ന അഭ്യൂഹങ്ങള്‍ക്കിടെയാണ് പുതിയ സംഭവ വികാസങ്ങള്‍.

ബാംഗ്ലൂര്‍ വികസന അതോറിറ്റിക്കും സംസ്ഥാന വ്യവസായ വികസന ബോര്‍ഡിനുമായി ഏറ്റെടുത്ത സ്ഥലം മക്കള്‍ക്കായി അനധികൃതമായി പതിച്ചുനല്‍കി എന്ന ആരോപണമാണ് യെദ്യൂരപ്പക്കെതിരേ ഉയര്‍ന്നിരിക്കുന്നത്. എന്നാല്‍ ആരോപണങ്ങള്‍ യെദ്യൂരപ്പ നിഷേധിച്ചിട്ടുണ്ട്. അതിനിടെ പ്രശ്‌നം വിവാദമായതിനെ തുടര്‍ന്ന് യെദ്യൂരപ്പയുടെ മകനും മകളും തങ്ങള്‍ക്കുലഭിച്ച ഭൂമി തിരിച്ചുനല്‍കി.

2G സ്‌പെക്ട്രം വിവാദത്തില്‍ ആയുധമില്ലാതിരുന്ന കോണ്‍ഗ്രസിന് കര്‍ണാടകയിലെ ഭൂമിവിവാദം ആശ്വാസം നല്‍കുന്നുണ്ട്. ഭൂമിവിവാദത്തില്‍ അന്വേഷണം നടത്താന്‍ തയ്യാറാണെങ്കില്‍ സെപെക്ട്രം വിഷയത്തില്‍ സംയുക്ത പാര്‍ലമെന്ററി അന്വേഷണം ആകാം എന്നതുവരെയെത്തിയിട്ടുണ്ട് കാര്യങ്ങള്‍.

വിഷയം കര്‍ണാടകയിലെ പ്രതിപക്ഷകക്ഷികള്‍ ഏറ്റെടുത്തിട്ടുണ്ട്. യെദ്യൂരപ്പ അധികാരത്തിലേറിയ ശേഷം 5000 കോടിരൂപയുടെ ഭൂമിതട്ടിപ്പ് നടന്നിട്ടുണ്ടെന്ന് മുന്‍പ്രധാനമന്ത്രിയും ജനതാദള്‍ നേതാവുമായ എച്ച് ഡി ദേവഗൗഡ ആരോപിച്ചു. മുഖ്യമന്ത്രിയെ മാറ്റാന്‍ ബി ജെ പി കേന്ദ്രനേതൃത്വം തയ്യാറാകണമെന്നും ദേവഗൗഡ ആവശ്യപ്പെട്ടിട്ടുണ്ട്.

One Response to “ഭൂമിവിവാദം: യെദ്യൂരപ്പയെ ഉന്നംവെച്ച് കോണ്‍ഗ്രസ്”

  1. Gopakumar N.Kurup

    കാലം കലികാലം..!! അല്ലാതെന്തു പറയാന്‍..??
    നാണം കെട്ട ഇത്തരം രാഷ്ട്രീയക്കളികളാണു രാഷ്ട്രീയം എന്നതില്‍ നിന്നും സാമാന്യജനത്തെ അകറ്റുന്നതെന്ന് ഇനി എന്നാണിവര്‍ പഠിക്കുന്നത്..? എടുത്തെഴുതാന്‍ പോലും വയ്യാത്ത അത്ര വലിയ സംഖ്യകള്‍ക്കാണു ഇപ്പോള്‍ അഴിമതി നടക്കുന്നത് എന്നത് ഇന്ത്യയുടെ വളര്‍ച്ചയെയാണോ കാണിക്കുന്നത്..??
    ഇന്നലെ വരെ കേവലം ഒരു രാഷ്ട്രീയക്കാരന്‍ മാത്രമായിരുന്ന കരുണാനിധി ഇന്ന് തമിഴ്നാട്ടിലെ സമസ്ത മേഖലകളേയും അടക്കി ഭരിക്കുന്ന ഒരു ചക്രവര്‍ത്തിയായി മാറിക്കഴിഞ്ഞു..!! ഈ സോഷ്യലിസ്റ്റ് ചിന്താഗതിക്കാരന്റെ ചെറുമകന്റെ കല്യാണം തന്നെ ഏറ്റവും വലിയ ഉദാഹരണം..!! കരുണാനിധി കുടുംബത്തിന്റെ ഈ വളര്‍ച്ചയുടെ പിന്നില്‍ 2G സ്പെക്ട്രം ഇടപാടിനു നിര്‍ണ്ണായകമായ പങ്കുണ്ട്..!! കുറച്ചു കാലം മുന്‍പു വരെ സമശീര്‍ഷരായിരുന്നു ജയലളിതയും കരുണാനിധിയും.. ഇന്ന് ആ അന്തരത്തിന്റെ വ്യാപ്തി നോക്കൂ..!! രാഷ്ട്രീയമായും സാമ്പത്തികമായും ജയലളിതയ്ക്ക് ഇന്നു എതിരിടാന്‍ പറ്റിയ ആളേയല്ല കരുണാനിധിയും അദ്ദേഹത്തിന്റെ കുടുംബവും..!!
    സുമംഗലി കേബിള്‍ വിഷന്‍..
    സണ്‍ ടി.വി. ശൃംഖലകള്‍
    ദിനമലര്‍
    ക്ലൗഡ് നയന്‍ സിനിമാ നിര്‍മ്മാണ കമ്പനി
    കലൈജ്ഞ്ര്‍ ടി.വി..
    ഇതെല്ലാം ആ സാമ്രാജ്യത്തിലെ സാമന്തര്‍ മാത്രം..!! ഇനിയും എത്രയോ ബാക്കി..!!

LEAVE YOUR COMMENTS

Press ctrl+g to toggle between English and Malayalam.