Categories

മെക്‌സിക്കന്‍ വിമാനം റാഞ്ചി; സുരക്ഷിതമായി ഇറക്കി

flores-rwമെക്‌സികോ സിറ്റി: മെക്‌സികോയിലെ കാന്‍കം റിസോര്‍ട്ട് സിറ്റിയില്‍നിന്നും 104 യാത്രക്കാരുമായി പറന്നുയര്‍ന്ന എയ്‌റോ മെക്‌സിക്കന്‍ വിമാനം പുരോഹിതന്‍ റാഞ്ചി. വിമാനം പിന്നീട് മെക്‌സികോ സിറ്റി വിമാനത്താവളത്തില്‍ ഇറക്കി. വിമാനത്തിലെ 104 യാത്രക്കാരും സുരക്ഷിതരാണ്.

ജോസ് മാര്‍ ഫ്‌ളോര്‍സ് (44) എന്ന ബൊളീവിയന്‍ പുരോഹിതതാണ് വിമാനം റാഞ്ചിയതെന്ന് പോലീസ് പറഞ്ഞു. വിമാനത്തില്‍ 09-09-09 എന്ന ഡേറ്റ് സാത്താന്റെ നമ്പരായ 666 തിരിച്ചിട്ടതാണെന്നതിനാലാണ് താന്‍ വിമാനം റാഞ്ചിയതെന്ന് ഇയാള്‍ പറഞ്ഞതായി മെക്‌സികോയുടെ സുരക്ഷാ മന്ത്രി ജനറോ ഗ്രേസ്യ ലൂണ വാര്‍ത്താ ലേഖകരോട് പറഞ്ഞു. വിമാനം റാഞ്ചാനായി വ്യാജ ബോംബാണ് ഉപയോഗിച്ചത്.

മെക്‌സിക്കോയില്‍ വലിയ ദുരന്തം സംഭവിക്കാന്‍ പോകുകയാണെന്നും വിമാനം മെക്‌സികോ നഗരത്തിനു ചുറ്റും ഏഴുവട്ടം പറപ്പിക്കണമെന്നും ഇയാള്‍ ആവശ്യപ്പെട്ടിരുന്നതായി അദ്ദേഹം അറിയിച്ചു. കഴിഞ്ഞ പതിനേഴ് വര്‍ഷമായി മെക്‌സികോയില്‍ പുരോഹിതനായി പ്രവര്‍ത്തിക്കുന്ന ജോസ് മാര്‍ ഫ്‌ളോര്‍സിനൊപ്പം എട്ടു പേരെക്കൂടി പിടികൂടിയിരുന്നെങ്കിലും അവരെ പിന്നീട് വിട്ടയച്ചു. പരിശോധനയില്‍ വിമാനത്തില്‍ ബോംബുകളോ സ്‌ഫോടകവസ്തുക്കളോ കണ്ടെത്തിയിട്ടില്ലെന്ന് അധികൃതര്‍ അറിയിച്ചു.

Comments are closed.