Categories

ചെന്നൈ ഏ­റ്റു­മു­ട്ടല്‍ വ്യാ­ജ­മെ­ന്ന് ആ­രോ­പണം; മ­നു­ഷ്യാ­വകാ­ശ ക­മ്മീ­ഷന്‍ ഇ­ട­പെട്ടു, അ­ന്വേ­ഷി­ക്ക­ണ­മെ­ന്ന് ബീ­ഹാര്‍ മു­ഖ്യ­മന്ത്രി

ന്യൂദല്‍ഹി: ചെന്നൈയില്‍ ബാങ്ക് കവര്‍ച്ചാകേസില്‍ പ്രതികളെന്ന് സംശയിക്കുന്ന അഞ്ച് പേരെ പൊലീസ് വെടിവെച്ച് കൊന്ന സംഭവം വ്യാജ ഏറ്റുമുട്ടലാണെന്ന് ആരോപണമുയരുന്നു. സംഭവത്തെക്കുറിച്ച് വിശദമായ റിപ്പോര്‍ട്ട് വേണമെന്ന് ദേശീയ മനുഷ്യാവകാശ കമ്മീഷന്‍ തമിഴ്‌­നാട് ഡി.ജി.പിയോട് ആവശ്യപ്പെട്ടു. കൊല്ലപ്പെട്ടത് ബിഹാര്‍ സ്വദേശികളെന്നിരിക്കെ സംഭവത്തെക്കുറിച്ച് വിശദമായി അന്വേഷിക്കണമെന്ന് ബിഹാര്‍ മുഖ്യമന്ത്രി നിതീഷ്­കുമാര്‍ തമിഴ്‌­നാട് മുഖ്യമന്ത്രി ജയലളിതയോട് ആവശ്യപ്പെട്ടിട്ടുണ്ട്.

സംഭവത്തെ കുറിച്ച് അന്വേഷണം നടത്തണമെന്ന് തമിഴ്‌­നാട് പൊലീസ് ഡയരക്ടര്‍ ജനറലിനോടും ചെന്നൈ ജില്ലാ മജിസ്‌­ട്രേറ്റിനോടും മനുഷ്യാവകാശ കമ്മീഷന്‍ ആവശ്യപ്പെട്ടു. രണ്ട് മാസത്തിനകം റിപ്പോര്‍ട്ട് സമര്‍പ്പിക്കണമെന്നാണ് കമ്മീഷന്റെ ആവശ്യം. മജിസ്‌­ട്രേറ്റ് തല അന്വേഷണ റിപ്പോര്‍ട്ടും പോസ്റ്റ് മോര്‍ട്ടം റിപ്പോര്‍ട്ടും സ്വതന്ത്ര അന്വേഷണ റിപ്പോര്‍ട്ടും സമര്‍പ്പിക്കാന്‍ കോടതി ആവശ്യപ്പെട്ടിട്ടുണ്ട്. പത്രവാര്‍ത്തകളുടെ അടിസ്ഥാനത്തിലാണ് നടപടി.

വ്യാഴാഴ്ചയാണ് ചെന്നൈയില്‍ എസ്.ആര്‍.എം യൂനിവേഴ്‌­സിറ്റിയിലെ മുന്‍ വിദ്യാര്‍ഥി ഉള്‍പ്പെടെ അഞ്ചു പേര്‍ കൊല്ലപ്പെട്ടത്. ഏറ്റുമുട്ടലില്‍ രണ്ട് ഇന്‍സ്‌­പെക്ടര്‍മാര്‍ക്കും പരിക്കേറ്റിരുന്നു. പോലീസ് നടത്തിയ ഏറ്റുമുട്ടല്‍ ദുരൂഹമാണെന്ന് പറഞ്ഞ് അന്നുതന്നെ മനുഷ്യാവകാശ പ്രവര്‍ത്തകര്‍ രംഗത്തെത്തിയിരുന്നു. എന്നാല്‍, യാതൊരു പ്രകോപനവുമില്ലാതെ കവര്‍ച്ചക്കാര്‍ പൊലീസിന് നേരെ വെടിയുതിര്‍ക്കുകയായിരുന്നുവെന്നും സ്വയം രക്ഷക്കായാണ് പൊലീസ് തിരിച്ച് വെടിവെപ്പ് നടത്തിയതെന്നുമായിരുന്നു അധികൃതരുടെ വാദം. എ­ന്നാല്‍ ഏ­റ്റു­മു­ട്ടല്‍ വാ­ദ­ത്തില്‍ സം­ശ­യ­മു­ണ്ടെന്നും സം­ഭ­വ സ്ഥല­ത്ത് നി­ന്ന് വെടി­യൊച്ച­ക­ളൊന്നും കേ­ട്ടി­ട്ടി­ല്ലെന്നും ദൃ­ക്‌­സാ­ക്ഷി­കള്‍ പ­റഞ്ഞു.

