തിരുവനന്തപുരം: സ്ത്രീകളെ നിന്ദ്യരായി ചിത്രീകരിച്ചുകൊണ്ടുള്ള പരസ്യങ്ങള്‍ക്കെതിരെ നിയമനടപടികള്‍ സ്വീകരിക്കുന്നതുമായി ബന്ധപ്പെട്ട് വനിതാ കമീഷന്‍ പൊതുജനങ്ങളില്‍ നിന്നും അഭിപ്രായം സ്വീകരിക്കുന്നു. പരാതി 10 ദിവസത്തിനുള്ളില്‍ സെക്രട്ടറി, കേരള വനിതാ കമീഷന്‍, ലൂര്‍ദ് പള്ളിക്ക് സമീപം, പി.എം.ജി, പട്ടം പി.ഒ, തിരുവനന്തപുരം വിലാസത്തില്‍ അറിയിക്കണം. വെബ്‌സൈറ്റ്:www.keralawomenscommission.gov.in.

അടുത്തിടെയായി കേന്ദ്ര സര്‍ക്കാറിന്റെയും എയ്ഡ്‌സ് കണ്‍ട്രോള്‍ സൊസൈറ്റിയുടെതായും ദൃശ്യമാധ്യമങ്ങളില്‍ വരുന്ന പരസ്യങ്ങള്‍ സ്ത്രീകളെ നിന്ദ്യരാക്കി ചിത്രീകരിക്കുന്നതാണെന്ന് പരാതി ഉയര്‍ന്നിരുന്നു. പുരുഷനെ എയ്ഡ്‌സ് പകര്‍ത്താന്‍ സ്ത്രീകള്‍ മനപ്പൂര്‍വ്വം ശ്രമിക്കുന്നതായി സൂചിപ്പിക്കുന്നതാണ് പരസ്യങ്ങള്‍. സ്ത്രീകളുടെ കെണിയില്‍ വീഴാതെ പുരുഷന്‍ രക്ഷപ്പെടുന്നതാണ് ഈ പരസ്യങ്ങളുടെ പ്രമേയം.