Administrator
Administrator
മേഴ്‌സിക്ക് വയലാറില്‍ അന്ത്യ നിദ്ര
Administrator
Sunday 6th September 2009 7:02am

mercy

ചേര്‍ത്തല: മുന്‍ എം.എല്‍യും കേന്ദ്രമന്ത്രി വയലാര്‍ രവിയുടെ ഭാര്യയുമായ മേഴ്‌സി രവിയുടെ മൃതദേഹം വന്‍ ജനാവലിയുടെ സാന്നിധ്യത്തില്‍ സംസ്്കരിച്ചു. വയലാര്‍ രവിയുടെ തറവാടായ വയലാര്‍ മുക്കംപറമ്പിലെ തെക്കേ പറമ്പില്‍ പ്രത്യേകം തയ്യാറാക്കിയ കല്ലറയില്‍ പൂര്‍ണ ഔദ്യോഗിക ബഹുമതികളോടെയായിരുന്നു സംസ്‌കാരം. ക്രിസ്തീയ,ഹൈന്ദവ ആചാരങ്ങള്‍ക്ക് ശേഷമായിരുന്നു സംസ്‌കാര ചടങ്ങ്.

വാഹന വ്യൂഹത്തിന്റെ അകമ്പടിയോടെ വിലാപയാത്രയായി മൃതദേഹം ശനിയാഴ്ച വൈകീട്ട് 5.30നാണ് വയലാറില്‍ എത്തിച്ചത്. അന്തിമോപചാരത്തിന് ശേഷം ജോസഫ് വലിയവീട്ടിലിന്റെ നേതൃത്വത്തില്‍ ക്രിസ്തീയ പ്രാര്‍ഥന നടന്നു. തുടര്‍ന്ന് പോലീസിന്റെ ഗാര്‍ഡ് ഓഫ് ഓണര്‍. 7.15ഓടെ ഹൈന്ദവാചാര ചടങ്ങുകള്‍് തുടങ്ങി. മൃതദേഹം കല്ലറയിലേക്ക് എടുത്തപ്പോള്‍ ആചാരവെടി മുഴങ്ങി.

ശവസംസ്‌കാര ചടങ്ങ് ആരംഭിക്കുന്നതിനു മുമ്പ് ഉമ്മന്‍ചാണ്ടിയും രമേശ് ചെന്നിത്തലയും ചേര്‍ന്ന് മൃതദേഹത്തില്‍ കോണ്‍ഗ്രസ് പതാക പുതപ്പിച്ചു. ദുബായിലുള്ള ചെറുമകന്‍ എത്താന്‍ വൈകിയതോടെ മൃതദേഹം സംസ്‌കരിക്കാനുള്ള ചടങ്ങുകള്‍ നീണ്ടു. എട്ടു മണിയോടെ കൊച്ചുമക്കളായ രോഹിത്തും കൃഷ്ണയും എത്തി. അവരും കര്‍മങ്ങളില്‍ പങ്കുചേര്‍ന്നു. തുടര്‍ന്നാണ് പ്രത്യേകം തയ്യാറാക്കിയ കല്ലറയിലേക്ക് മൃതദേഹം എടുത്തത്.

രാഷ്ട്രപതി പ്രതിഭ പട്ടീലിനു വേണ്ടി കലക്ടര്‍ മിനി ആന്റണിയും മുഖ്യമന്ത്രി വി.എസ്. അച്യുതാനന്ദനു വേണ്ടി പ്രിന്‍സിപ്പല്‍ സെക്രട്ടറി ഷീല തോമസും പുഷ്പചക്രം സമര്‍പ്പിച്ചു. കെ.പി.സി.സി പ്രസിഡന്റ് രമേശ് ചെന്നിത്തല പതാക പുതപ്പിച്ചു. കേന്ദ്രമന്ത്രിമാരായ എ.കെ. ആന്റണി, കെ.വി. തോമസ്, മുല്ലപ്പള്ളി രാമചന്ദ്രന്‍, ശശി തരൂര്‍, പ്രതിപക്ഷ നേതാവ് ഉമ്മന്‍ ചാണ്ടി. മന്ത്രിമാരായ തോമസ് ഐസക്, ജി. സുധാകരന്‍, കടന്നപ്പള്ളി രാമചന്ദ്രന്‍, ബിനോയ് വിശ്വം, എം.എ. ബേബി, സ്പീക്കര്‍ കെ. രാധാകൃഷ്ണന്‍, മുന്‍ ഗവര്‍ണര്‍ എം.എം. ജേക്കബ്, മുന്‍മന്ത്രിമാരായ വക്കം പുരുഷോത്തമന്‍, കെ.എം. മാണി, തിരുവഞ്ചൂര്‍ രാധാകൃഷ്ണന്‍, ആര്യാടന്‍ മുഹമ്മദ്, ആര്‍. ബാലകൃഷ്ണപിള്ള, ടി.എം. ജേക്കബ്, എം.എം. ഹസന്‍, മോന്‍സ് ജോസഫ്, കെ.ബി. ഗണേഷ്‌കുമാര്‍, എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍, വി.എം. സുധീരന്‍, മഹിളാ കോണ്‍ഗ്രസ് സംസ്ഥാന പ്രസിഡന്റ് ഷാനിമോള്‍ ഉസ്മാന്‍ തുടങ്ങിയവര്‍ അന്ത്യാഭിവാദ്യമര്‍പ്പിച്ചു.

ചെന്നൈയിലെ മദ്രാസ് മെഡിക്കല്‍ മിഷന്‍ ആശുപത്രിയില്‍ ശനിയാഴ്ച വെളുപ്പിന് മൂന്നു മണിക്കാണ് മേഴ്‌സി രവി അന്തരിച്ചത്.

Advertisement