അ­തേ­സമ­യം പത്തു വര്‍ഷത്തിനിടെ തമിഴ്‌­നാട്ടില്‍ പൊലീസുമായുണ്ടായ ‘ഏറ്റുമുട്ടലില്‍’ കൊല്ലപ്പെട്ടത് 75ഓളം പേ­രാണ്. ഇതില്‍ ഏറെയും വ്യാജ ഏറ്റുമുട്ടലുകളാണെന്ന് പരാതി ഉയര്‍ന്നെങ്കിലും ബന്ധപ്പെട്ട പൊലീസ് ഉദ്യോഗസ്ഥര്‍ക്കെതിരെ നടപടിയുണ്ടായില്ല. 2002ല്‍ ബംഗളൂരുവില്‍ ഇമാം അലിയെയും നാല് കൂട്ടാളികളെയും തമിഴ്‌­നാട് പൊലീസ് ‘ഏറ്റുമുട്ടലില്‍’ കൊലപ്പെടുത്തിയ ശേഷം 50ഓളം എന്‍കൗണ്ടര്‍ കൊലപാതകങ്ങള്‍ അരങ്ങേ­റി.

2004 ഒക്ടോബറില്‍ പ്രത്യേക ദൗത്യസേനക്കു മുന്നില്‍ ആയുധം വെച്ച് കീഴടങ്ങിയ വീരപ്പന്‍ മുതല്‍ 2010ല്‍ കോയമ്പത്തൂരില്‍ പിഞ്ചുകുട്ടികളെ കൊലപ്പെടുത്തിയതിന് കോടതിയില്‍ ഹാജരാക്കാന്‍ കൊണ്ടുപോകുന്നതിനിടെ ‘ഏറ്റുമുട്ടലില്‍’ പൊലീസ് കൊലപ്പെടുത്തിയ മലയാളിയായ മോഹനകൃഷ്ണന്‍വരെ നിരവധി പേര്‍ വ്യാജ എന്‍കൗണ്ടര്‍ കൊലപാതകത്തിന്റെ ഇരകളാണെന്ന് ആരോപണമുണ്ട്.

ഈ നിരയില്‍ ഏറ്റവും ഒടുവിലത്തേതാണ് ചെന്നൈ വേളച്ചേരിയില്‍ വ്യാഴാഴ്ച അരങ്ങേറിയ കൂട്ടക്കൊലയെന്ന് സാഹചര്യത്തെളിവുകള്‍ വ്യക്തമാക്കുന്നു. തലസ്ഥാന നഗരിയില്‍ 25 ദിവസത്തിനിടെ രണ്ട് ബാങ്കുകളില്‍ പട്ടാപ്പകല്‍ തോക്കു ചൂണ്ടി ക­വര്‍­ച്ച­യു­ണ്ടായി. തിരുപ്പൂരിലെ ജോയ് ആലൂക്കാസ് ജ്വല്ലറിയില്‍ 12 കോടിയുടെ സ്വര്‍ണക്ക­വര്‍­ച്ചയും നടന്നു. സംസ്ഥാനത്ത് ക്രമസമാധാനം തകര്‍ന്നുവെന്ന് പ്രതിപക്ഷകക്ഷികള്‍ കലാപക്കൊടി ഉയര്‍ത്തിയ സാഹചര്യത്തിലാണ് നാടകീയമായി ‘കവര്‍ച്ചാസംഘത്തലവന്റെ’ ചിത്രം ബുധനാഴ്ച പൊലീസ് കമീഷണര്‍ പുറത്തുവി­ട്ടത്.

ഏഴു തോക്കുകളുണ്ടായിട്ടും ‘കവര്‍ച്ചാസംഘം’ നടത്തിയ വെടിവെപ്പില്‍ പരിക്കേറ്റ ഇന്‍സ്‌­പെക്ടര്‍മാരുടെ ശരീരത്തില്‍ ഒരു വെടിയുണ്ടപോലും കണ്ടെത്താനാ­യി­ല്ലെന്ന­ത് ശ്ര­ദ്ധേ­യ­മാണ്. വെടിയുണ്ട ഉരസിപ്പോയതിന്റെ പരിക്കാണുള്ളത്. സംഘത്തിന്റെ തോക്കുകളും വെടിയുണ്ടകളും ബിഹാര്‍ നിര്‍മിതമാണെന്നും പൊലീസ് അവകാശപ്പെടുന്നു. 15 മിനിറ്റ് വെടിവെപ്പ് അരങ്ങേറിയിട്ടും സമീപവാസികള്‍ മിക്കവരും വിവരമറിഞ്ഞത് പുലര്‍ച്ചെ ടെലിവിഷന്‍ വാര്‍ത്ത കണ്ടാ­ണ്. സര്‍­ക്കാ­റി­ന്റെ മു­ഖം ര­ക്ഷി­ക്കാ­നാ­യി ന­ടത്തി­യ വ്യാ­ജ ഏ­റ്റു­മു­ട്ട­ലാ­ണ് സം­ഭ­വ­മെ­ന്നാ­ണ് ആ­രോ­പ­ണ­മു­യര്‍­ന്നി­ട്ടു­ള്ളത്.

Malayalam news

Kerala news in English

LEAVE YOUR COMMENTS

Press ctrl+g to toggle between English and Malayalam.