sureender-koli

അലഹബാദ്: നിതാരി കൂട്ടക്കൊലക്കേസുമായി ബന്ധപ്പെട്ട് പതിന്നാലുകാരിയായ റിമ്പ ഹല്‍ദറിനെ കൊലപ്പെടുത്തിയ കേസില്‍ മുഖ്യപ്രതി സുരീന്ദര്‍ കോലിയുടെ വധശിക്ഷ അലഹബാദ് ഹൈക്കോടതി ശരിവെച്ചു. മറ്റൊരു പ്രതിയായ മൊനീന്ദര്‍ സിങ് പാന്ഥറിനെ വെറുതെ വിട്ടു. സി.ബി.ഐ പ്രത്യേക കോടതി ഇരുവര്‍ക്കും നേരത്തെ വധശിക്ഷ വിധിച്ചിരുന്നു. നിതാരി കൂട്ടക്കൊലയുമായി ബന്ധപ്പെട്ട് സി.ബി.ഐ. രജിസ്റ്റര്‍ ചെയ്ത 19 കേസുകളില്‍ ഒന്നിന്റെ വിധിയിലാണ് ഹൈക്കോടതി ഉത്തരവ്.

Subscribe Us:

റിമ്പയെ തട്ടിക്കൊണ്ടുപോയി പീഡിപ്പിച്ച് കൊലചെയ്തുവെന്നാണ് സുരീന്ദര്‍ കോലിക്കെതിരെ സി.ബി.ഐ. ചുമത്തിയ കുറ്റം. പാന്ഥറിനെ കേസില്‍നിന്ന് ഒഴിവാക്കുകയും ചെയ്തിരുന്നു. പാന്ഥറിനെ ഒഴിവാക്കിയതിന് സി.ബി.ഐ.യെ പ്രത്യേക കോടതി രൂക്ഷമായി വിമര്‍ശിച്ചതിനെത്തുടര്‍ന്ന്, പിന്നീട് പ്രതിപ്പട്ടികയില്‍ ഉള്‍പ്പെടുത്തുകയാണുണ്ടായത്.

2006 ഡിസംബര്‍ 29ന് നോയ്ഡ സെക്ടര്‍ 31ലെ പാന്ഥറിന്റെ ഡി അഞ്ച് ബംഗ്ലാവിന്റെ പിന്നിലുള്ള ഓടയില്‍നിന്ന് 15 തലയോട്ടികളും എല്ലുകളും കണ്ടെടുക്കുകയായിരുന്നു. തുടര്‍ന്നു നടത്തിയ തിരച്ചിലില്‍ കൂടുതല്‍ തലയോട്ടികളും എല്ലുകളും ലഭിച്ചു. 15 കുട്ടികളുടെയും നാലു യുവതികളുടെയും തലയോട്ടികളാണ് പോലീസ് കണ്ടെടുത്തത്. ഇവരെ പ്രതികള്‍ കൊലപ്പെടുത്തുകയായിരുന്നുവെന്നാണ് പ്രോസ്‌ക്യൂഷന്‍ കേസ്.