Administrator
Administrator
ഐ.പി.എസ് ചട്ടങ്ങള്‍ കാറ്റില്‍ പറത്തി അലക്‌സാണ്ടര്‍ ജേക്കബിന്റെ സുവിശേഷ പ്രസംഗം
Administrator
Monday 13th February 2012 1:08pm

alexander-jecobതിരുവനന്തപുരം: ഐ.പി.എസ് എന്ന പദത്തിന് ഇന്ത്യന്‍ പാസ്റ്ററല്‍ സര്‍വ്വീസ് എന്ന അര്‍ത്ഥവുമുണ്ടോ?. ഉണ്ടെന്നാണ് കേരളത്തിലെ മുതിര്‍ന്ന പോലീസ് ഉദ്യോഗസ്ഥന്‍ അലക്‌സാണ്ടര്‍ ജേക്കബിന്റെ കരിയര്‍ പറയുന്നത്. കേരള ജയില്‍ എ.ഡി.ജി.പിയായ അലക്‌സാണ്ടര്‍ ജേക്കബ് ഐ.പി.എസ് സര്‍വ്വീസ് ചട്ടങ്ങള്‍ ലംഘിച്ച് മതപ്രചാരണ രംഗത്ത് സജീവമായിരിക്കയാണ്. കാത്തലിക് ടെലിവിഷനായ ഷാലോം ടി.വിയിലാണ് അലക്‌സാണ്ടറിന്റെ മതപ്രഭാഷണം അരങ്ങേറുന്നത്.

ഷാലോം ടി.വിയില്‍ എല്ലാ ശനിയാഴ്ചയും രാത്രി അരമണിക്കൂര്‍ നേരം നടക്കുന്ന പ്രോഗ്രാമിന് ജ്ഞാന വചസ്സുകളെന്നാണ് പേര്. 1982 ബാച്ചിലെ ഐ.എ.എസ് ഉദ്യോഗസ്ഥനായ അലക്‌സാണ്ടര്‍ ജേക്കബ് കഴിഞ്ഞ വര്‍ഷം കൊച്ചി പുത്തന്‍ കുരിശില്‍ നടന്ന സുവിശേഷ കണ്‍വെന്‍ഷനിലും പങ്കെടുത്ത് സംസാരിച്ചിരുന്നു.

സുവിശേഷ പരിപാടിയില്‍ പങ്കെടുക്കാന്‍ ജേക്കബ് സര്‍ക്കാറിന്റെ അനുമതി തേടിയിട്ടില്ല. ഐ.പി.എസ് ഉദ്യോഗസ്ഥന്‍മാര്‍ക്ക് ശാസ്ത്ര-സാംസ്‌കാരിക പരിപാടികളില്‍ പങ്കെടുക്കുന്നതിന് മുന്‍കൂര്‍ അനുമതി വേണ്ടെന്നാണ് അലക്‌സാണ്ടര്‍ ജേക്കബ് ഇതെക്കുറിച്ച് പറയുന്നത്.

1968ലെ ആള്‍ ഇന്ത്യ സര്‍വ്വീസ് ചട്ടം അനുസരിച്ച് ഐ.പി.എസ് ഉദ്യോഗസ്ഥര്‍ അനുമതിയില്ലാതെ സ്വകാര്യ റേഡിയോ ടെലിവിഷന്‍ മീഡിയാ പ്രോഗ്രാമുകളില്‍ പങ്കെടുക്കുവാന്‍ പാടില്ല. അതേ സമയം കലാ-സാഹിത്യ- ശാത്ര പരിപാടികളില്‍ പങ്കെടുക്കുന്നതിന് തടസ്സവുമില്ല. ഇതെക്കുറിച്ച് ചോദിച്ചപ്പോള്‍ ജ്ഞാന വചസ്സുകളെന്ന പരിപാടി ശാസ്ത്ര-സാംസ്‌കാരിക വിഭാഗത്തില്‍പ്പെടുന്നതാണെന്നും ഇത് ചട്ടങ്ങള്‍ക്ക് വിരുദ്ധമല്ലെന്നുമായിരുന്നു അലക്‌സാണ്ടറിന്റെ മറുപടി.

ഉദ്യോഗസ്ഥര്‍ക്ക് ശാസ്ത്ര- സാസ്‌കാരിക പരിപാടികളില്‍ പങ്കെടുക്കുന്നതിന് വിലക്കില്ലെന്നാണ് ഇതെക്കുറിച്ച് ആഭ്യന്തര സെക്രട്ടറി കെ.വിജയകുമാര്‍ പ്രതികരിച്ചത്. എന്നാല്‍ ഷാലോം ടി.വിയിലെ അലക്‌സാണ്ടര്‍ ജേക്കബിന്റെ പ്രോഗ്രാം എത്തരത്തിലുള്ളതാണെന്ന് താന്‍ പരിശോധിക്കുന്നുണ്ടെന്നും അതിന് ശേഷം ഇത് ചട്ടങ്ങള്‍ ലംഘിക്കുന്നതാണോയെന്ന് പറയാമെന്നും ജയകുമാര്‍ വ്യക്തമാക്കി.

ഒരു ഐ.പി.എസ് ഉദ്യോഗസ്ഥന്‍ ഇത്തരത്തില്‍ ഒരു മതപ്രഭാഷണം നടത്തുന്നത് ശരിയാണോയെന്ന ചോദ്യത്തില്‍ നിന്ന് അദ്ദേഹം ഒഴിഞ്ഞു മാറി. ‘ ആഭ്യന്തര സെക്രട്ടറിയെന്ന നിലയില്‍ ഞാന്‍ ഇതെക്കുറിച്ച് പ്രതികരിക്കുന്നില്ല’ -ജയകുമാര്‍ വ്യക്തമാക്കി.

Malayalam news

Kerala news in English

Advertisement